Ezra 10 - BUKO SIPUNENAN

Isiat masiariake putalimougat simagalu

¹ Ai peile si Ezra manindou sialei musou samba masiseseake jo ka matat Uman Tuhan, bulat makope igi tai Israel moi paruru', taimanteu, kisedda leu et tainanalep samba tatoga. Goilikrangannia sialei musou simaron.

² Lepa geti si Sekhanya togat Jehiel sibara ka muntogat Elam, masikua kai Ezra, “Amajongan kai ka tubut Tuhan kalulut akutalimouake kai bangsa bagei. Kenanen poi kisedda aipeile karoniendra tai Israel.

³ Konan kam tapusuppa kam ka tubut Taikamanua, tatutuituiake sangamberi tainanalep nenda pasamba tatogadra. Kututnake le kai geti sangamberi nganturatnu samba leu nganturat sangamberi sirimanua sabagei sisuru' parentat Taikamanua. Kureddet le kai geti Surukat Taikamanua.

⁴ Bui' ta ekeu le masigalaiake. Kai masiropmake ekeu. Ronnake patuatnu galaian pagalaiat nenda teret itukapplu.”

⁵ Iageti taddakenangan mugalai si Ezra. Koiniakenangan sangamberi sautera tai imam, tai Lewi samba tai Israel sabagei musuppa, sia masigalaiake sikuat Sekhanya nenda.

⁶ Kele ailepa rapusuppa, einia si Ezra barania ka matat Uman Tuhan samba guru' ka bagat kudduat Johanan togat Elyasib samba mugogoi sedda. Ta' ioba mukom samba mulo' kalulut reureu baga masipaatu sigalaiakenendra sangamberi sirimanua siribbaiakenen nenda.

⁷ Lepa geti tusegeake sara patuagaiat ka sangaliot Jerusalem samba Jehuda ka tubut sangamberi sirimanua sitotoili sibara ka kudduat katuribbaiat, bule raparuru' ka Jerusalem.

⁸ Kasei ta moi ka bagat telu ngagogoi, turaurau sangamberi bibiletnia ta'an tuaaddeakenia laddou paamian Israel. Paagaiakenen nenda rateuake sia sautet paamian.

⁹ Sabau telu ngagogoi, ka gogoi sika rua pulu laggo siba, sangamberi taimanteu sikuddu ka kupkumen laggai Jehuda samba Benjamin moi ka Jerusalem samba parururangan ka gerat Uman Tuhan. Ka teteret nenda bele urat simakope tirit. Pugeretnangan tubudra sangamberi sirimanua lopot leppetnia laggai samba leu et kalulut masibesiake parurukat nenda.

¹⁰ Lepa geti purionangan si Ezra samba panibonangan katubutda. Kuanangan, “Sangamberimui amajongan kam samba nutuppai kam puseleat Israel kalulut nutalimouake kam tainanalep bangsa bagei.

¹¹ Lulut nenda, seseake kam jomui ka tubut Tuhan, Taikamanua panindogietdra taikebbukatta samba galaiake kam apa siangkaake bagaNia. Reunannake kam sia sirimanua sabagei sikuddu ka tobbou laggaita samba tuituiake kam sangamberi sinanalepmui sibara ka bangsa bagei nenda.”

¹² Sangamberi sirimanua nenda masialegi sabeu nganga, “Kututut le kai nganturatnu.”

¹³ Lepa kuarangan minca, “Tapoi siooi sene bulat maigi samba bulat matirit urat. Ta' kuomake kai murio ka gerat kele nene. Sarapei galajet nene ta momoi tulepaakenia ka bagat sara ele ruangagogoi, aipoi bulat makope igimai siorak ka bagat jo nene.

¹⁴ Oba'akean le rakuddu sautemai ka Jerusalem samba masipasikeli pagalaiat nenda. Lepa senen sirimanua ka sangamberi laggaimai sipusinanalep sibara ka bangsa bagei, bui' ta moi ka tetere siteuakenen, simakere pasamba sia saute samba sia sipasiukum ka sene-senen laggai. Ke' kiseddangan bai ta'an mugogolu minca Taikamanua ka tubutta kalulut paukkelat nenda.

