EPESUS 2 - BUKO SIPUNENAN

Barania ka kamateiat mei ka purimanuaiat

¹ Kam leu siburu amateian kam kalulut pasisasabau samba jomui,

² ia te pupaparaboatmui ka teteret nenda nututnake kam enungan polak nene, lulut nureddet kam rimata sipaneinei tanairusa, ia te ketsat sipugagalai kineneiget ka talagada sirimanua sitaimareddet.

³ Beri sita leu siburu sangamberita makere kele sia ai pei le sita mupaparaboat ka bagat botbot akkula samba paatuat sikatai. Pugolukiet le sita siripokatnia, makere kele sia sabagei.

⁴ Tapoi Taikamanua sipulukatet baga, ka beunan nuntut bagania ipununtuki sita,

⁵ airimanuaakean sita pasamba Kristus, kenanen amateian sita kalulut seleta – kalulut kiliu baga le anutuarau kam –

⁶ samba airimanuaakean sita ka bagat Kristus Jesus samba ikau sita mukuddu pasamba nia ka sorga,

⁷ bule ipatoila ka tetere sibabara kayot kiliu bagania sitaimagulai, siripot erut bagania ka sita ka bagat Kristus Jesus.

⁸ Sibara ka kiliu baga le aituarauake kam, lulut tonem baga, ta sibaraakenenmui, panguruat Taikamanua le;

⁹ ta buat sigalaimui, bui iumun tubunia kasei pa.

¹⁰ Sigalai Taikamanua le poi sita nene, sibaraakenennia ka bagat Kristus Jesus masigalaiake galajet simaeru, sinarekngakenen Taikamanua kirenangan, bule tapuparaboat ka bagania.

Musara ka bagat Kristus

¹¹ Oto repdep kam, siburu sipuarat sabulungan le kam siripot akkula, oniakenen sitaipususunat rakua kam sia sioniake tubuda “sunat,” ia te sunat akkula sigalai kabei sirimanua, –

¹² ka teteret nenda sitaipuki – Kristus le kam, ta tuaddeake kam warganegara Israel samba ta mueneu kam ka palelengan sinibalaakenen, si ta anai karonan samba si ta Taikamanua le kam ka polak nene.

¹³ Kineneiget geti ka bagat Kristus Jesus, kam “simareunan” siburu, aibailiuan “malegere” kalulut logau Kristus.

¹⁴ Kristus poi paabananta, sikau sita bangsa Jahudi samba bangsa bagei bailiu musara samba siragatnake kekere pasaraat, ia te pasaggangan.

¹⁵ Aipoi ka bagat kamateiatnia ka pusisirimanuania aitataakean Surukat samba sangamberi patonekat samba aturan, masibailiuake sirua bangsa nene bailiu sara sirimanua sibau ka bagat tubunia, ibaraake paabanan,

¹⁶ samba ipaeru sirua bangsa nene ka bagat sara tubu ka Taikamanua kalulut loina siliktenga; ka siliktenga nenda poi aitataake pasaggangan.

¹⁷ Samba moi leu nia masipaarep aban ka kam “simareunan” samba aban ka sia “simalegere”;

¹⁸ kalulut nia poi sita rua ngasilania (Jahudi samba ta Jahudi) ka bagat sara Ketsat oi tatagetnake Ukkui.

¹⁹ Oto taan sitoi ele siooiake kam, taikalaggaiatdangan le sipunenan samba sikauman Taikamanua,

²⁰ sirioakenen ka bongenda tai apostel samba tai nabi; bukkut taiming geti ia te Kristus Jesus.

²¹ Ka bagat tubunia muurau sangalio lalep, tupalakke bailiu uma sipunenan ka bagat Tuhan.

²² Kam leu ka bagat tubunia le aiturioake bailiu pukudduat Taikamanua ka bagat Ketsat.