Est. 6 - BUKO SIPUNENAN

Rimata masiabeuake si Mordekhai

¹ Ka soibo nenda leu et ta momoi iperep rimata. Kalulut nenda tiddounangan tuala buko pasisuranan sejarah purimataat samba masikoniake rabasaakenia.

² Sesenangan ka bagania pasisuranan iate si Mordekhai ai aisegeake masibesiake masimateiake rimata siisiakenen Bigtan samba Teres, ruadra siabeu tiboi tubu sikokoi sijago bilik rimata.

³ Parerenangan rimata, “Panguruat samba puaabeu apa le atukau ka tubut Mordekhai nenda?” Alegirangannia sangamberi sipasikelinia, “Ta'pei anai ai silo.”

⁴ Iageti kuanangan rimata, “Kasei sipugagalaiku sibabara ka uma purimataat kineneiget?” Apasese simaruei le aituguru si Haman ka pugeranan lalep purimataat. Ai isiatnia masitidoou ka tubut rimata iobaake masitiggotnake si Mordekhai ka arigi selepa rioake nenda.

⁵ Alegirangan sangamberi sia pakoinien rimata nenda, “Ai si Haman ka uma purimataat samba ioba murio ka matat Tuan.” “Koiniake kam nia ituguru',” ngangan rimata.

⁶ Kele aituguru si Haman, kuanangan rimata ka tubunia, “Ai sirimanua pinaatuku kukau masiabeuakenia simakope beunan. Apa le geti kugagalai addeatnia?” Paatunangannia si Haman, “Ka tubut kaseian le ikakau pubebeunan si rimata? Bulatnia aku le!”

⁷ Kalulut nenda aleginangannia,

⁸ “Bui' ta tuala ka sirimanua nenda leppei pubebeunan simaturere ipakei Tuanku. Lepa kurot Tuanku tupalainge pasamba sangamberi tularat purimataat.

⁹ Sara sirimanua siabeu tiboi tubu ka purimataat abeuakenen bui' ta ileppeiake leppei nenda ka tubut sirimanua abeuakenen Tuanku nenda, lepa paenungake sirimanua nenda ai nia mukukuro' kurot Tuanku masienungi gerat laggai. Siabeu tiboi tubu nenda muboiki muenung ka matania samba ai gegereiake, “Kise te rimata masikau panguruat ka sara sirimanua abeuakenennia!”

¹⁰ Iageti kuanangan rimata ka tubut Haman, “Olaake, nuala' leppei samba kuro nenda samba kau le sangamberi pasiaabeuake nenda ka tubut Mordekhai, tai Jehudi nenda. Galaiake le kele sikuam nenda, bui' nubeleki berisara. Momoi nuailiakenia ai nia mukuddu ka matatbaliu gugurukat uma purimataat.”

¹¹ Lepa si Haman alanangan leppei samba kuro nenda samba leppeiakenangan leppei nenda ka tubut Mordekhai. Lepat aitusakai si Mordekhai ka kuro nenda, paenungakenangannia si Haman masienungi gerat laggai, samba ai gegereiake, “Itco, kise te rimata masikau panguruat ka sara sirimanua abeuakenennia.”

¹² Kele ailepa nenda toili si Mordekhai ka matatbaliu gugurukat uma purimataat. Tapoi si Haman geti olaakenangan itoili. Ta' ioba raitconia sirimanua kalulut kopet ailania, iageti tabbonangan matania.

¹³ Tiboinangan apa sigalaiakenennia ka tubut sinanalepnia samba sangamberi saaleinia. Lepa geti sinanalepnia samba sangamberi saaleinia simasiku paatuat nenda masikua ka tubunia, “Aitaddangan numakala puroron kai Mordehkai. Nia tai Jehudi samba ta momoi nulawannia. Bulatnia ikalaake le ekeu.”

Si Haman tuukum matei

¹⁴ Aipeile sia patitibo pasamba si Haman, oi sia simaola siabeu tiboi tubu ka uma purimataat masitaroake si Haman ka punen sibaraakenen Ester.