Dan. 6 - BUKO SIPUNENAN

Ngaliu Singa

¹ Lepat aimatei si Belsyazar, si Darius tai Media masioppu kudduat purimataat. Kateteret nenda rurania enam pulu rua ngarura.

² Si Darius masirubei purimataatnia bailiu sangotu rua pulunga kupkumen laggai. Senen Kupkumen laggai iuteake sara utet laggai.

³ Si Daniel samba rua sirimanua sabagei iuddetnake sia masipasikeli sautet laggai nenda bule bui irugiake rimata.

⁴ Oto si Daniel maeru samba makolou pugagalainia bele peile pugagalaira sautet laggai nenda. Kalulut si Daniel iate simasun ketsat puaagai; samba rimata masiisiake iuddetnakenia ute ka sangaliot purimataatnia.

⁵ Tapoi sautet laggai samba sipasijago nenda rabesiake le masigaba puseleat Daniel kabagat pugagalai ka pamarenta, tapoi ta'amoi, kalulut si Daniel mariuriu le topit samba maroipo samba ta aigalaiake ore baga ele puseleat.

⁶ Lepa kuarangannia, “Ta tasesese berisara puseleat katubut Daniel, ke ta ka enungan puaranannia ka Taiakamanua.”

⁷ Lepa geti ei sia simakere masiailiake rimata samba kuarangan, “Oi Tuanku Rimata Darius, murimanua le Tuanku teret buruburu!

⁸ Kai sangamberimai sipasikeli purimataat Tuanku, samba sautet laggai, amakerean bagamai masisegeake bule tuanku masibelaake surukat sibailiu reddenen simakolou. Oto Tuanku bule nuparentaake kabagat telu pulu ngagogoi ujunia ta tuobaake berisara sirimanua masisegeake panindogat ka sara buluat ele ka sirimanua, ke' ta' katubut tuanku. Kasei masipasabau surukat nenda turibbaiake le geti ka ngaliu singa.

⁹ Kutiddou kai bule Tuanku masiteken surukat nenda bule ibailiunia surukat ka Media samba Persia sitaiooi tusili minca.”

¹⁰ Iageti tekenangan surukat nenda Rimata Darius.

¹¹ Kele aiarep si Daniel pagalaiat nenda, toilinia ka lalepnia. Bilinia ka isit kapata ai jandelania sipaipo ka Jerusalem. Kele simatukkle galaiakenennia, murekkuk, manindou samba masiumun Taikamanua telu ngaminca kabagat sangagogoi ka ipot jandela sitububuka nenda.

¹² Kateteret tai saggak Daniel masiitco si Daniel ainia maninindou ka Taikamanuania,

¹³ ei sia sangamberitda masiailiake rimata masisegeake si Daniel. Kuarangan, “Ta' pa' Tuanku le amasibelaake surukat masikera sangamberi sirimanua ujut telu pulungagogoi nene masisegeake panindogat katubut sara bulungan ele ka sirimanua, ke'ta' kai Tuanku” Samba kasei leu et sipasabau surukat nenda turibbaiake le geti ka ngaliu singa?” Aleginangan Rimata, “Kirenangan, parenta nenda ibailiu le surukat ka Media samba Persia sitaioi tusili.”

¹⁴ Lepa kuarangan kai rimata, “Si Daniel, sara sirimanua siribbaiakenen sibara ka Jehuda, sitaisuru' Tuanku samba sitaireddet parentat Tuanku. Mariuriu le ipanindou telu ngaminca sangagogoi.”

¹⁵ Lepat aiarep pagalaiat nenda si rimata, makope le reureu bagania, samba gabanangan enungan addeat masibelaake si Daniel. Pat aili ka soibokat si rimata aipeilenia mupaatuat.

¹⁶ Lepa geti sangamberi sirimanua nenda toili sia masialiake rimata samba kuarangan katubunia, “Agai le, oi Tuanku, siripot surukat Median samba Persia, parenta sibelaakenen rimata ta'momoi tusili.”

¹⁷ Oto kalepakatnia parentaakenangan rimata bule tulaba si Daniel samba turibbaiakenia kabagat ngaliu singa. Kuanangan rimata katubut Daniel, “Bule Taikamanua panindogietnu simariuriu nenda, Nia te masibelaake ekeu.”

¹⁸ Pasat nenda ambitrangan samba galakrangan sara bukku sabeu nenda ka ngungun ngaliu, lepa ettetakkenangan tularat sipsipnia rimata ka bukku nenda samba tularat sipsip siabeu tiboitubu ka purimataatnia, bule bui berisara sirimanua moi masibelaake si Daniel ka ngaliu singa nenda.

¹⁹ Lepa geti toili rimata ka uma purimataat. Ta'ioba mukom ele tupusuibi. Sangasoibo nenda ta ailaulaunia merep.

²⁰ Maseggei pei le, suru rimata samba einia siamola ka ngaliu singa.

²¹ Kele aisege sedda, pusoganangan sialei karat baga, “Daniel, pagugulet Taikamanua sipuririmanua! Amoian leu ibelaake ekeu Taikamanum panindogietnu samba reddenennu nenda ka sangamberi singa nenda?”

²² Lepa aleginangan si Daniel, “Oi Rimata, murimanua le tuanku teret buruburu!

²³ Aikoiniakean malaikaNia Taikamanuangku masipetpet ngungun sangamberi singa nenda, bailiunangan ta aragalai apapa katubukku, karena taanai akugalai puseleat katubuNia samba katubut tuanku, ale rimata.”

²⁴ Lepa makopenangan angkat bagania rimata samba parentaakenangan bule tubelaake si Daniel kabagat ngaliu nenda. Iageti tiktikrangan si Daniel ka ngaliu nenda, samba berisara siorangan katubunia, kalulut matonem bagania ka Taikamanuania.

²⁵ Iageti kaunangan parenta rimata bule tulaba sirimanua sipasisusuksuk si Daniel nenda samba turibaiake sia kabagat ngaliu sambatda tatoga samba tainanalepda. Ta'pei asege sia ka saisai ngaliu nenda, aitarakkupman sia sangamberi singa samba pabuburangan leu tolatda.

²⁶ Iageti kaunangan surat Rimata Darius ka sangamberi sirimanua ka sangaliot laggai, suku samba nganga, sikudduiji sangaliot polak, kise ngangania, “Bule ituppai riuriu puririmanuamui!

²⁷ Pasamba nene kuake surukat, ka sangaliot purimataat kupkumenku, sangamberi sirimanua buita rakalotoake samba rasuru Taikamanuan Daniel, Nia iate Taikamanua sipuririmanua teret buruburu, Nia le mupaparenta teret buruburu. Purimataatnia ta masususu. Gegenia ta sasappru.

²⁸ Nia masiarauake samba masibelaake, kiseiet samba pukerengan Nia masigalaiake ka manua samba ka polak. Si Daniel aiarauakeanNia, ka sabbak sangamberi singa.

²⁹ Kisedda te aibara puaabeu tiboitubunia si Daniel kateteret puparentaat Darius samba Koresh, tai Persia nenda.