¹⁵ Ta' anai beri sia sara sipasikukua kepput ka baga pagalaiat pinaatu nenda, sarat si Jonatan togat Asael samba Jahzeya togat Tikwa, roprangannia rua tai Lewi, iate si Mesulam samba Sabetai.

¹⁶ Sangamberi sirimanua siribbaiakenen sitotoili nenda riuriu raenungake pinaatu nenda, lulut nenda Imam Ezra masipili piga pa sirimanua ka talagat sautet muntogat, samba suratdrangan oninda. Ka gogoi sika sara laggo pulu taddarangan masipatiboiji bule itupasikeli paukelat nenda.

¹⁷ Ka bagat telu ngalaggo tueddetnangan ralepaake pasilelelekngake pagalaiat sangamberi taimanteu sitalimouake tainanalep sibara ka bangsa bagei.

Sangamberi sirimanua sipusinanalep sibara ka bangsa bagei

¹⁸ Nene te oninda sangamberi sirimanua sipusinanalep sibara ka bangsa bagei: tai imam tusurat oni pasamba muntogatnia: muntogat Jesua pasamba sasarainania, tatogat Jozadak: Maaseya, Eliezer, Jarib samba si Gedalya.

¹⁹ Aragalaian palelengan masipasaraake sinanalepdra, lepa panguruatnakerangan biribiri simanteu addeat buluakenen pasiappet jodra.

²⁰ Muntogat Imer: Hanani samba Zebaja.

²¹ Muntogat Harim: Maaseya, Elia, Semaya, Jehiel samba Uzia.

²² Muntogat Pasyhur: Elyo'enai, Maaseya, Ismael, Netaneel, Jozabad, samba Elasa.

²³ Tai Lewi: Jozabad, Simei, Kelaya (kuanenta leu et Kelita), si Petahya, Juda samba Eliezer.

²⁴ Sibara ka sipuurai: Elyasib Sibara ka sipasijajago matat baliu gugurukat: Salum, Telem samba Uri.

²⁵ Tai Israel sabagei: Muntogat Paros: Ramya, Jezia, Malkia, Miyamin, Eleazar, Malkia samba Benaya.

²⁶ Muntogat Elam: si Matanya, Zakharia, Jehiel, Abdi, Jeremot samba Elia.

²⁷ Muntogat Zatu: Elyo'enai, Elyasib, Matanya, Jeremot, Zabad samba Aziza.

²⁸ Muntogat Bebai: si Johanan, Hananya, Zabai samba Atlai.

²⁹ Muntogat Bani: si Mesulam, Malukh, Adaya, Jasub, Seal samba Jeramot.

³⁰ Muntogat Pahat-Moab: si Adna, Kelal, Benaya, Maaseya, Matanya, Bezaleel, Binui samba Manasye.

^31-32 Sibara ka muntogat Harim: Eliezer, Jisia, Malkia, Semaya, Simeon, Benjamin, Malukh samba Semarya.

³³ Sibara ka muntogat Hasum: Matnai, Matata, Zabad, Elifelet, Jeremai, Manasye samba Simei.

^34-37 Sibara ka muntogat Bani: Maadai, Amran, Uel, Benaya, Bedeya, Keluhu, Wanya, Meremot, Elyasib, Matanya, Matnai, Jaasai.

^38-42 Sibara ka muntogat Binui: Simei, Selemya, Natan, Adaya, Makhnadbai, Sasai, Sarai, Azareel, Selemya, Semarya Salum, Amarya samba Josep.

⁴³ Sibara ka muntogat Nebo: Jeiel, Matica, Zabad, Zebina, Jadai, Jo'el samba Benaya.

⁴⁴ Sangamberi sirimanua nenda aratalimouake tainanalep sibara ka bangsa bagei. Oto sangamberi tainanalepdra nenda rapasaraake samba ratuituiake sia pasamba tatogadra.