Dan. 4 - BUKO SIPUNENAN

Nebukadnezar mubuak patuat samba tuepeake

¹ Nene te pangasegekat Rimata Nebukadnezar sikaunia ka sirimanua sibara senen laggai, suku samba nganga ka sangalio polak, “Bule ituppai ririu puririmanuamui!

² Kuoba le masitiboi pagalaiat kerek samba kiseiet sigalaiakenen Taikamanua sipulubeunan katubukku.

³ Bulat mabeu le kiseiet sigalaiNia! Bulat magege le kerek sigalaiakenenNia! Ibailiu le geti Taikamanua rimata teret buruburu. Ka senen tetere Nia le tuteu.”

⁴ Aku, Nebukadnezar, mukuddu ka lalepku kabagat sanang samba erut puririmanua ka uma purimataatku;

⁵ lepa bara pangamutetku sibaraake katugegekatku. Pupaatuananku ka peremanku samba leu itcot mata siitcoku sibaraake taimangkat bagakku.

⁶ Lepa belaakekungan parenta, sangamberi simasiku patuat ka Babel buita tuambit katubukku bule rapaagai katukolobat pangamutet nenda.

⁷ Lepa oi sia simaagai masipatuptup gogoi, simatawa, simasoppit samba siagai masitoggai panyanyat nenda poiliatkungan pangamutetku nenda katubutda, tapoi berisara sia amoi masikolouake katukolobatnia.

⁸ Kalepakatnia oi si Daniel oniakenen si Beltsazar kele onin taikamanuangku. Daniel sisun ketsat sabulungan sipunenan. Poiliatkungan leu pangamutetku katubunia, kuakungan kise,

⁹ “Ale, Beltsazar, siuteake sirimanua simaagai, akuagaian ekeu sisut ketsat sabulungan sipunenan le, samba taanai keleat bulat simalipput katubum! Kalulut nenda nene te enungan pagalaiat pasiitcot mata ka pangamutet sisiloku, oto kuangan katubukku katukolobatnia.

¹⁰ Kateteret aiaku memerep, kuitco le sara loina bulak simabuka ka talagat polak.

¹¹ Loina nenda bulat mabuak; loinakatnia mabeu samba maron. Buttetnia teret ka manua, bailiu pat oinangan raitconia sangamberi sirimanua ka polak.

¹² Sangamberi buluknia malibbut samba buania bulat maigi, metnangan rakomnia sangamberi sikudduiji polak. Sangamberi tarimeu mukunem ka teinia samba sangamberi uma murumun ka rannia. Sangamberi sipungongoingoi momoi rakom buania.

¹³ Kateteret ai kupaatu siitcot mataku ka pangamutetku itcokungan sara malaika tugorosot barania ka manua.

¹⁴ Pusoganangan ka nganga sabeu, “Tadde kam loina nenda samba patippu kam sangamberi rannia samba pasaragai kam buania. Tuituiake kam sangamberi tarimeu sipeperep kateinia samba uma sipururumun ka rannia.

¹⁵ Tapoi turonia eddangan ipulegei ka polak. Tuapra pasamba letcu laba, tembaga, lepa galakngake ka susu simaparou. Eddangan isuaijinia tinobut samba murimanua pasamba tarimeu samba leu siureman.

¹⁶ Eddangania patuat pusisirimanuania isili bailiu patuat tarimeu ujunia pitu ngarura.

¹⁷ Nenda te siteuakenenmai samalaika samba nene leu iate tiboietda sirimanua sipunenan. Aitugalai nene bule sangamberi sirimanua raagainia, Sipulubeunan sibakkat teu ka purimataat sirimanua. Purimataat nenda kaunangannia ka sirimanua siobat bagaNia samba mandeat leu katubut sirimanua sitaiaddeakenen kaunangannia!”

¹⁸ Ale Beltsazar, nenda te pangamutetku. Kineneiget poiliatnan katukolobatnia katubukku. Beri sara sirimanua simaagai ka purimataatku siagai masikolouake katubukku, tapoi ekeu momoi, aipoi ai sunnakean ekeu ketsat sabulungan sipunenan!”

¹⁹ Masiarep nenda, purionangan si Daniel oniakenen leu Beltsazar, tugegenangan. Pupaatuanannia sikaunia ta mangka baga. Kuanangan Rimata Nebukadnezar katubunia, “Beltsazar, bui ibara taimangkat bagam kalulut pangamutet samba katukolobatnia nenda.” Aleginangannia si Beltsazar, “Tuanku, bulat maeru peile ke pangamutet samba katukolobatnia iorak saggak tuanku.

²⁰ Loina siitcot Tuanku nenda bulat makope buak, buttetnia pat aili ka manua, samba momoi raitco sangamberi sirimanua ka polak.

