Dan. 8 - BUKO SIPUNENAN

Biribiri simanteu samba kambing simanteu

¹ Ka rura sikatelu puparentaat Rimata Belsyazar, aku, Daniel, bara itcot mataku sikarua.

² Itcokungan ka itcot mata nenda, kele ai aku ka bebet bagat oinan Ulai, ka irip laggai ka Susan, ka kupkupmen laggai Elam.

³ Kele akutegglaake uteku itcokungan, sangamuneng biribiri simanteu aimuririo ka bebet bagat oinan nenda; bannia rua samba ka rua ban nenda mananta, tapoi sara makope mananta, samba simananta nenda mututu sikateitei.

⁴ Itcokungan biribiri simanteu nenda isukkaiake bannia ka isit kabelekat sulu, ka bare' samba ka kaiaman, samba berisara tarimeu moi masikalaakenia, samba taanai siooi sibebela katubunia; igalai le siobat bagania samba bailiu iabeuake tubunia.

⁵ Tapoi kateteret ailelelekakenia, makoinongnangan sangamuneng kambing simanteu moi barania ka isit ka kabelekat sulu, masiriringi sangaliot polak samba taanai ipepera polak. Kambing simanteu nenda ai sara bannia kiseiet ka paoggangan matania.

⁶ Kambing simanteu nenda masilegeri biribiri simanteu si rua ban siitcoku sipurio ka bebet bagat oinan nenda. Lepa laba'nangan biribiri simanteu nenda kabagat gegenia.

⁷ Itcokungannia ilegeri biribiri simanteu nenda; paemangnangan, lepa sukkaiakenangan bannia ka biribiri nenda. Iageti bakbakakenangan ka rua bannia, samba biribiri simanteu nenda taan amoi katubunia ipalabakinia. Lisoakenanngannia ka polak, paperakinangannia samba taanai siropmake biribiri simanteu nenda.

⁸ Kambing simanteu nenda memei mabebeu, tapoi kateteret aimakope buak pubebeunannia, mabakbaknangan bannia sabeu nenda. Lepa geti ka kudduat ban nenda putu'tunangan epat ban kiseiet, senen ban nenda ta makere iponia.

⁹ Iageti sara katalagat ban nenda tu'tu sara ban sigoiso. Ban nenda bailiunangannia memei mabebeu samba gegenia siaili ka isit kaiaman, kebelaiat sulu samba ka isit polak bulat simalainge.

¹⁰ Ban nenda memei mabebeu, pat ailinangan ka saladdu ka manua, iate panyanyat. Beringan leu piga pa katalagatda ribbaiakenangan sia ka polak samba paperakinangan sia.

¹¹ Beringan ka Utet saladdu ka manua leu iabeuake tubunia. Alanangan leu katubut Utet saladdu nenda panguruat buluakenen sisenen gogoi, samba uman panindogat Utet saladdu nenda bukkatakenangannia.

¹² Lepa geti sangamberi sirimanua sikuddu sedda taddarangan mujo samba taan arapanguruatake buluakenen siteuakenen nenda. Oto enungan puaranan simaeru aturibbaiakean ka polak. Ban nenda isilo le kamanangan ka sangamberi galaiakenennia.

¹³ Lepa geti arepkungan ipanibo malaikat, samba samalaika bagei masikua: “Pigangan le burunia katuriuriugat sangamberi simatotoila kabagat pasiitcot mata nenda” Teret pigamoian le ragalaiake jo sibailiu sili rapanguruatake buluakenen sisenen gogoi? Teret pigamoian le saladdu ka manua samba uma sipunenan nenda rapaperakinia?”

¹⁴ Iageti aleginangannia sara malaikat bagei, “Aile sangaribu sangotu lima puluh ngagogoi. Lepa geti uma sipunenan nenda tupaeru minca kele simatukle.”

Malaika Gabriel masikolouake katukolobat siitcot mata nenda

¹⁵ Kateteret aku, Daniel, masiitco itcot mata nenda samba masibesiake masiagai katukolobatnia, iageti sinulut itcokungan sara sipuririo ka kamataku, putubuatnia kele sara simanteu;

¹⁶ samba arepkungan katalagat bagat oinan Ulai nenda ngangan sirimanua sipusosoga: “Gabriel, kolouake katubunia katukolobat itcot mata nenda.”

¹⁷ Lepa oi si Gabriel ka kudduat puriokatku, samba kateteret aioi, tugegekungan samba bele aku sipululukke. Lepa kuanangan katubukku: “Bule nuagainia, togat sirimanua, itcot mata nenda iate pagalaiat kalepakat polak!”

¹⁸ Ainia maninibo katubukku, kalapuinangan samba bele aku sipululukke ka polak; tapoi ukkaakenangan aku samba ropmakenangan irioake aku minca.

¹⁹ Lepa kuanangan, “Kupaagai le katubum apa sipuaaili geti lepat ipugolu Taikamanua. Kalulut siitcot matam nenda iate pagalaiat kalepakat polak.

²⁰ Biribiri simanteu siitconu nenda, sibara rua ban, iate masitularatake tai rimatatda tai Media samba Persia.

²¹ Kambing simanteu nenda masitularatnake purimataat Junani, samba ban simananta kaoggak rua matania nenda iate rimata siboiki.

²² Ka epat ban situoottou lepat aimabakbak ban siboiki nenda, katukolobatnia purimataat Junani iparurubei te geti bailiu epat purimataat, tapoi ta kele ron purimataat sipuboboiki nenda.

²³ Kepei iaili kalepakat purimataatda, ke pujojotda nenda asutnan, iageti ottou sara rimata simakela paatuat samba siagai pataju.

²⁴ Bailiunangan le geti nia simaron, tapoi ta kele ron sirimanua sipuboboiki. Ibabaraake te geti katusubuat kalotoakenen samba sangamberi sigalaiakennia geti bui ta muaili. Isusubuake le geti sangamberi sirimanua sibara gege samba leu paamian Taikamanua.

²⁵ Kalulut agai patuat samba patajuatnia, sangamberi patajuatnia tueeddet; ibuakake le patuatnia, samba taisusuksungen maigi geti sirimanua isubuake. Beringan rimata ka sangamberi rimata leu maro bagania isaggangi. Masusubu le geti nia, tapoi ta' ka geget sirimanua imasusubu.

²⁶ Itcot mata kapagalaiat kasoibokat samba simanceman sikolouakenennia katubum nenda bulatnia muaaili. Tapoi pakele le itcot mata nenda, kalulut nenda pagalaiat gogoi iate ka gogoi sibabara peile.”

²⁷ Iageti aku, Daniel, againangan tubukku saggo lepa bara besiku pigangagogoi pa' ujunia. Pasat nenda suru aku lepa galaiakekungan minca galaiakenen uktuk rimata katubukku. Tapoi ta mangka bagaku masipaatu sangamberi itcot mata nenda samba tamomoi kukeruijinia.