Dan. 3 - BUKO SIPUNENAN

Obengan sipujujulu

¹ Ka sara tetere Rimata Nebukadnezar masigalai sara tularat mas buaknia enem pulueto samba lionia enem eto. Rioakerangannia ka su'sut Dura ka kupkumen Babel.

² Lepa geti Rimata masikoiniake sirimanua bule rasogai sangamberi sautet laggai, sipasikupkup, gubernur, bupati, sipangantru Negara, sipuuku bulagat, sipasiukum, siagai surat samba sangamberi saut laggai masiailiake punen pasibujaiat tularat sirioakenennia nenda.

³ Lepa araoi sangamberitda samba puriorangan ka matat tularat nenda,

⁴ pusoganangan pagugulet rimata simaron, “Sasaraina sibara ka senen laggai, suku samba nganga! Arepmake kam parentat rimata nene:

⁵ Ke munau pipiau, suling, kecapi, rebab, gambus, serdam samba senengamata panaunau, iageti buita murekkuk kam manindou ka tularat mas sirioakenen Rimata Nebukadnezar nenda.

⁶ Kasei ta masireddet parenta nene, turibbaiake le geti ka obengan sipujujulu!”

⁷ Kele araarepnia ipunau senengamata pipiau nenda, sangamberi sirimanua sibara ka senen laggai, suku samba nganga, iageti purekkukrangan samba manindou ka tularat mas sirioakenen Rimata Nebukadnezar.

Telu saalei Daniel tusuksuk masipasabau surukat rimata

⁸ Piga pa tai Babel masiputului tubu masisuksuk tai Jehudi.

⁹ Kuarangan katubut Rimata Nebukadnezar, “Murimanua le tuanku teret buruburu!

¹⁰ Anubelaakean surukat, ke amunauan bai sangamberi sipunanau, sangamberi sirimanua bui ta murekkuk samba manindou ka tularat mas nenda,

¹¹ samba kasei ta masireddet parenta nenda turiribbaiake le geti ka obengan sipujujulu.

¹² Tapoi piga pa tai Jehudi, sikaunu muparenta ka kupkumen laggai Babel, ta arapuletsei parentam nenda. Sia iate Sadrakh, Mesakh samba Abednego. Sirimanua nenda ta raoba masisuru bulungan tuanku samba ta amanindou sia ka tularat mas sirioakenennu.”

¹³ Masiarep nenda ibailiu bulat magolu le rimata, lepa kaunangan parenta bule tuambit si Sadrakh, Mesakh samba si Abednego katubunia. Kele arambit sia katubut Rimata,

¹⁴ Panounounangan Rimata katubutda, “Sadrakh, Mesakh samba Abednego! Bulatnia leu ta noba kam masisuru bulunganku samba ta noba kam manindou ka tularat mas sirioakenenku nenda”

¹⁵ Oto, kineneiget, nuoba leu kam murappo samba manindou ka tularat mas nenda kateteret ipunau sangamberi sipunanau? Kebai ta nuoba kam, turibbaiake le kam ka obengan sipujujulu. Samba taikamanuan kasei momoi masibelaake kam kakabeiku?”

¹⁶ Lepa alegirangannia, si Sadrakh, Mesakh samba Abednego, “Taanai katukolobatnia kuake kai alegiat katubut tuan pagalaiat nene.

¹⁷ Kebai Taikamanua panindogietmai momoi ibelaake kai, belaakenangan leu kai ka obengan sipujujulu nenda, samba leu ka kabeinu, ale Rimata;

¹⁸ Tapoi ke ta igalaiake Taikamanuamai, kau le nuseseakenia, ta maninindou kai ka taikamanuam samba ka tularat mas sirioakenennu nenda.”

Sadrakh, Mesakh samba Abednego tuukum simateiaknen

¹⁹ Iageti makopenangan golunia Rimata Nebukadnezar katubut Sadrakh, Mesakh samba Abednego, lepa parentaakenangan bule tugalai oloi obengan pitu ngaminca pitu oloinia bele pei oloinia kele simareirei.

²⁰ Lepa koiniakenangan piga pa saladdunia simaron tubu masikabe si Sadrakh, Mesakh samba Abednego, samba raribbaiake sia kabagat obengan sipujujulu nenda.

²¹ Lepa kaberangan leu katelu sirimanua nenda pasamba juba, sokkit, tutu samba bibiletda bagei samba turibbaiake ka obengan sipujujulu.

²² Kalulut parentat rimata nenda bulat maron, iageti obengan nenda atuoloiakean simakope bailiu julu obengan nenda masilabo samba mateirangan leu et sirimanua sipasiakkatnake si Sadrakh, Mesakh samba Abednego ka bebet obengan.

²³ Tapoi sitelu sirimanua nenda, iate Sadrakh, Mesakh samba Abednego, bele sia kabagat obengan sipujujulu nenda kabagat katukabekat.

²⁴ Iageti sinulut tugegenangan simakope Rimata Nebukadnezar. Tusurunangan leu simaruei samba pusoganangan ka sapaguguletnia, “Ta pa telu le sia ataribbaiake situkakabe kabagat obengan nenda?” Alegirangannia, “Kirenangan aisesengan, ale Rimata.”

²⁵ Kuanangan Rimata, “Tapoi angoi ai sia epat kuitco muenung katalagat obengan nenda; taanai siorangan katubutda, samba epatda nenda kele togat sabulungan.

²⁶ Lepa legerinangan matat baliu obengan nenda Rimata Nebukadnezar samba pusoganangan, “Sadrakh, Mesakh samba Abednego, pagugulet Taikamanua sipulubeunan! Belaakean kam ka obengan nenda samba konan kam sene!” Lepa bela si Sadrakh, Mesakh samba si Abednego ka obengan nenda.

²⁷ Sangamberi sautet laggai, sipasikupkup, samba sipugagalai bagei kai Rimata parururangan; itcorangan, tubutda sirimanua nene ta ilalabo obengan, alai ka ute'ra ta amakasak, jubahda ta amalabo, beringan leu beu kujuk taanai katubutda.

²⁸ Lepa kuanangan Rimata Nebukatnezar, “Tuumun le Taikamanua panindogiet Sadrakh, Mesakh samba Abednego! Aikoiniakean poi malaikaNia masibelaake katelu paguguletNia simatonem baga katubuNia. Arapasabauan parenta samba raoba pei le matei kalulut ta roba manindou samba masisuru bulungan bagei ke ta Taikamanuanda.

²⁹ Kalulut nenda kuparentaake le, senen laggai, suku samba nganga, sipaloloi Taikamanuan Sadrakh, Mesakh samba Abednego, tupatitippuki le nia geti samba lelepnia tubukkatake bailiu rurukat karagatat. Aipoi taanai sabulungan bagei sioi masibelaake kele sigalaiakenen Taikamanua nenda.

³⁰ Pasat nenda Rimata masibuakngake tiboitubu ka galaiakenen Sadrakh, Mesakh samba Abednego bailiunangan sia siabeu tiboi tubu ka kupkumen laggai Babel.