²¹ Sangamberi buluknia malibbut samba buania bulat maigi bailiu metnanganipa kom sangamberi sikudduiji polak. Sangamberi tarimeu simalia mukunem ka tei nia samba sangamberi uma murumun ka senen rannia.

²² Ale Tuanku, Tuanku te loina simabuak samba simaron nenda. Puaabeu Tuanku ituppat teret ka manua samba pugeget Tuanku malio teret katutut polak.

²³ Si Tuanku masiitco leu et sara malaikat tugorosot barania ka manua ainia maninibo, “Tadde le loina nenda samba susubuake le, tapoi eddangan ikuddu turonia ka polak. Apra le pasamba letcu laba samba tembaga lepa galangake le ka susu simaparou. Eddangan isuaijinia tinobut samba murimanua pasamba sangamberi tarimeu ujunia pitu ngarura.

²⁴ Tuanku, nene te katukolobat siitcot mata nenda, samba nene te siteuakenen Taikamanua sipulubeunan pagalaiat Tuanku:

²⁵ Tututuituiake le geti ekeu katalagat sirimanua samba murimanua katalagat sangamberi tarimeu ka susu; nukom le geti parou kele jaui samba merep ka polak simabaoi, pat suaijinangan ekeu tinobut. Kise te muaaili katubum pat aili pitu ngarura, teret nuseseake Taikamanua sipulubeunan sibakkat teu ka purimataat sirimanua, samba purimataat nenda kaunanganNia katubut sinausauNia.”

²⁶ Tai Malaika masiparentaake bule turot loina nenda tuobaake ikuddu ka polak. Nene kotukolobatnia Tuanku ibabailiu te geti minca rimata lepat nukatonemi Taikamanua sibakkat sangamberi polak.

²⁷ Kalulut nenda tuanku nureddet panganturatku. Buian nugalai jo minca, tapoi galaiake le apa simaeru, simaroipo samba pununtuki baga sirimanua siorei. Kabagat nene Tuanku mariuriu le geti muangka baga.

²⁸ Sangamberi nenda muaili le katubukku, Rimata Nebukadnezar.

²⁹ Pasat pulu ruangalaggo, kateteret aiaku mugegejek ka teitei lalep simagaktuk uma purimataatku ka Babel,

³⁰ kuakungan, “Itco, bulat makope lainge laggai Babel! Aku te sipasigalainia ibailiu inan tobbou laggai purimataatku addeat masipatoila gege samba puroronku, pubebeunan samba puaabeuku!”

³¹ Tapei alepa kupanibo, sinulut maarepnangan nganga sibara ka manua: “Rimata Nebukadnezar, arepmake nene! Gegem sibailiu rimata atuaalaan katubum.

³² Tututuituiake le geti ekeu katalagat sirimanua samba murimanua katalagat sangamberi tarimeu ka susu; nukom le geti parou kele jaui. Kise te muaaili katubum pat aili pitu ngarura, teret nuseseake Taikamanua sipulubeunan sibakkat teu ka purimataat sirimanua, samba purimataat nenda kaunanganNia katubut sinausauNia.”

³³ Kateteret nenda leu et, sangamberi tiboiet nenda puailinangan. Aku, Nebukadnezar tutuituiake katalagat sirimanua samba mukom parou kela jaui. Tubuku isuaiji le tinobut, alaiku ibailiu le nantat bulut manyang, samba suletku nantat sulet uma.

³⁴ Kateteret aitukapplu pitu ngarura nenda, teilakungan ka manua, lepa toili puaagaiku katubukku. Iageti kuumun le Taikamanua sipulubeunan. Kuumun samba kuabeuakeNia sipuririmanua sitaitatata nenda. “Taikamanua ibailiu te geti rimata teret buruburu. Ka sanganantat teteret Nia le tuteteu.

³⁵ Sangamberi tai ka polak taanai paluluatnia. Malaika ka manua samba sipulaggai ka polak Taikamanua le sibakkatnia. Berisara sirimanua siooi masisaggangi siteuakekenNia, taanai simagege masiparereake apa galaiakenenNia.

³⁶ Kateteret aitoili minca puaagaiku katubukku, iageti pubebeunan, puaabeu samba pulatsanan purimataatku tutoiliake katubukku. Rasilo le aku sipugagalai samba siabeu tiboitubu sipugagalai ka uma purimataatku, samba tutoiliake le aku ka purimataatku, pulatsananku ibailiu le bulat sabeu bele peile kele siburu.

³⁷ Oto kineneiget aku, Nebukadnezar, masiumun, masiabeuake samba masilatsatnake Rimata ka Manua. Sangamberi sigalaiNia sineseat samba maroipo, samba Nia momoi iepeake sirimanua sigalaiake pubuangan patuat.