Dan. 10 - BUKO SIPUNENAN

Itcot matat Daniel ka bebet bagat oinan Tigris

¹ Ka rura sikatelu pamarentaat Koresh Rimata Persia, sara patonekat tupoiliat kai Daniel sipuoni Beltsazar. Patonekat nenda sineseat samba pagalaiat pugejaat baga sabeu. Iageti ukkaakenangan patonekat nenda samba masileleake itcot mata nenda.

² Kateteret nenda aku, Daniel, mureureu baga telu ngamenggui burunia.

³ Komen simananam akkula ta akukom, anggur ta akulo samba ta akutulaiji alaiku.

⁴ Ka gogoi sikarua pulu epat laggo siboiki rura nenda, kateteret aiaku muririo ka bebet oinan sabeu iate bagat oinan Tigris.

⁵ Tegglaakekunga uteku, lepa itcokungan sara sirimanua sileppeiake komak juto samba akkik tengania sigalai sibara ka mas simaeru.

⁶ Tubunia makirisau, pumataatnia kele torot bila; samba matania matoro kele obengan. Para samba rerenia mukirisau kele tembaga sinasai samba ngangania kele gaugau sirimanua simigi.

⁷ Sarat aku, Daniel, amasiitco itcot mata nenda, tapoi sangamberi sirimanua pasambaku, ta araitco', tapoi amaloto le sia simakope pat pabalaurangan samba pulipputrangan.

⁸ Kisedda te akukuddu sarakku. Kateteret akuitco itcot mata sabeu nenda, sappru puroroku tubuku; mamusinangan mataku simakope samba sappru ron tubuku.

⁹ Lepa geti arepkungan ngangania, samba kateteret akuarep ngangania nenda, kalapuinangan samba bele aku sipululukke ka polak.

¹⁰ Tapoi ai sara kabei sirape aku samba sikau aku tusuru murekkuk mutukke ka bokklo samba kakabeiku.

¹¹ Kuanangan katubukku, “Daniel, ekeu te kilibet bagat Taikamanua, lelekake patonekat kuanenku katubum, rioake ekeu ka rerem, aipoi kineiget atukoiniakean aku moi katubum.” Kateteret aikua pagalaiat nenda katubukku, puriokungan kageret tubu.

¹² Lepa kuanangan katubukku, “Daniel, bui numaloto. Kalulut aiarepingan panindogatnu barania ka siboiki peile anuisiake ibara puaagainu samba masipaepe tubu ka matat Taikamanuam, samba akuoi nene sibailiu alegiat tiboietnu nenda.

¹³ Malaika sijago purimataat Persia masioddoi aku ujunia rua pulu sara ngagogoi. Lepa geti Mikhael, sara katalagat ute'ra tai malaika, moi masiropake aku. Kaddiuakekuangania sedda isaggangi rimatatda tai Persia.

¹⁴ Lepa oi aku masiropmake ekeu nuagai sibabara geti ka laggainu ka kalepakat gogoi, kalulut itcot mata nenda leu pagalaiat gogoi sibabara nenda.”

¹⁵ Kateteret aikua pagalaiat nenda katubukku, lukkukakekungan uteku samba taioinangan kupanibo.

¹⁶ Tapoi siputubu kele sirimanua nenda masibekbek biboku, lepa ngangaakekungan ngungungku samba taddaakekungan manibo. Kuakungan katubutnia, “Tuanku, kalulut itcot mata nene bara taioi tubuku samba sappru ron tubuku.

¹⁷ Kipa ioi kupanibo kai Tuan? Beringan ron tubuku asapprungan samba sun le engangku.”

¹⁸ Iageti malaika kele sirimanua nenda bekbeknangan aku minca samba akenangan ron tubuku.

¹⁹ Kuanangan malaika, “Ale ekeu kilibet bagat Taikamanua, bui numaloto, kau matarek bagam samba ronnake le ekeu!” Ainia maninibo katubukku, againangan tubuku ron tubu minca, samba kuakungan: “Panibongan, Tuanku, aipoi anuakean ron tubuku.”

²⁰ Lepa kuanangan malaika, “Nuagai leu, angoi aku oi katubum” Taan mauju kutoili kuei pasaggak kusaggangi malaika sijago tai Persia. Lepat kukalaakenia, iageti oi malaika sijago tai Junani.

²¹ Kenanen kisedda, kupaagai le geti katubum sitususurat kabagat buko sipunenan. Taanai berisara sia sipurio ka rubeiatku simauine patuat masisagganginia, sarat si Mikhael le malaika sijago Israel.