Est. 9 - BUKO SIPUNENAN

Tai Jehudi masilawan sangamberi saggakdra

¹ Kalepakatnia ailinangan gogoi sikapulu telu laggo Adar iate gogoi siteuakenen addeat masigalaiake parentat rimata katubutda tai Jehudi. Arangenangan gogoi nenda sia sangamberi saggak bangsa Jehudi addeat masikupkup bangsa nenda. Tapoi amatoila tai Jehudi le amasikalaake sia.

² Ka senen laggai, parururangan samba musara sangamberi tai Jehudi masisaggangi sangamberi sirimanua sibara patuat sikatai katubutda. Sangamberi bangsa ka senen kudduat maloto sia katubutda bailiu ta anai beri sia sara simagege masisaggangi sia.

³ Beringan sangamberi sibeu tiboi tubu ka provinsi, sia tai guebenur, bupati samba siabeu tiboi tubu ka purimataat masiropmake tai Jehudi kalulut sangamberidra maloto ka tubut Mordekhai.

⁴ Raagai sirimanua ka sangaliot purimataat si Mordekhai bulat ai gegenia ka uma purimataat samba memei le iurau gegenia.

⁵ Kisedda te bangsa Jehudi aioi ragalai siobat bagadra ka saggakdra. Saggangirangan samba pamateirangan sia pasamba lanjau.

⁶ Ka Susan, inan laggai purimataat, tai Jehudi masimateiake lima ngotu sirimanua.

⁷ Ka talagadra iate: Parsandata, Dalfon, Aspata,

⁸ Porata, Adalya, Aridata,

⁹ Parmasta, Arisai, Aridai samba Waizata.

¹⁰ Sia sipulu nenda iate togat Haman taimanteu togat Hamedata, saggakdra sabeu ka tai Jehudi simateiakenendra tai Jehudi, Tapoi bibiletdra ta araparauraugi.

¹¹ Ka gogoi nenda leu et segeakerangan ka tubut rimata igit sirimanua simateiakenen ka Susan.

¹² Kuanangan rimata kai Rimata Ester, “Ka Susan peile limangotu ribu sia aramateiake tai Jehudi, ai leu pulu sia togat Haman. Sarapei ka kukupkumen purimataat. Ta' tuagai apa ragagalaiake sedda! Oto, apangan le tiddogetnu kineneiget” Kuangan le, bulat nusisilo le!”

¹³ Aleginangannia si Ester, “Ke pasese ka bagat tuanku, bule tai Jehudi sipukukuddu ka Susan nene mancep simanceman tuobaake masioleake minca apa sigalaiakenenia ka gogoi nene. Kisedda leu et, bule mayatdra tatogat Haman nenda tutoakngake ka arigi paninggotat.”

¹⁴ Lepa kaunangan parenta rimata bule ragalaiake sitiddou Ester. Surat parenta kaunen ka laggai Susan tubelaake samba pulu mayat togat Haman tutoakngake.

¹⁵ Oto ka gogoi pulu epat laggo Adar, parururangan minca sangamberi tai Jehudi ka Susan samba 300 sirimanua arapamatei minca ka laggai nenda. Samba minca nene leuet ta amasiraurau sia.

¹⁶ Sangamberi tai Jehudi sipukukuddu ka sangamberi provinsi leu et aparuruan samba masijago tubudra. Arakalaakean saggakdra samba masipamatei 75.000 sirimanua sipulagaki baga sia. Tapoi ta amasiraurau sia.

¹⁷ Aipuaili sibabara nenda ka gogoi pulu telu laggo Adar. Gogoi patunannia, ka gogoi sikapulu epat, ta apamatei sia, tapoi masiabeuake gogoi nenda ka angkat baga.

¹⁸ Tapoi tai Jehudi sipukukuddu ka Susan masiabeuake gogoi sikapulu lima addeat gogoi sabeu, aipoi alepaan ramateiake saggak ka gogoi pulu telu samba pulu epat, lepa ka gogoi sikapulu lima puaringan.

¹⁹ Iate lulunia tai Jehudi sipukuddu ka sangamberi laggai sigoiso masiabeuake gogoi sikapulu epat laggo Adar sibailiu gogoi angkat baga, addeat gogoi punen angkat baga sialei masiparubei komen.

Punen Purim

²⁰ Kele ailepa nenda suratnangan si Mordekhai sangamberi sipuaaili nenda samba kaunangan surat ka sangamberi tai Jehudi ka sangaliot purimataat Persia, ka sareunan samba ka lagre.

²¹ Bagat surat nenda iate parenta bule tuabeuake gogoi sikapulu epat samba pulu lima laggo Adar senen rura.

²² Aipoi ka gogoi nenda te arakalaake sangamberi saggakdra, bailiu pureureugat baga samba besit paatuatdra sailinangannia bailiu puangkakat baga samba pugorakat baga. Oto kalulut nenda bui' ta raabeuake gogoi nenda mupunen samba mukom simakere samba leu sialei masikau komen samba masiparubei panguruat ka simageba.

²³ Reddetrangan tai Jehudi parentat Mordekhai nenda samba kisedda te pasiaabeuake nenda ibailiu katukelat arat senen rura.

Pasilepa

²⁴ Si Haman togat Hamedata, punuteteu Agag, saggakdra sabeu tai Jehudi, masigalai pauktungan kuanen leu et “Purim” addeat masiteuake gogoi tupamatei tai Jehudi. Ai paatungan masisappruake sia.

²⁵ Tapoi amurio le si Ester ka matat rimata, samba rimata masikau parenta sitususurat sibailiuake pinaatu sikatai sigalai Haman siorak tubunia sarania, bailiunangannia samba tatogania tutoakngake ka arigi paninggotat

²⁶ Kalulut nenda sangamberi gogoi sabeu nenda tuoniake Purim. Surat Mordekhai samba sangamberi siorikdra tai Jehudi,

²⁷ sikau sia masigalai sara enungan galaiakenenda, siali muntogatdra samba sangamberi sirimanua sibailiu sikauman bangsa Jehudi. Siripot enungan galaiakenenda nenda senen rura bui' ta raabeuake ka rua gogoi siteuakenen Mordekhai.

²⁸ Tuteuake leu et gogoi purim nenda teret buruburu sangamberi gogoi Purim nenda bui' ta turepdep samba raabeuake senen sipulalalep tai Jehudi ka sangamberi reddenan ka senen provinsi samba laggai.

²⁹ Lepa nenda, pasamba surat Mordekhai, Rimata Ester, togat Abihail masigalai surat sika ruania, masiparon bagat surat Mordekhai pagalaiat Purim nenda.

³⁰ Surat nenda tukau ka sangamberi tai Jehudi, samba suratnia tukau ka sangotu ruapulupitu provinsi purimtaat Persia. Surat nenda sialei panindogat bule bangsa Jehudi mariuriu sanang samba aban.

³¹ Surat nenda masina'na' leu et bule sia samba paninikatdra masirepdep gogoi Purim ka teteret siteuakenen, kele leu rarepdep teteret pupuasoat samba tetere mulu'lu' baga. Nenda te bagat surat Mordekhai samba Rimata Ester.

³² Parentat Ester siteuake enungan galaiakenen pagalaiat Purim, tusurat ka bagat buko.