Ezra 6 - BUKO SIPUNENAN

Parentat Kores tusese ka bagat buko pagalaiat purimataat

¹ Lepa nenda kalulut parentat Rimata Darius, tubaraake pasilelelekngake ka bagat buko pagalaiat purimataat sikoiriakenen ka laggai Babel.

² Tapoi pasisuranan pagalaiat nenda tusesenia ta ka Babel, tapoi ka laggai Ahmeta ka kupkumen laggai Media. Pasisuranan nenda tusurat ka sara purunan samba ngangania kise,

³ “Ka rura siboiki puparentaat Rimata Kores, belaakenangan parenta bule Uman Tuhan ka Jerusalem tugalai minca sibailiu kudduat sirimanua masiambit panguruat samba masilabo buluakenen. Buaknia uma nenda buita enem pulu eto samba liona epet pulu eto leuet,

⁴ sangamberi rupinia buita tugalai kele kise: ka pata senen telu ngalakke bukku bui ta tukau sangalakke loina. Sakinia geti sibara ka pubulaganan purimataat le.

⁵ Samba leu sangamberi pugalai mas samba perak pakeiet ka Uman Tuhan samba sialat Rimata Nebukadnezar ka Jerusalem samba siambitnia ka Babilonia, bui ta tutoiliake ka kudduatnia siboiki.”

Parentat Darius bule turiuriuake mugalai Uman Tuhan

⁶ Lepa geti kaunangan alegiatnia si Darius kele kise, “Ka tubut Tatnai, Gubernur provinsi Efrat kabelekat sulu, samba Syetar-Boznai, samba leu sipasikeli pupasikelanan pamarenta ka Efrat kabelekat sulu. Bui nugeugeu kam tai Jehudi,

⁷ samba bui nusaila pugagalai Uman Panindogatdra. Obaake kam gubernur Jehuda samba sia saute'ra tai Jehudi masigalai minca Uma nenda.

⁸ Ka bagat nene kuparentaake kam sasaraina bule nuropmake kam sia ka bagat pugagalaira ka enungan nene: Sangamberi sakit pasigagalai uma bui ta tuala sibara ka pajak purimataat ka provinsi Efrat kabelekat sulu samba bui ta tukau katubutda nenda siripot tetere siteuakenen.

⁹ Ta' sarat nenda, bagei apa le ragaba siripot sikuadda tai imam ka Jerusalem, kele jaui sibau tubu simanteu, biribiri simanteu samba togat biribiri buluakenen pusurukat ka tubut Taikamanua sibakkat manua, samba leu gandum, garam, anggur samba tulat zaitun, bui ta tukau katubutda senen gogoi simariuriu.

¹⁰ Galaiake sangamberinia nenda bule ioi rapanguruatnake buluakenen siangkaake bagat Taikamanua sibakkat manua, samba bule ratiddou panukanan addeatku samba leu addeatda tatogakku.

¹¹ Kuparentaake, bule sirimanua sipasabau parenta nene sibara ka lalepnia tugolok sara arigi, tupiat buttetnia, lepa punuake ka tubut sirimanua nenda teret bela ka sila. Lalepnia bui ta turagat samba tubailiuake kudduat pora'.

¹² Bule Taikamanua sipasipipili Jerusalem sibailiu kudduat tupanindou katubuNia, masimateiake senen rimata ele bangsa simagege sipasabau parenta nene samba masisibo masipakatai Uman Tuhan ka Jerusalem. Aku, Darius, amasiake parenta nene. Galaiake kam bulat sipulelelek.”

Tupuneni Uman Tuhan

¹³ Galaiakenangan parentat Rimata Darius nenda sipulelelek si Tatnai, gubernur Efrat kabelekat sulu, samba si Syetar-Boznai samba leu saaleira.

¹⁴ Ropmakerangan sia nabi Hagai samba nabi Zakharia, sia saute'ra tai Jehudi masiriuriuake pasigagalai Uman Tuhan nenda. Maruei le aralepaake pasigagalai nenda siripot parentat Taikamanuan Israel samba parentat Kores, Darius samba Artahsasta sangamberi rimata Persia.

¹⁵ Ailepa Uman Tuhan nenda ka gogoi sika telu laggo Adar ka rura sikaenem puparentaat Rimata Darius.

¹⁶ Iageti sia tai Israel, tai imam sagamberi tai Lewi samba sangamberi sirimanua sitotoili ka kudduat katuribbaiat punenirangan Uman Tuhan ka bagat angkat baga.

¹⁷ Ka bagat punen nenda panguruatnakerangan kai Tuhan sangotu ngamuneng jaui simanteu, ruangotu ngamuneng biribiri simanteu samba 400 ngamuneng togat biribiri. Addeat buluakenen pasiappet jo, tupanguruatnake pulu rua ngamuneng kambing simanteu, senen suku Israel sangamuneng.

¹⁸ Ka bagat masipasikeli Uman Tuhan pakokoirangan galajetdra tai imam samba leu tai Lewi siripot sitususurat ka bagat bukot Mose.

Punen Paskah

¹⁹ Ka gogoi sikapulu epat laggo sara ka rura sibabara, sangamberi sirimanua sitotoili sibara ka kudduat katuribbaiat mupunen masiabeuake Paskah.

²⁰ Sangamberi tai imam samba tai Lewi aragalaiakean enungan masipalina tubu bailiu addeakerangan amalinaan sia. Lepa geti tai Lewi nenda masipajajaki sangamberi tarimeu buluakenen Paskah addeat ka tai imam, addeat saradra samba sangamberi sirimanua sitotoili sabagei ka kudduat katuribbaiat.

²¹ Sangamberi buluakenen komrangannia tai Israel sitotoili sibara ka kudduat katuribbaiat samba sipulaggai ka tobbou laggai nenda sikaddiuake enungan puririmanua ka bagat jo samba moi sia ka tubut Tuhan, Taikamanuan Israel manindou simariuriu.

²² Pitu ngagogoi burunia rapuangka baga mupunen Roti sita' ragi. Bulat maangka bagadra, kalulut aigalai poi si Tuhan imaanggai baga rimata Asyur katubutda, bailiunangan ropmakenangan sia ka bagat pasigagalai minca Uman Tuhan, Taikamanuan Israel.