Est. 1 - BUKO SIPUNENAN

Rimata Sinanalep, Wasti masisaggangi parentat Rimata Ahasyweros

¹ Ka Susan inan laggai Persia, si Ahasyweros muparenta sibailiu rimata.

² Kupkumen purimataatnia aili sangotu ruapulupitu provinsi, barania ka India aili ka Sudan.

³ Ka rura sika telunia puparentaatnia, baraakenangan punen sabeu Rimata Ahasyweros addeat sangamberi sabeu tiboi tubu samba sipugagalai ka purimataatnia. Sia saute pasaggak ka Persia samba Media ai leu et sia ka punen nenda, kisedda leu et sia tai gubernur samba sia siabeu tiboi tubu ka provinsi.

⁴ Enem ngalaggo ujunia rimata masitoilaake pukayoat lalep purimataatnia samba katuumunan samba leu pubebeunan purimataatnia.

⁵ Kele ailepa nenda baraakenangan minca punen si rimata addeat sangamberi sirimanua sipulalaggai ka Susan, simakayo samba leu simageba. Punen nenda sangamenggui burunia aragalaiakenia ka gerat uman rimata.

⁶ Gerat uma purimataat kaurangan komak kekre simaalit baga simasurou samba simabulau, apprarangannia tali simabulau simaalit samba pasakkutrangannia ka sangamberi letcu perak sikaura ka arigi marmar. Kaurangan ka teinia parate mas samba perak ka bagat lalep sibara pulaingean marmar simabulau, hablur simabonan, kulit mutiara simakirisau samba bukku pirus simasurou.

⁷ Tattannakenangan anggur simigi si rimata sitatatnakenen ka bagat pulokat mas sabeu sene ngamata katugalaijatnia.

⁸ Sia tai rauma ta tutetetreake anggurnia samba leu ta tutubbui mulo'. Aikauan parenta rimata katubutda sipasikeli uman purimataat, bule rapasikeli senen tai rauma siripot sioba'ra sene-senendra.

⁹ Ai leu et kai Wasti, sinanalep rimata, igalaiake punen addeatda tainanalep ka bagat uma purimataat.

¹⁰ Ka gogoi sika pitu, pulonangan rimata pat againangan puaangka baga simakope. Kalulut nenda sogainangan si pitu siabeu tiboi tubu sikokoi sibailiu sipuukunia. Sia nenda iate Mehuman, Bizta, Harbona, Bigta, Abagta, Zetar samba Karkas.

¹¹ Koiniakenangan sia masiabbit ka matania Ratu Wasti sibara kirit purimatat ka ute'nia. Makope lainge le si Rimata, samba rimata bulat ioba masipatoila laingen tubunia katubutda sia siabeu tiboi tubu samba sangamberi tai raumania.

¹² Tapoi ka teteret sia sipugagalai nenda masisege'ake parentat rimata ka tubut Ratu Wasti, ta ioba moi si Rimata, bailiunangan makope golu rimata.

¹³ Ai katukelat rimata masitiddou pinaatutdra sia siagai pagalaiat surukat samba arat katukelat. Kalulut nenda sogainangan sia singantomanakenia siagai apa bulat galaiakenen ka pagalaiat kele nenda.

¹⁴ Sia sipangantoman simakope reirei isogai rimata iate: Karsena, Setar, Admata, Tarsis, Meres, Marsena samba Memukan. Sia iate siabeu tiboi tubu ka Persia samba Media siuddeni kudduat bulat simabuak ka purimataat.

¹⁵ Kuanangan rimata ka tubut si pitu sirimanua nenda, “Aku koiniakean sipuuku aku ka tubut Ratu Wasti bule masikoiniakenia ioi katubukku. Tapoi ta ioba. Siripot surukat, aponia “tagagalaiake ka tubunia?”

¹⁶ Iageti kuanangan si Memukan ka tubut rimata samba ka siabeu tiboi tubu, “Ka sigalaiakenen nenda, ta leu saram tuan aipaloloi si Ratu Wasti, tapoi sia leuet sangamberi sipugagalai Tuan, pat leu aili senen sirimanua taimanteu ka purimataat nene!

¹⁷ Kalulut sigalaiakenen Rimata nenda raagai geti sangamberi tainanalep, samba putata'rangan te geti taimanteura. Kuarangan te geti mandeat si Tuan masiparentaake Ratu Wasti bule murio ka matat Tuan, tapoi si Ratu ta ioba moi.

¹⁸ Oto, ke sangamberi tainanalepdra sia siabeu tiboi tubu ka Persia samba Media masiarep pagalaiat nenda, bulat raolaake le rapaagainia ka tubut simanteura. Kalepakatnia iate, sinanalep masilawan geti parentat simanteunia samba simanteu masigolu geti sinanalepnia.

¹⁹ Oto kalulut nenda, panindogatmai bule Tuan masiteuake; Ratu Wasti ta'an momoi ipurio minca ka matat Tuan. Siteuakenen nenda bui' ta tubailiuakenia undang-undang Persia samba Media, bailiu ta an momoi tuburau minca. Ke' alepaan nenda, kaunungan uddenan Ratu Wasti ka tubut tainanalep bagei sisaliu erunia.

²⁰ Ke siteuakenen Tuan nenda amararatnan ka sangalio purimataat simalio nene, senen sinanalep masisuru' simanteunia geti, mageba ele makayo.”

²¹ Sikuat Memukan nenda pasese ka bagat rimata samba sia siabeu tiboi tubu, iageti galaiakenangannia simaola rimata.

²² Kaunangan surat parenta ka sangamberi provinsi purimataat, ka ngangan samba ka surat sene-senen provinsi nenda. Parenta nenda ngangania kise, ka bagat senen sipulalalep, simanteunia le bui' ta ibailiu ute', samba simanteu masiala sangamberi teuakenen.