Dan. 12 - BUKO SIPUNENAN

Gogoi Sialu

¹ Kuanangan minca malaika nenda, “Keteteret nenda babara geti si Mikhael malaika sabeu sipasijago tai Israel. Lepa nenda babara te geti pangoringan sabeu, sita'pei amuaili kateteret siburu kele pat aili tetere pangoringan sabeu nenda. Tapoi sangamberi tai Israel sitususurat oniia kabagat bukot Taikamanua, tupaarau te geti.

² Maigi katalagat simamatei muririmanua le geti minca; ai sabagei masiikep purimanuaiat sitaitatata samba sangarubeiat minca murimanua le geti ka pateleiat samba pangoringan sitaimasususu.

³ Saute simasiku paatuat mutoro le geti kele torot manua. Samba sia sipasigegelaiake sirimanua simigi addeat masigalaiake simaeru samba puroipoat, mutotoro le geti kele panyanyat teret buruburu.”

⁴ Lepa kuanangan minca malaika nenda katubukku, “Daniel, luplupmake buko nenda kineiget, samba kau tularat sipsip sibailiu toggaiat ka buko nenda teret gogoi sialu. Maigi te sirimanua sipasigagaba apa sipuaaili samba itutuppai te puaagai.”

⁵ Lepa geti aku, Daniel masiitco rua taimanteu. Sara murio ka be'bet bagat oinan ka isit sene, samba sara minca murio kabe'bet bagat oinan ka isit sedda.

⁶ Sara malaika masipanounouake katubut malaika sipuleppei juto sipurio ka be'bet tirit bagat oinan, “Pigamoi itukapplu kerek nenda?”

⁷ Akkatnakenangan karua kabeinia malaika nenda ka isit ka manua, lepa pusuppanangan ka onin Taikamanua sitaitatata samba kuanangan, “Singarura samba rua ngarura samba sitenga rura, samba apuaaili nenda geti muriuriu le ujunia teli sitenga rura. Lepat ilepa pangungkurat ka paamian Taikamnaua, lepa tukapplunangan leu et kiseit sipuaaiki nenda.”

⁸ Sangamberi sikuania nenda akuarepman, tapoi taakukeruiji. Lepa kuakungan, “Tuan, Kipa itukapplu sangamberinia nene?”

⁹ Aleginangannia, “Kenan le kineneiget, Daniel, aipoi sangamberi tiboiet nene bui ta tukau tularat sipsip sibailiu toggaiat teret gogoi sialu.

¹⁰ Maigi te geti sirimanua tulinaake, tusibo samba tupalatsat tapoi sirimanua sikatai mariuriu le ragalaiake sikatai, taanai berisara sia masiagai kolou. Tapoi simasiku paatuat geti raagai katukolobatnia.

¹¹ Kateteret tuariake buluakenen sisenen gogoi nenda samba sara kalotoakenen kuanen pukakatai le nenda turirioake, tusabau le geti 1.290 ngagogoi.

¹² Maungtuk te sia simariuriu mutopit teret kagogoi sangaribu telungotu telupululima.

¹³ Ekeu Daniel, bui tamariuriu numatopit teret iaili kalepakat polak. Mamatei te geti ekeu, tapoi tusuru le geti ekeu addeat masisilo upam ka gogoi sialu.”