Dan. 9 - BUKO SIPUNENAN

Panindogat Daniel

¹ Ka rura siboiki puparentaat Darius, togat Ahasyweros, sibara ka muntogatda tai Media, sibailiu rimata ka purimataatda tai Babel.

² Kateteret nenda aku, Daniel, basakungan sangamberi buko sipunenen. Siripot tiboiet Tuhan katubut nabi Jeremia Jerusalem ibailiu le geti siragatat pitu pulungarura burunia.

³ Lepa mattaikungan ka matat Tuhan Taikamanau, manindou samba mupuaso samba leu masipakei komak goni, samba mukuddu kauddut abu.

⁴ Lepa panindoukungan katubut Tuhan Taikamanuangku, masiseseake joku, kise, “Oi Tuhan Taikamanua, siabeu le Ekeu, samba kusuru' le kai Ekeu. Nusunnake le palelenganNu samba nupatoila le nuntut bagam katubutda sipununtuki Ekeu baga samba sigalaiake siparentaakenenNu.

⁵ Akugalaian jo samba sele. Akugalaian kai pukakatai samba ta amareddet kai. Akupasabauan kai parenta samba surukatNu.

⁶ Ta amareddet kai ka sapaguguletNu, ka tai nabi, sipaninibo kabagat onim katubutda tai rimatamai, ka sautemai, ka taikebbukatmai samba ka tai kalaggaiatmai.

⁷ Oi Tuhan, Ekeu le sineseat, tapoi mateu le kumaila kai kele kagogoi nene. Kai iate tai Jehuda, sipulaggai ka laggai Jerusalem, samba sangamberi tai Israel, sikuddu ka leggre samba ka sareunan, ka sangamberi laggai anuribbaiake kai kalulut taimaredetmai katubum.

⁸ Oi Tuhan, kai, tai rimatamai, sautemai, taikebbukatmai mateu le amaila kalulut akugalaian kai jo ka matam.

⁹ Ekeu le sisun pununtuat baga samba katuappekat, kenanen akusaggangingan kai Ekeu.

¹⁰ Ta akuarepi kai ngangam, Tuhan Taikamanua mai, sikoiniake kai murimanua siripot sangamberi surukat siakeNu katubumai, sinegeakenennu ka tai nabi samba sapaguguletNu.

¹¹ Sangamberi tai Israel arapasabauan surukatNu samba ta amareddet sia ta araarepi ngangam. Anuorakakean katubumai telei samba suppa, siripot sitususurat kabagat Buko Mose, paguguletNu nenda, kalulut akugalai ka jo katubum.

¹² Aironnakean tiboietNia, sinegeakenenNu katubumai samba ka sautemai. TiboietNu nenda masikua katubumai, Nubabaraake te pugejaat baga sabeu sitapei amuaili ka polak kele sipuaaili ka Jerusalem.

¹³ Kele sitususurat ka Bukot Mose, sangamberi pugejaat baga sabeu siorak kai nene. Tapoi kenanen kisedda, ta akutiddou kai pukatekat bagam, muolei baga ka sangamberi puseleatmai samba masipuletsei surukatNu.

¹⁴ Kalulut nenda nupatarek le pugejaat baga samba orakakenungannia katubumai; kalulut Ekeu iate simaroipo ka sangamberi sigalaiakenenNu.

¹⁵ Oi Tuhan Taikamanuamai, sipasiambit pamianNu bela ka laggai Misir kabagat gege. Gegem nenda mariuriu le turepdep. Amajongan samba amaselengan kai.

¹⁶ Oi Tuhan, siripot katet bagam, eddangan itusabau golu sabeu samba pateleijatNu ka Jerusalem, laggaiNu, leleuNu sipunenan; kalulut jomai samba puseleatda taikebbukatmai, iageti Jerusalem samba paamianNu aibailiuan paloloiet ka sangamberi sirimanua sigoilik kai.

¹⁷ Kalulut nenda, oi Taikamanuamai arepi le panindogat samba tiddoget paguguletnu nene. Toroiji le umam sipunenan simararagat nenda, kabagat torot matam kalulut Ekeu.

¹⁸ Oi Taikamanuangku, tongiake talingam samba arepi, bukaake matam samba itco katusubuatmai samba laggai oniakenen kabagat onim, ta kalulut putotopimai, tapoi kalulut sun pununtuat bagam le.

¹⁹ Oi Tuhan, arepmake le! Oi Tuhan appeake le! Oi Tuhan lelekake samba galaiake le simaola! Aipoi Ekeu le Taikamanuangku, kalulut laggai samba paamianNu oniakenen kabagat onim!”

Pitupulu ngaminca pitu tetere

²⁰ Aipeile aku maninibo samba manindou, masiseseake joku, jotda taikalaggaiatku samba jot Israel, samba masisegeake ka matat Tuhan, Taikamanuangku, bule itoiliake minca ka erukat umaNia sipunenan.

²¹ Aiaku maninindou tuburutnangan simaola si Gabriel ka ipoku, siitcoku siburu kapasiitcot mata keteteret masipanguruatnake buluakenen kasoibokat.

²² Lepa gelaiakenangan aku samba panibonangan katubukku: “Daniel, kineiget amoian aku masiake pusikuat paatuat puaagai katubum.

²³ Kateteret anutaddaake masisegeake panindogat ka Taikamanua akenangan leu alegiat. Oto oi aku masisegeake katubum, kalulut ipununtuki le ekeu baga Taikamanua. Oto arepmake simakolou tiboiet nene nenda samba lelekake siitcot mata nenda!

²⁴ Pitu pulungaminca pitu ngarura iate tetere siteuakenen Taikamanau masibelaake taikalaggaiatmui samba laggaimui sipunenan nenda ka pukakatai, addeat masitataake jo, masilepaake jo, masiposa puseleat, addeat masiparon puroipoat sitaitatata, masisunake pasiitcot mata samba pasitutuptup samba masisukatnake uman Tuhan sipunenan nenda.

²⁵ Oto agai samba lelekngake: Ai tetere pitungaminca pitungarura barania aitubelaake parenta tupaeru minca Jerusalem teret oinia sara ute sipilit Taikamanua. Enem pulurua ngaminca pitu ngarura burunia tupaeru minca Jerusalem, enungan samba sopak, tapoi tetere nenda sun le pugejaat baga.

²⁶ Kapangampulat tetere nenda ute' sipilit Taikamanua nenda tubeleake le geti, kenanen taanai selenia. Iageti oi saladdut sara rimata simage'ge. Pakatainangan laggai Jerusalem samba Uman Tuhan, tapoi rimata nenda matei le nia ka eba sabeu. Pat aili ka kalepakat polak mariuriu le pasaggangan samba katusubuat, kele siteuakenen Taikamanua.

²⁷ Rimata nenda igalai le geti palelengan ibailiu masane pasamba sirimanua simigi burunia sangaminca pitungarura. Ka paoggangan tetere nenda, iariake le geti buluakenen samba panguruat. Lepa geti sara bulat kalotoakenen oniakenen Pukakatai sipasiraragatake tugalakake le geti ka Uman Tuhan samba mariuriu le ikuddu sedda teret sipasigagalakenia sedda ioraknia katusubuat siteuakenen Taikamanua ka sia.