Est. 8 - BUKO SIPUNENAN

Tuparentaake bangsa Jehudi masilawan saggakdra

¹ Ka gogoi nenda kaunangan Rimata Ahasyweros ka tubut Rimata Ester sangamberi bibilet Haman, saggakdra sabeu tai Jehudi nenda. Paagainangan si Ester ka tubut rimata aipoi si Mordekhai saeppunia, oto barania tetere nenda tukau gege ka tubut Mordekhai addeat murio ka matat rimata sitaisosogaijet.

² Goloknangan sipsipnia rimata sialania minca kai Haman samba kaunangannia kai Mordekhai. Samba si Ester masirioake si Mordekhai sibailiu sikupkup bibilet Haman.

³ Kele ailepa nenda purionangan si Ester ka matat rimata minca. Purapponangan ai nia musosou samba masitiddou bule itata'ake rimata pinaatu sikatai sigalainia si Haman katubutda tai Jehudi.

⁴ Totoiakenangan tuturania mas rimata ka tubut Ester, iageti purionangan si Ester samba kuanangan,

⁵ “Ke pasese samba manuntu bagat Tuanku katubukku, bule Tuanku masibelaake surat parenta bule tutiktik sangamberi surat Haman sibara ka bagania parenta masimateiake sangamberi tai Jehudi ka purimtaat nene.

⁶ Kipa iaaili patuatku masiitco bangsa samba sasarainangku rapamateiji itata'?”

⁷ Iageti kuanangan Rimata Ahasyweros kai Rimata Ester samba kai Mordekhai, “Kirenangan, aku tiggotnakean si Haman kalulut ibesiake imateiake tai Jehudi, samba bibiletnia akuakean ka tubut Ester.

⁸ Tapoi surat sigalainia ka onin rimata samba sikaunia cap rimata, ta momoi tutiktik minca. Tapoi kuobaake kam masigalai surat pagalaiat bangsa Jehudi, apa simaeru sipinaatumui. Galai kam surat nenda ka oningku capmuiannia cap purimataat.”

⁹ Ka gogoi nenda leu et, iate ka gogoi si karua pulutelu laggo telu, laggo Siwan. Sogainangan sia tai sekretaris rimata si Mordekhai samba masiparentaake sia masigalai surat katubutda sia tai gubernur, sia tai bupati samba sia siabeu tiboi tubu ka 127 provinsi, barania ka India sege ka Sudan. Sangamberi surat nenda tugalai ka nganga samba ka surat senen propvinsi nenda. Kaunangan leu et surat nenda katubutda tai Jehudi ka nganga samba ka surat Jehudi.

¹⁰ Sangamberi surat nenda itandatangani si Mordekhai ka onin Rimata Ahasyweros samba capnangannia cap purimataat. Lepa koiniakenangan si Mordekhai sangamberi pakoiniet masitaroake sangamberi surat nenda ka sangamberi propvinsi purimataat, mukuro' kurot rimata simanangka.

¹¹ Sangamberi surat nenda masipoiliat oobaakena rimata tai Jehudi ka senen laggai bule rapusara samba masijago tubu. Ke ai sisaggangi sia sirimanua sibara pamatei sibara ka bangsa samba provinsi kaipa pa', momoi ralawan samba rapamatei sia sipasisaggangi nenda pasamba sinanalep samba tatoga. Momoi rapamatei saggakdra nenda pat tata' samba leu masiraurau bibiletnia.

¹² Parenta nenda bui ta tugalaiake ka sangaliot purimataat Persia ka gogoi siteuakenen Haman addeat masipamatei sangamberi tai Jehudi, ka gogoi pulu telu laggo pulu rua, laggo Adar.

¹³ Surat parenta nenda bui ta tubelaake sibailiu undang-undang samba tupakakra ka sangamberi sirimanua ka sangamberi provinsi bule bangsa Jehudi ramatarek masilawan ke iaili gogoi nenda.

¹⁴ Iageti tuitui sia pakoinien nenda mukuro' kurot rimata. Ia leuet ka Susan inan laggai purimataat, parenta nenda tubasaake.

¹⁵ Kele ailepa nenda kaddiuakenangan lalep purimtaat si Mordekhai masileppeiake uma pubebeunan tiboi tubu samba simabulau, leppei sabeu simasurou sibara ka juto simaalit baga samba kirit mas simakope lainge. Gau'gau' le laggai Susan kalulut angkat baga.

¹⁶ Rasese aroi samba sanang, eru samba atsit tubu tai Jehudi.

¹⁷ Ia leu et ka senen laggai samba provinsi, ka senen kudduat tubasaake surat parentat rimata, sangamberi tai Jehudi mugora baga, muangka baga samba mupunen. Beringan sibara ka sipulalaggai sedda maigi sibailiu sikauman bangsa Jehudi, kalulut loto'ra ka bangsa nenda.