Est. 3 - BUKO SIPUNENAN

Si Haman masipaatu imateiake tai Jehudi

¹ Pasat piga ngagogoi pa teterenia uddetnakenangan Rimata Ahasyweros sara sipuoni Haman ibailiu siabeu tiboitubu, si Haman iate togat Hamedata sibara ka muntogat Agag.

² Rimata masiparentaake sangamberi sipugagalainia bule rasuru' si Haman samba rapurappo ka matania. Sangamberidra masireddet parenta nenda, sarat si Mordekhai le ta amasireddet.

³ Sangamberi sipugagalai bagei ka uma purimataat masirere'ake ka tubunia angoi ipasasabau parentat rimata,

⁴ samba senen gogoi rimatabbuinia bule itututnake le, tapoi ta ioba masiarepmake. Kuanangan, “Aku tai Jehudi. Ta' momoi kupurappo ka tubut sirimanua.” Lepa segeakerangan pagalaiat nenda ka tubut Haman kalulut raoba raagai apa igagalai si Haman ka tubut Mordekhai.

⁵ Makope le golu si Haman ka teteret aiagai aipoi si Mordekhai ta ioba murappo ka tubunia.

⁶ Samba ka teteret aiagainia si Mordekhai nene sara tai Jehudi, teuakenangan masiukum si Mordekhai samba ta saratnia, tapoi ipamamatei leu et sangamberi tai Jehudi ka purimataat Persia.

⁷ Ka rura sika pulurua ka puparentaat Rimata Ahasyweros, ka laggo sara, iate ka laggo Nisan, pakoininangan si Haman ragalai pauktungan kuanen “Purim” bule tuagai gogoi samba laggo kaipa sipasese addeat tugalaiake pinaatunia sikatai nenda. Iageti teuakenangan tanggal pulutelu laggo pulurua, iate laggo Adar.

⁸ Iageti kuanangan si Haman ka tubut rimata, “Tuanku, ai sara bangsa simasasaragai samba siooiake ka senen provinsi purimataat nene. Katukelat puririmanuandra bulat mabaggei ka sangamberi bangsa bagei. Sangamberi surukat purimataat ta Rimatatutnake. Oto, Tuanku simaerunia bui' nuobaake ragalai siobat bagadra.

⁹ Ke' ta masaila ka bagat patuat Tuanku, bui' ta nubelaake surat parenta bule tumateiake sia. Samba ke Tuanku masisilo pinaatukku, bulat oinangan geti kuguruake 340.000 kilo legei perak bule ituppai pukayoat Tuanku.”

¹⁰ Masiarep nenda, goloknangan ka singongainia sipsip pakeietnia masicap sangamberi segeakenen, iageti kaunangannia ka tubut Haman, saggakdra tai Jehudi.

¹¹ Kuanangan rimata ka tubunia, “Bangsa nenda samba leu et bulagatnia kuake ka tubum. Galaiakean le apa sipinaatum simaeru katubutda.

¹² Iageti ka gogoi sikapulutelu laggo sara, sogainangan si Haman tai sekretaris rimata. Koiniakenangan sia masigalai surat siripot sangamberi siparentaakenennia, lepa ngangaakerangan surat nenda ka sangamberi nganga samba salindrangannia ka sangamberi surat pakeiet ka purimataat nenda. Surat nenda tugalai ka onin Rimata Ahasyweros samba tucap pasamba sipsipnia.

¹³ Lepa tukau simaola katubutda sia sibara gege, gubernur samba siabeu tiboi tubu ka sangamberi provinsi. Bagat surat iate parenta ka tanggal pulutelu laggo Asdar, sangamberi tai Jehudi, simabaja kisedda leuet sibau tubu, tainanalep kisedda leuet tatoga, bui' ta tumateiake samba tusubuake sia, samba turaurau sangamberi pukayoatdra.

¹⁴ Bui' ta tupaagai parenta nenda ka senen provinsi bule sangamberi sirimanua matarek ka gogoi siteuakenen.

¹⁵ Putuituirangan sia sapakoinien simaola masitaroake sangamberi surat nenda ka sangamberi provinsi purimataat. Ka koinin rimata, tupaagai leu et ka Susan inan laggai Persia parenta nenda. Kele ai lepa nenda purusarangan rimata samba si Haman sialei mulo' anggur, tapoi laggai Susan amugaugauan kalulut katuareman nenda.