EPESUS 6 - BUKO SIPUNENAN

Tatoga samba saeppu

¹ Kam tatoga, reddet kam eppumui ka bagat Tuhan; kisedda poi siripokatnia.

² “Suru ukkuinu samba inam” ia te surukat siboiki sibara palelengan,

³ “Bule numauktuk samba imauju nupurimanua ka polak.”

⁴ Samba kam saukkui, bui nupangoingoi kam bagada tatogamui, urau le kam sia ka bagat pajigiat samba nganturat Tuhan.

Pagugulet samba tuan

⁵ Kam sapagugulet, reddet kam sia tai tuanmui ka polak ka bagat loto samba geret tubu samba ka linat paatuat kele ka tubut Kristus,

⁶ bui sarat itcoket paalakat baga, tapoi kele pagugulet Kristus le sigalaiake siobat bagat Taikamanua sibara ka paatuat,

⁷ samba simaoba mugalai kele ka tubut Tuhan, ta kele ka sirimanua.

⁸ Nuagai kam, senen sirimanua ele pagugulet, ele sipuuja, ke igalai apa pa simaeru, isisilo silinia sibara kai Tuhan.

⁹ Samba kam tai tuan, galai kam kisedda ka tubuda samba ariake kam patetenan; nuagai poi kam sia sambamui ai Tuhanmui ka sorga, samba ta iiggat sirimanua.

Pamatei puketsanan

¹⁰ Pasilepania, kau numaron kam ka bagat Tuhan, samba ka bagat ron gegenia.

¹¹ Pakei kam sangamberi pamatei Taikamanua, bule nuom kam masisaggangi pajoat Sanitu.

¹² Aipoi pasagganganta ta masisaggangi sirimanua, tapoi masisaggangi sapamarenta, masisaggangi sibara gege, masisaggangi sautet polak simagepgep nene, masisaggangi paketsatketsat sikatai ka tanairusa ka pata.

¹³ Ia te lulunia ala kam sangamberi pamatei Taikamanua, bule nuom kam pasaggak ka gogoi sikatai nenda samba nyung le nupurio kam, lepa nukalaake kam sangamberinia.

¹⁴ Oto purio kam, muakkiktenga pubulanan samba muleppei laba puroipoat,

¹⁵ reremui mukasu ngamang masipaarep Katuareman Simaeru pagalaiat paabanan.

¹⁶ Ka sangamberi sibabara pakei kam tonem baga korabbimui, kalulut korabbi nenda poi momoi nupeake kam silogui sibara api sipanaakenen Sanitu.

¹⁷ Samba silo kam tutu laba puaragat samba lanjau Ketsat, ia te tiboiet Taikamanua.

¹⁸ Sangamberinia galaiake kam ka bagat panindogat masitiddou paroman Taikamanua. Panindou kam senen tetere ka bagat Ketsat, samba mumata ka bagat panindogatmui sitaitetektek masitiddouake sia sipunenan.

¹⁹ Samba aku leu tiddouake kam, bule ke kubuka ngungungku, panguruatnakenangan Taikamanua kaku tiboiet simaipo, samba ka bagat eme kupaarep keleat Katuareman Simaeru;

²⁰ ka bagat masipasikeli nenda te aibailiu aku pakoiniet sipenjaraakenen. Tiddouake kam aku, bule kumaeme masitiboake nia kipa simateu.

Pasilepa samba salam

²¹ Tapoi bule nuagai kam pagalaiat sibabara ka tubuku samba galajetku, sangamberinia ai leu isegeake nia si Tikhikus, sarainanta kilibet baga samba sipugagalai simatopit ka bagat Tuhan.

²² Ia te akukoiniake nia ka kam, bule nuagai kam sibabara ka kai samba ipusuibi bagamui.

²³ Aban le ka sangamberi sasaraina, samba nuntut baga sialei tonem baga sibara ka Taikamanua Ukkui samba sibara kai Tuhan Jesus Kristus.

²⁴ Kiliu baga masipaalei sangamberi sipununtuki baga Tuhanta Jesus Kristus, nuntut baga sitaitatata.