Dan. 11 - BUKO SIPUNENAN

¹ Kele siburu aku leu amasipaaleinia addeat masiparon samba masiropmakenia, iate ka rura siboiki puparentaat Darius tai Media nenda.

Purimataat ka bare samba purimataat ka kaiaman

² Sangamberi kuanenku nene sineseat te.” Kuanangan malaika nenda, “Aile telu rimata bagei masipaparenta geti Persia, samba rimata sikaepat ibailiu le geti bulat makayo bele pei rimata sabagei. Ke bulat amaronnannia kalulut pukayoatnia, sagganginangan geti purimataat Junani.

³ Lepa geti bara minca sara rimata bulat simagege. Iparenta le geti purimataat simakope beunan samba galainangan leu siobat bagania.

⁴ Tapoi kateteret aimakope puaabeunia, maragatnangan purimataatnia bailiu epat ngarubeiat siripot matat rusa siabara ka manua. Ka epat tai rimata nenda, ta sibara ka muntogatnia, muparenta le geti sia sibailiu silinia, tapoi ta kele ronnia.

⁵ Iageti Rimata laggai ka kaiaman ibailiu le maron geti. Tapoi sara katalagat sautet saladdunia ibailiu le geti makope ron bele pei ronnia samba puparentanangan sirimanua nene samba purimataatnia bulat sabeu peile.

⁶ Piga ngarura pa sibabara, ka ruatda nenda patadderangan: togat rimata ka kaiaman mei le geti nia kai rimata laggai ka bare masibaraake pukerekat baga, tapoi ta amatom burunia pukerekat baga nenda, kalulut sinanalep nenda ramamateiake le geti nia, kisedda leu et simanteunia, togania samba sapagugulenia sitaroakenia.

⁷ Ta amaburu ka lepat nenda, sara ka muntogat togat rimata sinanalep nenda ibailiu le geti rimata. Isaggangi le geti saladdut rimata laggai ka bare, gurukinangan irip laggainia samba kalaakenangannia.

⁸ Kateteret aitoili ka Misir, ambitnangan geti tularat sabulungan saggaknia samba bibilet sigalai sibara ka perak samba mas. Piga ngarura pa burunia ariakenangan masisaggangi rimata laggai ka bare.

⁹ Lepa geti rimata laggai ka bare' sagganginangan laggai ka kaiaman, tapoi rakalaake le geti nia samba toilinangan leu ka laggainia.

¹⁰ Iageti tatogat rimata laggai ka bare' masipaterek tubu addeat pasaggak samba kaunangan geti saladdu simigi. Iageti sara katalagat tatogat rimata mei geti masisagganginia, masinemnemi samba masisaluki sangamberinia kele eba sabeu. Ka pasaggangan sikaruania pat ailinia ka kudduat pulekenenda tai saggak.

¹¹ Iageti pugolunangan simakope rimata laggai ka kaiaman, lepa einia pasaggak masisaggangi rimata laggai ka bare' sipasikakau saladdu simigi nenda, samba kalaakenangan leu saladdu simigi nenda.

¹² Lepat aisubuake saladdu simigi nenda, maangkanangan bagania. Kenanen aimateiakean saladdu simigi, tapoi ta mabuburu ipuparenta.

¹³ Lepa sikarua ngamincania rimata laggai ka bare' nenda masikau geti saladdunia bulat simigi, bele pei igitda siboiki. Piga ngarura pa sibabara, mei le nia geti masisagganginia pasamba saladdu simigi samba raambit leu pamateira simigi.

¹⁴ Kateteret nenda maigi te geti sirimanua masisasaggangi rimata laggai ka kaiaman nenda. Kisedda leu et sangamberi sirimanua sikatai taikalaggaiatnu, Daniel, raumunake le geti tubutda, pat puailinangan pasiitcot mata nenda, tapoi amakala le sia.

¹⁵ Iageti rimata laggai ka bare' alounangan geti laggai sibara kekre samba masioppu laggai nenda. Saladdu laggai ka kaiaman ta arasoppi rasaggangi sia, beringan leu saladdu sipili taan amoi tubutda pasaggak.

