Est. 4 - BUKO SIPUNENAN

Si Mordekhai masitiddou paroman ka tubut Ester

¹ Ka teteret aiagainia si Mordekhai apa sipuaaili, biritnakenangan leppeinia samba leppeiakenangan komak goni sibailiu toggaiat reureu bagania. Karapmakenangan abu ka utenia, lepa puenungnangan ka laggai sialei sou sabeu nganga samba reureu baga.

² Ka ipot matatbaliu gugurukat uma purimataat puarinangan, aipoi sirimanua sipuleppei komak goni ta momoi tuguru'.

³ Kisedda leu ka sangamberi provinsi, kele ailepa aitusegeake parentat rimata sangamberi tai Jehudi musou. Pupuasorangan, musou samba mukatci, samba maigi ka talagadra masileppeiake komak goni samba merep ka abu.

⁴ Ka teteret taiokko samba sia siabeu tiboi tubu sikokoi sipasikeli Rimata Ester masisegeake ka tubunia apa sigalaiakenen Mordekhai, bulat mareureunangan bagat Ester. Kaunangan leppei kai Mordekhai silit leppei komak goni, tapoi ta ioba masisilo si Mordekhai.

⁵ Lepa geti si Ester sogainangan si Hatah, sara siabeu tiboi tubu sikoiniakenen rimata addeat masipasikeli si Ester. Koiniakenangan si Hatah masirere'ake ka tubut Mordekhai aponia bulat sipuaaili samba angoian le igagalaiake kele nenda.

⁶ Iageti ei si Hatah ka tubut Mordekhai ka gerat laggai ka ipot matatbaliu gugurukat uma purimatat.

⁷ Tiboinangan si Mordekhai ka tubunia apa sipuaaili samba piga pa bulagat perak ai palelek si Haman addeat guru'akenennia bule ituppai pukayoat rimata, lepat tumateiake sangamberi tai Jehudi.

⁸ Kaunangan leu et si Mordekhai ka tubut Hatah salinan surat rimata sibelaakenen ka Susan samba bagania parenta addeat masimateiake tai Jehudi. Koiniakenangan si Hatah masikau surat nenda ka tubut Ester samba masikolouake pagalaiat nenda ka tubunia, ialeu et ikoiniake si Ester bule iei itiddou murio ka matat rimata masitiddou pununtuat bagat rimata ka bangsania.

⁹ Lepa ei si Hatah kai Ester samba segeakenangan patonekat Mordekhai ka tubunia.

¹⁰ Tapoi koiniakenangannia minca kai Mordekhai pasamba patonekat nene,

¹¹ “Senen sirimanua, taimanteu kisedda leu tainanalep, sitaisosogaiet, tapoi murio ka matat rimata ka gerat ka bagat uma purimataat, bui' ta tuukum ukuman simateiakenen. Nenda iate undang-undang samba sangamberi sirimanua barania ka sipangantoman rimata teret ka tubut sirimanua simigi ka sangamberi provinsi, raagai pagalaiat nenda. Sarat sara le enungan tubela sibara ka undang-undang nenda, iate ke itotoiake tutura' masnia rimata ka tubut sirimanua nenda. Ke muali nenda, maaraunangan. Tapoi aiailingan sangalaggo nene ta ai sogai aku rimata.”

¹² Lepa segeakenangan si Hatah ka tubut Mordekhai patonekat Ester nenda.

¹³ Iageti kaunangan si Mordekhai repdemen nene kai Ester, “Bui' te ikua ka bagam kalulut kukuddum ka uma purimataat, sarat ekeu le maarau ka talagadra tai Jehudi!

¹⁴ Bulat rasesese le paroman tai Jehudi ka enungan bagei ibailiunia katuaragatdra. Tapoi ke mumengmeng le ekeu ka pagalaiat kele nene, matei le ekeu samba saepput ukkuinu sappru tiboi tubunia. Ta' taagai, bule kalulut kele nene bailiunangan ekeu Rimata!”

¹⁵ Iageti kaunangan si Ester katuareman nene ka tubut Mordekhai,

¹⁶ “Ruru'ake sangamberi tai Jehudi ka Susan addeat masipatiddouake aku. Bui' mukom samba mulo' kam telu ngagogoi samba telu ngasoibo. Aku leu et samba taiokko sipasikeli aku mupupuaso leu et geti. Lepa nenda puriokungan ka matat rimata geti, kenanen nenda masipasabau undang-undang. Ke kalulut nenda kumatei, eddangannia kumatei!”

¹⁷ Lepa ei si Mordekhai samba masigalaiake sangamberi sipatonet Ester ka tubunia.