EPESUS 1 - BUKO SIPUNENAN

¹ Sibara kai Paulus, apostel Kristus Jesus kalulut teu bagat Taikamanua, masiailiake sia sipunenan ka Epesus, simatonem baga ka Kristus Jesus.

² Kiliu baga samba aban ka kam sibara ka Taikamanua Ukkuita samba sibara kai Tuhan Jesus Kristus masipaalei kam.

Panukanan puketsanan kalulut Kristus

³ Tuumunake le Taikamanua, Ukkui Tuhanta Jesus Kristus sipanguruatnake ka sita sene ngamata panukanan puketsanan sibara ka sorga ka bagat Kristus.

⁴ Aipoi enan tapei abara polak aipilingan sita Taikamanua ka bagat Kristus, bule ibailiu sita sipunenan samba si ta loloiet ka matania. Ka bagat nuntut bagania,

⁵ kirenangan aiteuakean ka bagat Jesus Kristus ibailiu sita tatogania, siripot siobat bagania,

⁶ bule tuumunake beunan kiliu bagania sipanguruatnakenennia ka sita ka bagat Togania kilibet bagania.

⁷ Ka bagat Kristus poi kalulut logaunia aibara ka sita panebuiat, ia te katuappekat jo, siripot kayot kiliu bagania,

⁸ siuruakenennia ka sita ka bagat sangamberi sikut paatuat samba puaagai kolou.

⁹ Aipaagaian poi ka sita keleat isiatnia, siripot siteuakenennia kappuluakenennia ka bagat Kristus.

¹⁰ Isiat nene kappuluakenen Taikamanua ke aiailingan teterenia, ia te masiruruake sangamberi sikuddu ka sorga samba sikuddu ka polak muute ka Kristus.

¹¹ Ka bagat Kristus leu ikau sita mueneu ka sangamberi palelengan, sita sikokoiakenen ka panandaatnia pei le manilo rubeiat siripot isiat Taikamanua sigalaiake sangamberinia siripot teu bagania,

¹² bule sita, sipukakaronan ka Kristus ka panandaatnia pei le, ibailiu katuumunan pulatsanannia.

¹³ Kam leu, amatoneman bagamui ka Kristus ka teteret anuarep kam tiboiet pubulanan, ia te Katuareman Simaeru puaragatmui, oto aitoggaijingan kam Taikamanua Ketsat Sipunenan sinibalaakenennia.

¹⁴ Ketsat Sipunenan ia te sibulatnake pururubeiatta, teret tasilo sangamberinia, ia te panebuiat sibailiuake sita bakkatiet Taikamanua, pasiumun pulatsanannia.

Panindogat Paulus

¹⁵ Ia te lulunia, kele akuarep pagalaiat tonem bagamui kai Tuhan Jesus samba pagalaiat nuntut bagamui ka sangamberi sipunenan,

¹⁶ taan amuari kukua sura kalulut kam. Samba sarat kurepdep le kam ka panindogatku,

¹⁷ kutiddou ka Taikamanuan Tuhanta Jesus Kristus, Ukkui simalatsat, bule iake ka kam Ketsat pusikuat samba pamoilianan masiagai nia simakolou.

¹⁸ Samba bule ipatoake matat paatuatmui, ioi nuagai kam aponia karoniet ka bagat pasogaiatnia, kipa kayot pulatsanan kaunennia ikepmakenenda sia sipunenan,

¹⁹ samba kopet beunan gegenia ka sita simatonem baga, siripot ron gegenia,

²⁰ sigalaiakenennia ka bagat Kristus aisuruake nia ka simamatei samba aiuddetnake nia kai kattoetnia ka sorga,

²¹ sisaliu buakra sangamberi pamarenta samba simagege samba saute samba tai tuan samba senen oni siooi tukua, ta sarat ka polak nene, tapoi samba leu ka polak sibabara geti.

²² Samba sangamberinia aikauan Taikamanua ka tei reret Kristus, samba aikauan nia bailiu ute ka sangamberinia ka paamian.

²³ Paamian ia te tubunia, katusunannia, sisutnake sangamberinia ka bagat sangamberi.