¹⁶ Rimata laggai ka bare' nenda igalai le geti siobakat bagania, samba berisara simagege masisagganginia. Kudduijinangan leu Polak Simalainge samba sangamberinia ai kabagat kupkumennia.

¹⁷ Iageti rimata laggai ka bare' masipatarek geti sangamberi saladdunia addeat masisaggangi laggai ka kaiaman. Pinaatunia masukukupmake sangamberi purimataat saggaknia, galainangan pukerekat baga pasambania samba masitalimouake togania sinanalep pasamba rimata Misir nenda, tapoi pinaatuania nenda ta atueddet samba ta aipuukutungi.

¹⁸ Pasat nenda isaggangi le geti sangamberi laggai ka puriringan bebet koat, samba maigi aikalaake. Tapoi sara utet saladdu iariake le geti paloloiat sigalaiakenennia nenda, bailoknia, siliakenangan paloloiat nenda katubunia.

¹⁹ Rimata laggai ka bare' nenda toili le geti ka sangamberi irip ka laggainia, tapoi tukalaake le geti nia samba taan anai katuareman minca pagalaiatnia.

²⁰ Sibailiu silinia geti iate sara rimata sipasikoiniake sara paguguletnia sikatai golu masiruruake juran sibesiakenen addeat masituppai pukayoat purimataatnia. Tapoi ta amaburu mateiakerangan rimata nenda, ta kalulut golu samba pasaggangan.”

²¹ Kuanangan minca malaika nenda, “Rimata sibabara siuteake minca laggai ka bare' iate sara sirimanua loloiet sitaimateu ibailiu rimata. Tapoi moi le geti nia sitaisusuksungen samba oppunangan kudduat purimataat ka enungan patajuat.

²² Sangamberi saladdu sioi masisagganginia samba lraggaiakenangan sia, beringan leu Rimata Pelelengan raggaiakenangan samba subuakenangannia.

²³ Pasabaunangan sangamberi pukerekat baga sigalainia simaruei pasamba sirimanua sabagei. Ibailiu le geti nia maron, kenanen goiso le sirimanua kupkumennia.

²⁴ Taisusuksungen gurukinangan geti laggai simakope gebru, samba galainangan sitapei aragalaiake saukkui samba taikebbukatnia iate masiparubei bibilet katubut sisoponia samba pukayoat siraurau ka pasaggangan. Galainangan geti enungan addeat masisaggangi sangamberi kudduat sibara irip, tapoi teterenia ta mabuburu.

²⁵ Iageti kabagat puroron samaba gegenia ruruakenangan geti saladdu simigi addeat masisaggangi rimata laggai ka kaiaman simatarek tubu leuet masisagganginia pasamba saladdu simagege samba bulat simigi. Tapoi rimata laggai ka kaiaman ta aisoppi, kalulut rapajo le nia.

²⁶ Sangamberi sipangantrunia simalegre katubunia masibeleakenia. Maigi le geti katalagat saladdunia simamatei, samba sappru le geti saladdunia.

²⁷ Ka ruatda rimata nenda mupinatu sikatai. Kenanen aisia mukuddu simakere ka sara kudduat samba mukom simakere, tapoi aile sia paboboko katubu. Tapoi ta tueddet, kalulut kalepakat polak nenda ta'pei aiaili teterenia siteuakenen.

²⁸ Lepa geti toili rimata laggai ka bare' ka laggainia pasamba senengamata bibilet sirauraunia. Ibesiake le masipakatai paninindou ka Taikamanua, Galaiakenangan leu et nia, lepa toilinia ka laggainia.

²⁹ Piga pa teteret sibabara isaggangi le minca laggai ka selatan, tapoi pasaggangan sikaruania nene ta makere kele siboiki,

³⁰ kalulut momoi te geti sangamberi kapa'ra tai Kitim masisagganginia, bailiu tata gegenia. Lepa geti toilinia kabagat golunia sabeu samba besiakenangan ipakatai paninindou ka Taikamanua, samba galaiakenangan leu et nia. Pakoinongnangan ukut kabagania katubutda sikaddiuake paninindou ka Taikamanua.

