Est. 7 - BUKO SIPUNENAN

¹ Iageti ka sikaruania rimata samba si Haman mukom samba mulo simakere pasamba si Ester.

² Ai sia mulolo' anggur, parerenangan minca rimata kai Ester, “Kauan, sinanalepku, apa kiddietnu” Kuangan le! Bulat kuaake le geti kenanen nutiddou iletalaga sibara ka purimataatku.”

³ Aleginangan Rimata Ester, “Ke pasese ka bagat Tuanku, kutiddou bule aku samba bangsaku moi murimanua.

⁴ Aipoi aku samba bangsaku atusakiakean addeat tumateiake. Ke tusakiake kai bule tubailiuake pagugulet, mumengmeng le aku samba ta kusasaila Tuanku. Tapoi kai kineneiget geti tumateiake samba tusappruake!”

⁵ Lepa parerenangan rimata Ahasyweros ka tubut Rimata Ester, “Kasei magege masigalai kele nene” Kaipa sirimanuania?

⁶ Aleginangannia si Ester, “Si Haman sikatai nene te saggak samba sipaoreiji kai!” Bulat kope le lotonia si Haman masiitco rimata samba Rimata.

⁷ Bulat makope le golunia rimata, lepa rionia kaddiuakenangan meja samba belania ka gerat, ka gerat uma purimataat. Aiagaian si Haman aipoi rimata alepaan aiteuake bule ituukumakenia, lulut nenda kuddu le nia pasamba Rimata Ester addeat masitiddou bule ituarauake.

⁸ Ka belet bagania si Haman beleakenangan tubunia ka uddut kudduat pasiaroiat tubu Ester addeat masitiddou katuappekat, tapoi ka teteret nenda leu et toili rimata barania ka gerat uma purimataat. Masiitco si Haman kele nenda, pugereinangan rimata, “Aponia” Bulat aipeile gegenia masipajo rimata sene, ka matakku samba ka uma purimataatku?” Kele ailepa tiboiet nenda aitiboakenia rimata, oi sia siabeu tiboi tubu samba masisabbungi utet Haman.

⁹ Lepa kuanangan si Harbona, sara sibara ka talagat siabeu tiboi tubu nenda, “Tuanku, ka bebet lalep Haman ai arigi paninggotat buaknia lima pulu eto. Airioakean si Haman bule itutiggotnake si Mordekhai, sirimanua siarauake purimanuaiat Tuanku,” Iageti kuanangan rimata, “Tiggotnake kam si Haman ka arigi nenda!”

¹⁰ Kasedda te aitutiggotnake si Haman ka arigi sirioakenennia addeat Mordekhai. Kele ailepa nenda iapeite tata' golut rimata.