EPESUS 5 - BUKO SIPUNENAN

Muparaboat siripot tatogat pato

¹ Oto kau ibailiu kam sipasitutut Taikamanua, kele tatoga kanuntuat baga,

² samba murimanua ka bagat nuntut baga kele punununtukina kam baga Kristus samba bubuluakena tubunia punu tubuta bailiu pusurakat samba buluakenen simasingin ka Taikamanua.

³ Tapoi puumunan samba sene ngamata pulolinan ele alau baga, beringan masikua oninia buian ibara ka talagamui siripot simateu ka sirimanua sipunenan.

⁴ Kisedda leu et tiboiet simalolit, tiboiet si ta galai samba si ta paraboat – sangamberinia nene ta pasese –, bailoknia pusurakat le kuanen.

⁵ Aipoi repdep kam nene: Senen sipuuumun ele sigalai pulolinan ele simaalau baga (sipanindogi buluat le poi nia), ta anai ikemennia ka Purimataat Kristus samba Taikamanua.

⁶ Bui rapepeake kam kasei pa kalulut tiboiet si ta galai, kalulut nenda poi ibabara golut Taikamanua ka tubuda tatoga sitaimareddet.

⁷ Oto bui nupaaleiake kam sia.

⁸ Siburu simagepgep le kam, kineneiget geti patoan le ka bagat Tuhan. Oto kau siripot tatogat pato nupuparaboat kam,

⁹ aipoi buat pato ia te sangamberi puerukat samba puroipoat samba pubulanan;

¹⁰ samba sibo le kam apa siobat bagat Tuhan.

¹¹ Bui nututnake kam mugalai galajet pugepgeman siboboi, bailoknia aseake le kam.

¹² Aipoi sangamberi sigalaira ka simalipput, beringan masitiboi bulat kailaakenen.

¹³ Tapoi sangamberi sinoroijit pato bailiu matoila;

¹⁴ aipoi sangamberi simatotoila ia te pato. Ia te lulunia aikua, “Pumatangan ekeu simauuneng, suruakean ekeu ka simamatei, ia geti toroijinangan ekeu Kristus.”

¹⁵ Pagaba kam sipulelelek puririmanuamui, bui kele sitaiagai paatuat, tapoi kele siagai paatuat le,

¹⁶ samba bui nupasibbu kam tetere, aipoi tetere kineneiget tetere sikatai le.

¹⁷ Oto bui ibailiu kam taiagai paatuat, tapoi besiake le kam nuagai kam siobat bagat Tuhan.

¹⁸ Samba bui ipapuineng kam anggur, sikau kam makatai le poi; tapoi kau le isutnake kam Ketsat Sipunenan,

¹⁹ samba patibo kam pasasambamui ka bagat ngangan psalmen, urai pasiumun samba puketsanan. Uraiji samba umunake kam si Tuhan ka sangamuinet paatuatmui.

²⁰ Kau imariuriu nusuraki kam Taikamanua Ukkuita kalulut sangamberinia, ka onin Tuhanta Jesus Kristus!

Nuntut bagat Kristus le bongen pulalalep

²¹ Kau nupaepe kam tubu pasasambamui ka bagat loto ka Kristus.

²² Kam tainanalep, pusum kam ka taimanteumui kele kai Tuhan,

²³ simanteu poi ute ka sinanalep, kele Kristus ute ka paamian; samba nia leu Sipaarau paamian, ia te tubunia.

²⁴ Kalulut nene kele purereddet paamian ka Kristus, kisedda leu et sinanalep ka simanteu ka bagat sangamberinia.

²⁵ Kam taimanteu, pununtuki kam baga tainanalepmui, kele punununtukina baga paamiannia Kristus samba bubuluakena tubunia punu tubuda,

²⁶ samba masipuneni nia, lepa aipalina nia ka pasirarauake oinan sialei tiboiet,

²⁷ bule simalatsat le paamian irioake nia ka matania, si ta lolit ele ngutsut ele apa pa bagei, tapoi bule sipunenan le samba si ta loloiet.

²⁸ Kisedda leu simanteu buita ipununtuki baga sinanalepnia kele tubunia. Sipununtuki baga sinanalepnia, tubunia le aipununtuki baga.

²⁹ Aipoi beri sara sirimanua sipulagaki baga tubunia, tapoi iurau le samba ipasikeli, keleu Kristus ka paamian,

³⁰ aipoi laddou tubunia le sita.

³¹ Ia te lulunia ikakaddiuake ukkui samba inania simanteu, iloplopmake tubunia ka sinanalepnia bailiunangan sia sangaakkula.

³² Bulat abeu le pakeleat nene, tapoi pagalaiat patabbarat Kristus ka paamian le kuanenku nene.

³³ Tapoi ka kam leu et senemui, kau ipununtuki baga sinanalepnia kele tubunia, samba sinanalep kau leu isuru simanteunia.