Ezra 3 - BUKO SIPUNENAN

Ratadda minca muarat ka Jerusalem

¹ Ka laggo sikapitu, amulelekngan kukudduddra tai Israel ka senen laggaira. Ka gogoi sikasara laggo nenda parururangan ka Jerusalem,

² lepa si Jesua togat Jozadak samba saaleinia tai imam samba si Zerubabel togat Sealtiel samba leu sasarainania masigalai minca kudduat pasibuluat ka Taikamanuan Israel. Bule ioi ralabo buluakenen ka uddutnia, siripot sitususurat ka bagat buko surukat Mose, pagugulet Taikamanua.

³ Kenanen maloto sia ka tubut sipulalaggai ka tobbou laggai nenda, tapoi ragalai leu et kudduat pasibuluat nenda ka kudduatnia siboiki. Lepa taddaakerangan masipanguruatnake minca buluakenen rarangen, ka teteret simanceman samba kasoibokat.

⁴ Raabeuake leu et Punen Pusasapou, siripokat enungakenen samba senen gogoi rapanguruatnake buluakenen siripot siteuakenen ka gogoi nenda.

⁵ Ai leu bagei, rapanguruatnake buluakenen rarangen simakolou samba buluakenen ka Punen Laggo Sibau samba ka sangamberi punen bagei sibaraakenen addeat itupanindogi si Tuhan. Rapanguruatnake leu panguruat ka teu baga katubut Tuhan.

⁶ Kenanen ta pei arataddaake masigalai minca Uman Tuhan, tapoi ka gogoi sikasara laggo pitu arataddangan masilabo buluakenen kai Tuhan.

Rataddaake masigalai Uman Tuhan

⁷ Sirimanua simigi masikau paroman bulagat masilului siagai musipaddai bukku samba siagai mugalai loina. Rakau leu et komen, loket samba leu tulat zaitun ka laggai Tirus samba Sidon masisaili loinat pinilok Libanon sibara ka laggai-laggai nenda. Loina nenda tuambit ka Jope masienungi koat. Sangamberinia nenda ragalai sirimanua simigi siobaakenen Kores, rimata Persia.

⁸ Iageti ka laggo rua, ka rura sikarua lepat aratoili tai Israel ka Jerusalem, taddaakerangan masigalai minca Uman Tuhan. Si Zerubabel samba si Jesua samba sangamberi saaleira sisara bangsa, tai imam, tai Lewi, samba leu sangamberi sirimanua siribbaiakenen sitotoili ka Jerusalem, pugalairangan simakere. Sangamberi tai Lewi sipurura 20 ngarura ka pata rasausau sia masipasikeli pasigagalai Uman Tuhan nenda.

⁹ Iageti si Jesua, tai Lewi nenda, samba sangamberi tatogania samba sangamberi sasarainania samba leu si Kadmiel samba tatogania (muntogat Hodawya) rajago simakere pasigagalai Uman Tuhan nenda. Ropmakerangan sia tai Lewi sibara ka muntogat Henadad.

¹⁰ Ka teteret arataddaake masigalakngake bongen Uman Tuhan sia sipugagalai, puleppeirangan jubah tai imam samba ai raukkaake trompet samba puriorangan ka kudduatdra. Tai Lewi sibara ka muntogat Asaf leu et puriorangan sedda airauukkaake ngong sigoiso. Umunakerangan si Tuhan siripot enungan siteuakenen barania ka teteret rimata David.

¹¹ Sarakyat masiuraiake urai pasiumun kai Tuhan, kaurangan rapaole rubeiatnia sikateitei, kisene ngangania, “Maeru le si Tuhan, samba nuntut bagaNia ka tubut Israel ta tatatakki.” Sangamberi sarakyat pugereirangan samba masiumun si Tuhan, aipoi bongen Uman Tuhan atugalakngakean.

¹² Maigi ka talagadra tai imam, tai Lewi samba sautet muntogat, simabaja' sipasiitco Uman Tuhan siboiki. Ka teteret ralelekngake pasigalangan bongen Uman Tuhan nene, pusourangan simaron. Tapoi sirimanua sabagei sibabara sedda mugora baga angkat baga,

¹³ bailiunangan ta momoi tubaggei gorat baga angkat baga samba sou. Naunia bulat manau, pat maarepnangan ka sareunan.