Ezra 1 - BUKO SIPUNENAN

Si Kores masiobaake ratodi tai Jahudi ka laggaira

¹ Ka rura siboiki puparentaat Kores, rimata Persia, galaiakenangan si Tuhan kele sikuaNia ka tubut nabi Jeremia. Tubbuinangan paatuat Kores si Tuhan bule ibelaake sara parenta basaakenen ka sangaliot purimataatnia. Tiboietnia kele kisene:

² “Nene te parentat Kores, rimata Persia. Tuhan, Taikamanua rimata ka surga, aibailiuakean aku rimata ka sangaliot polak, samba ai gugluakean aku masigalai UmaNia ka Jerusalem ka kupkumen laggaira tai Jehuda.

³ Bule Taikamanua masijago kam sangamberimui sibailiu paamianNia. Bui ta toili kam ka Jerusalem samba galaimuian minca Uman Tuhan, Taikamanuan Israel, Taikamanua sipukukuddu ka Jerusalem.

⁴ Ke ai sara sirimanua sibara ka paamianNia ka kudduat katuribbaiatdra nene sigaba paroman bule ioi itoili, iageti sangamberi pabe'beakenennia bui ta raropmakenia. Bui ta rakau ka tubunia perak samba mas, balut ka enungan samba leu tarimeu, samba leu et sangamberi panguruat ka Uman Tuhan ka Jerusalem.”

⁵ Lepa geti sia sautet muntogat sibara ka suku Jehuda samba Benjamin, sia tai imam samba sangamberi tai Lewi, samba senen sirimanua paatuatnia ai rimanuake Taikamanua masipatarek tubu bule toili ka Jerusalem samba masigalai minca Uman Tuhan.

⁶ Sangamberi pabe'beakenendra masiropmake samba masikau bibilet kele sangamberi pugalai perak samba mas, balut ka enungan, tarimeu, bibilet bagei samba sangamberi panguruat ka Uman Tuhan.

⁷ Belaakenangan si Kores sangamberi mangkok samba pulokat sabeu pakeietdra siboiki ka bagat Uman Tuhan ka Jerusalem. Sangamberi bibilet nenda aiabbitnan rimata Nebukadnezar samba kaunangannia ka bagat uman sabulungannia.

⁸ Kaunangan si Kores ka tubut Mitredat ipasikeli sangamberi bibilet nenda, ute' sangamberi bibilet pukayoat purimataat. Lepa geti si Mitredat masisurat onin sangamberi bibilet nenda addeat Sesbazar, gubernur tai Jehuda.

⁹ Nene te suratnia: telu pulu mangkok mas, rua pulu siba balugui,

¹⁰ telu pulu pulokat mas, epat nguto pulu pulokat perak, sangaribungambuah bibilet bagei.

¹¹ Taddenia sangamberinia lima ribu epatngotu mangkok mas samba perak samba leu bibilet bagei. Sangamberinia nenda ambitnangannia si Sesbazar ka teteret aitoili sambatda sangamberi siribbaiakenen sabagei ratuitui baradra ka Babel masiailiake Jerusalem.