Ezra 4 - BUKO SIPUNENAN

Pasailaat ka bagat pugagalai Uman Tuhan

¹ Kele araarepnia saggakdra tai Jehuda samba tai Benjamin, sia sitotoili siribbaiakenen ai sia masigagalai Uman Tuhan, Taikamanuan Israel,

² ei sia masiailiake si Zerubabel samba sia sautet muntogat, lepa kuarangan, “Obaake kam kuoi kai masigalai Uman Tuhan nenda, aipoi kai leu et manindou ka tubut Taikamanuamui, kele kakam. Mariuriu le kupanguruatnake kai buluakenen sarat ka tubuNia ka teteret si Esar-Hadon, rimata Asyur, sipasiambit kai sene.”

³ Tapoi, si Zerubabel, Jesua samba saute muntogat nenda, alegirangan sia “Ta' kubesiake kai paromanmui ka bagat pasigagalai Uman Tuhan Taikamanuamai. Aile kugalai kai nia saramai siripot parentat Kores, rimata Persia, ka tubumai.”

⁴ Lepa geti sipulalaggai simaburu mukuddu ka tobbou laggai nenda galairangan imagulai patuatdra tai Jehudi samba leu masipalotoki sia bule raariake masigalai Uman Tuhan.

⁵ Bulaganirangan siabeu tiboi tubu ka puparentaat Persia bule bui ipuriuriu pinaatutdra tai Jehudi nenda. Aipuriuriu sipinatudra nene ka burut puparentaat Rimata Kores pat aili ka puparentaat Rimata Darius.

Tuariake pasigagalai laggai Jerusalem

⁶ Ka panandaat puparentaat Rimata Ahasyweros, sangamberi saggakdra sipulalaggai ka Jerusalem samba ka Jehuda masigalai surat panganduat.

⁷ Samba leu ka teteret puparentaat Artahsasta, kaisar Persia, puailinangan minca: Bislam, Mitredad, Tabeel samba saaleira masigalai surat ka tubut rimata. Surat nenda rasuratnia ka ngangan Aram, samba ka teteret tubasaake bui ta tukolouake.

⁸ Rehum, bupati, samba Simsai, sipanunurat, aigalaian surat ka Jerusalem katubut rimata Artahsasta, bagania iate.

⁹ – Kateteret nenda galainangan surat si Rehum, bupati samba Simsai, sipanunurat, samba saaleira sabagei, siasiukum, siabeu kapamarenta, samba sipugagalai, tai Persia, sangamberi sirimanua sibara ka Erekh, sibara ka Babel samba sangamberi sirimanua sibara ka Susan, iate sangamberi tai Elam,

¹⁰ samba sangamberi bangsa bagei siambit rimata sabeu Asnapar samba sikoiniakenennia mukuddu ka laggai Samaria samba laggai bagei ka bagat propinsi Efrat kabelekat sulu.

¹¹ Kise te ngangan surat nenda, “Ka matat Rimata Artahsasta, sibara ka pagugulet Tuanku sikuddu ka Efrat kabelekat sulu. Salam.

¹² Bule nuagainia ale Tuanku, arakaddiuakean laggai bagei tai Jehudi ka bagat purimataat Tuanku, kineneiget amukuddungan sia ka Jerusalem samba airagagalai minca laggai sikatai samba sitaimareddet. Arataddaakean masirioake minca irip laggai samba ta an mauju ilelepa.

¹³ Ke tueddet bai ragalai minca laggai nenda samba ilepa rarioake irip laggai, ta an raoba masilului pajak, iageti taimaiginangan siloket ka purimataat.

¹⁴ Sipuutak le kai ka pasigagalai simaeru ka tubut Tuanku samba ta kuoba kai masiitco turugiake Tuanku. Iate lulunia kukua kai kele nene ka tubut Tuanku,

¹⁵ bule Tuanku masilelekngake ka bagat buko pagalaiat taikebbukat Tuanku. Ka bagania maagainangan kirenangan laggai Jerusalem bulatnia sitaimareddet samba teteret siboiki peile sarat masiparugi tai rimata samba saute ka provinsi. Bulat mabesi' tupasikeli sia sipulalaggai. Iate lulunia aitupakatai laggai nenda.

¹⁶ Oto, matonem bagamai, ke ragalai bai minca laggai nenda samba rarioake irip laggai bukku, taioinangan ikupkupmake minca Tuanku provinsi Efrat kabelekat sulu nene.”

¹⁷ Kaunangan alegiat Rimata kise, “Ka tubut Gubernur Rehum samba Simsai sekretaris provinsi, samba leu saaleira sikuddu ka Samaria samba ka laggai-laggai bagei ka propinsi Efrat kabelekat sulu. Salam.

¹⁸ Surat sikirimakenenmui sasaraina atungangaakean samba atubasaakean katubukku.

¹⁹ Oto kalulut parentakku atubaraakean pasilelelekngake samba bulatnia matoila barania siburu Jerusalem sarat masilawan tai rimata samba maigi katalagat sipulalaggai sitaimareddet samba sibaraake pulamaugat.

²⁰ Abara rimata simagege muparenta sedda samba kupkupnangan sangaliot provinsi Efrat kabelekat sulu samba leu masibaraake pajak samba upeti.

²¹ Kalulut nenda, belaake kam parenta bule raariake mugalai, bule laggai nenda bui'an ragalainia minca teret kuake parenta.

²² Galaiake kam parentakku nenda simaola, bule bui ituppai minca beunan purugiatku!”

²³ Kele ailepa tubasaake surat Artahsasta nenda ka tubut Rehum, Simsai samba saaleira, ei sia simaola ka Jerusalem samba besiakerangan raariake tai Jehudi, bule ragalakngake masigalai minca laggai nenda.

²⁴ Ka teteret nenda puarinangan pugagalai Uman Tuhan samba ta'an amuriuriu teret rura si karua puparentaat Darius, rimata Persia.