Ezra 7 - BUKO SIPUNENAN

Si Ezra sege ka Jerusalem

¹ Ka rura sibabara, ka teteret puparentaat Artahsasta sibailiu rimata Persia, ai sara simanteu sipuoni Ezra, sibara ka muntogat Imam Sabeu si Harun. Tiboi tubut muntogatnia barania ka repe' iei ka pata kise patunannia: Ezra, Seraya, Azarya, Hilkia,

² Salum, Zadok, Ahitub,

³ Amarya, Azarya, Merayot,

⁴ Zerahya, Uzi, Buki,

⁵ Abisua, Pinehas, Eleazar, Imam Sabeu Harun.

⁶ Si Ezra nene iei toili barania ka Babel. Nia iate sara siagai bagat boko, masun puagai surukat sikau Tuhan, Taikamanuan Israel kai Mose. Samba kaunangan rimata katubunia sangamberi obaket bagania, kalulut kabei Tuhan Taikamanuania, masisakkerinia.

⁷ Iageti ei toili ka Jerusalem piga pa' mungkuat tai Israel samba tai imam, tai Lewi, sipuurai, sipasijago matatbaliu gugurukat samba pagugulet ka uman Taikamanua ka rura sikapitu kateteret rima Artahsasta.

⁸ Lepa segenia ka Jerusalem ka laggo sikalima, iate ka rura sikapitu teteret rimata nenda

⁹ Ipot ka gogoi sara laggo siboiki, taddaakenangan puenunganannia itoili barania ka Babel samba ipot ka gogoi sara laggo sikalima segenia ka Jerusalem, kalulut kabei paroman Taikamanuania nenda masisakkerinia.

¹⁰ Aipoi Si Ezra ai saraakeat patuatnia ipuuku surukat Tuhan, bule igalaiakenia samba leu igelaiake sangamberi siteuakenen surukat nenda katubutda tai Israel.

Surat sikau rimata Artahsasta ka tubut Ezra

¹¹ Nene te surat sikau rimata Artahsasta katubut Ezra, sara imam samba bulat siagai surukat,

¹² “Sibara ka Rimata Artahsasta ka tubut imam Ezra, bulat siagai surukat Taikamanua sibakkat manua.

¹³ Kuparentaake sangamberi tai imam, tai Lewi samba tai Israel sabagei ka sangaliot purimataatku, sioba mei ka Jerusalem, momoi nuei kam pasambamui.

¹⁴ Aipoi aku samba sia pitu singantomanake aku masikoiniake ekeu ka Jerusalem samba ka Jehuda bule nulelekngake sibabara samba masiitco bulatnia leu pa airagagalaiake Surukat Tuhan Taikamanua siake ka tubum.

¹⁵ Aku samba sia singantomannake aku koba kai masipanguruatnake mas samba perak ka tubut Taikamanuan Israel, Taikamanua sikuddu ka Jerusalem. Ambitnan le panguruatmai nenda.

¹⁶ Ambitnungan leu et sangamberi mas samba perak siruruakenennu ka sangaliot Babilonia samba sangamberi paroman bangsa Israel samba leu tai imam addeat uman Tuhan Taikamanuandra ka Jerusalem.

¹⁷ Pakeian le bulagat nenda sipulelelek bule masisaki jaui simanteu, biribiri simanteu, togat biribiri, gandum samba anggur. Panguruatnake sangamberinia nenda ka uddut kudduat pasibuluat ka Uman Tuhan ka Jerusalem.

¹⁸ Perak samba mas sipulelegei momoi nupakei kam nia saaleinu, siripot obaket Taikamanuam.

¹⁹ Kau le ka tubut Taikamanua ka Jerusalem sangamberi pugalai sisegeakenen ka tubum pakeiet ka parurukat ka uman Taikamanua.

²⁰ Samba sangamberi besiakenen bagei addeat Uman Tuhan, momoi nutiddounia ka rubeiat pubulaganan purimataat.

²¹ Ka tubutdra sangamberi sipuuku pubulaganan purimataat ka provinsi Efrat kabelekat sulu, kuparentaake bule apa le itiddou si Imam Ezra, bulat siagai surukat Taikamanua sibakkat manua tukau ka tubunia simaruei,

²² aili nuntunia iate: perak aili telu ngaribu epatngotu kilo, gandum pulu ngaribu kilo, anggur rua ngaribu liter, tulat zaitun rua ngaribu liter, samba garam simemet pakeiet.

²³ Pugalai le simalelek ka bagat masipatarek sangamberinia tiddoget Taikamanua sibakkat manua addeat UmaNia, bule ta magoluNia katubukku ele ka tubut sirimanua sipupaparenta lepat aku.

²⁴ Ta' momoi nuala kam pajak sibara ka tai imam, tai Lewi, sipuurai, sipasijago matatbaliu gugurukat, sipugagalai, ele kasei pa sibara tiboi tubunia ka Uman Tuhan.

²⁵ Ekeu Ezra, pakei le sikut patuat siaket Taikamanua ka tubum, samba uddetnake le saute samba sipasiukum addeat masiparenta sangamberi sirimanua ka provinsi Efrat kabelekat sulu rapurimanua siripot surukat Taikamanuam. Bui ta nugelaiake surukat nenda ka tubut sangamberi sirimanua si taiagainia peile.

²⁶ Senen sirimanua sitaipasirereddet surukat Taikamanuam, ele surukat purimataat, bui ta maruei tuukum ukuman matei, ele turibbaiake, ele turaurau pukayoatnia, ele tukau ka bagat tangsi.”

Si Ezra masiumunake Taikamanua

²⁷ Iageti kuanangan si Ezra, “Umun kam si Tuhan, Taikamanua sipanindogietdra taikebbukatta! Aisuruakean patuat rimata bailiu oba'nangan masipuletcei Uman Tuhan ka Jerusalem.

²⁸ Ka bagat paroman Taikamanua obanangan aku rimata, singantomanake rimata samba sia siabeu tiboi tubu; akenangan ron patuat si Tuhan Taikamanuangku katubukku, bailiu oinangan kuna'na' bulat simigi saute ka mumtogat Israel bule ratoili ka Jerusalem.”