³¹ Lepa koiniakenangan saladdu masipalolit Uman Tuhan. Tataakerangan geti buluakenen sisenen gogoi, samba rioakerangan pukataikat sibailiu katusubuat.

³² Iageti kabagat patajuat rimata nenda na'nanangan geti sangamberi sirimanua sikatai ka paninindou ka Taikamanua nenda, bule rakaddiuake Taikamanua. Tapoi sangamberi sirimanua simareddet ka Taikamanua mariuriu le ramaron samba magege sia rasagganginia.

³³ Sangamberi sirimanua simasiku paatuat katalagat paamian nenda masikau sirimanua simigi raagai kolou. Tapoi piga pa' burunia, piga pa sia katalagatda matei geti kalulut pasaggangan samba obengan samba piga pa sia sabagei tutangsiake samba turaurau.

³⁴ Aimuririuriu pamamatei nenda, bara goiso paroman ka paamian Taikamanua, samba maigi te geti sirimanua masitaddeake tubu katubutda, ta ka muinet patuat.

³⁵ Sangarubeiat saute simasiku paatuat nenda matei le geti sia, tapoi nenda sibailiu pasisiboat ka paamian pat malinarangan. Pagalaiat nenda mariuriu le geti teret kalepakat polak, iate tetere siteuakenen Taikamanua.

³⁶ Rimata laggai ka bare' igalai le geti siobat bagania. Ibuakngake samba iabeuake le tubunia ka senen sabulungan. Kisedda leu et ka Taikamanua sisaliu senengamata sabulungan samba tiboakenangan le geti titiboat sitaimateu tutiboake. Mauktek te nia teret itukapplu golu sabeu nenda; aipoi aponia siteuakenen Taikamanua buita muaili.

³⁷ Rimata nenda ta ipuletsei geti sabulunganda taikabbukatnia samba leu sabulungan panindogietda tainanalep. Sangamberi buluatda nenda ta ipuletsei kalulut ikau le tubunia bulat siabeu bele pei ka sabulungan sabagei.

³⁸ Tapoi sibailiu sili sangamberinia nenda, manindou le nia ka sabulungan sipasijajago irip laggai, iate sabulungan sitaiagaijetda taikebbukatnia. Panguruatakenangan ka sabulungan nenda mas, perak, bukku simakirisau samba bibilet simakeppu saki.

³⁹ Moi le geti nia masisaggangi sangamberi irip laggaira tai saggak bulat simagege kabagat paroman sabulungan siooiake. Kasei masikatonemi sabulungan nenda ikau le geti puaabeu samba pububuak tiboi tubu samba polak sibailiu upah.

⁴⁰ Tapoi ka kalepakat polak, rimata laggai ka kaiaman isaggangi le geti rimata laggai ka bare, samba rimata laggai ka bare isaggangi le nia pasamba kereta, sipukukuro samba kapa' simigi. Pasaggaknangan kele eba sabeu samba pataluijinangan laggai simigi.

⁴¹ Kisedda leu et polak simalainge isaggangi geti, samba imateiake sipupuluribu sirimanua. Tapoi purimataat Edom, Moab samba rubeiat simaeru ka muntogat Amon ta isasaggangi.

⁴² Kateteret aikudduiji sangamberi purimataat nenda, purimataat Misir leu ta' te geti momoi ibela.

⁴³ Iparauraugi le geti pukayoat laggai Misir iate mas, perak samba pukayoat bagei simakeppu saki. Raropmake le getinia tai Libia samba Etiopia.

⁴⁴ Tapoi katuarenan sibara ka kabelaiat sulu samba ka bare' masigegeake le getinia, pat bela nia pasaggaknangan geti simaron mateiakenangan samba subuakenangan migi sirimanua.

⁴⁵ Irioake le geti sapou puaabeunia kapaoggangan koat samba leleu kudduat Uman Tuhan. Tapoi lepa geti matei le nia samba berisara sirimanua siropmakenia.”