Ams. 9 - BUKO SIPUNENAN

Pasiitco sikalima: Tuhan kabebet kudduat pasibuluat

¹ Itcokungan ipuriosi Tuhan ka bebet kudduat pasibuluat, samba Kuanangan: “Bo'bo le' simaron tu'tut arigi, bailiu sangamberi tukdak mungeungeu, samba mabukatnangan nenda ka utera sangamberi sirimanua, samba sia sipulelegei Kumamateiake psamba lanjau; beri sara sia sibelaake tubuna.

² Kenanen bai moi raei ka taikabaga, iala le geti sia kabeiKu sedda; kenanen bai tusakai sia ka manua, Kugogorosotake le' geti sia sedda.

³ Kenanen bai mulipput sia ka uddut leleu Karmel, Kugagaba samba Kuaala le geti sia sedda; kenanen bai mulipput sia ka mataKu ka saisai koat, Kupaparentaake le' geti ulou masipila sia sedda.

⁴ Kenanen bai muenung sia matat saggakda sibailiu tangsiake, Kupaparentaake le' geti lanjau masimateiake sia sedda. Kuipoake le' geti mataKu katubutda addeat pugejaat bagatda, samba ta'puerukatda.”

⁵ Tuhan Taikamanua Sebaot le' sipasirarape polak, bailiu pungeungeunangan, samba sengamberi sikuddujinia mureureu baga, samba sangamberi polak tusakai kele bagat oinan Nil, samba ikainia kele bagat oinan Misir.

⁶ Nia sipasiririoake kudduatNia ka manua samba masibongake lakkupNia ka uddut polak; sipasisosogai oinan koat samba masiuruake koat ka uddut polak, Tuhan nenda te' oniNia.

Taikamanua masikeraake bangsa sipili

⁷ “Ta'pa' makere' le kam kele tai Etiopia ka mataKu, ale kam tai Israel?” kise te' ngangan Tuhan. Ta'pa' Aku palulungan tai Israel bela ka laggai Misir, tai Pilistin ka Kaftor samba tai Aram ka Kir?

⁸ Bulatnia te', ai pulelelek Tuhan Taikamanua purimataat sijo nene: Kutatata'akenia le nia geti ka polak! Tapoi muntogat Jakob geti ta' Kutatata'ake, kise te' ngangan Tuhan.

⁹ “Aipoi bulatnia te' Kukakau le' parenta, samba Kusoso'soake le muntogat Israel ka talagat sangamberi bangsa, kele rasoso'ake sirimanua soso'so', samba sangaluiku bukku sigoiso leu ta'bebele ka polak.

¹⁰ Lulut lanjau mamatei le geti sangamberi sirimanua sijo ka talagat paamianKu sipasikukua: Pugejaatbaga nenda geti ta'an babara samba ta'an geti iaaili kai.”

Palelengan pagalaiat katuaraugat

¹¹ “Ka gogoi nenda Kuririoake le' geti minca sapou David simabubukkat; Kutatabbo le' geti rupinia simararagat, samba masirioake minca siragatatnia; Kugagalai le' minca simakere' kele' siburu';

¹² bule rabakkati bangsa Edom sipulelegei samba sangamberi bangsa kuanenKu bakkatKu,” kise te' ngangan Tuhan sipasigagalai pagalaiat nene.

¹³ “Bulatnia te', babara te' geti teterenia,” ngangan Tuhan, “ipamamangkru geti masiailiake sipasimomonei samba sipamimiot buat anggur masikarapake uremen; sangamberi leleu masibaibaiake anggur sibau samba sangamberi tinambu geti iebaiji le'.

¹⁴ Kutotoiliake le' geti minca paamianKu Israel: ragagalai le' geti minca sangamberi laggai simakakatai samba masukudduijinia; rapauuremi le' sangamberi monen anggur samba masilo' anggurnia. Ragagalai le sangamberi monen buat kaju samba masikom buania.

¹⁵ Iageti Kupauuremi le sia ka polakra, samba ta'an tupabuburau sia minca ka polak sikauKu katubutra,” ngangan Tuhan, Taikamanua.