Ams. 8 - BUKO SIPUNENAN

Pasiitco sikaepat: Karakjak pasamba buat kaju simarak

¹ Nene' te' sipatoilat Tuhan Taikamanua katubuku: Matoila le' sara karakjang ai kabagania buat kaju simamarak.

² Lepa kuanaganNia: “Aponia anuitco, Amos?” Alegikungannia: “Sara karakjang ai ka bagania buat kaju simarak.” Kuanangan si Tuhan katubuku: “Teterenia amoian ka paamianKu Israel. Ta'an kuappeakenia.

³ Sangamberi urai ka kudduat sipunenan ibabailiu geti soubaga ka teteret nenda,” kise te' ngangan Tuhan Taikamanua. “Ai maigi tubu simamatei. Paribbaiakerangannia sirimanua ka senen kudduat. Mengmengake ekeu!

Pasirepdeman ka sirimanua sipajo sasarainania

⁴ Arepake le' nene, kam sipaperaki sirimanua simageba, samba simateiake sirimanua sipangogorik ka laggai nene.

⁵ Paatunungannia: “Pingamoi pa' itusasabau laggo sibau, bule ioi itusakiake gandum samba pigamoi pa' itusasabau gogoi sabat, bule ioi tusakiake tarigu masipagoiso efa, masipabeu syikal, masigalai pajoat samba kilo patajuat,

⁶ bule tasaki kam sirimanua sitaioitubu kalulut bulagat samba sirimanua simageba' kalulut ruangasila tarangai; samba masisakiake tapung simakatai?”

⁷ Amusuppangan si Tuhan ka puaangkatbagat Jakob: “Bulatnia taan geti Kukakalipogi ka sanganantat tetere sangamberi galaitubutda!

⁸ Ta' pa' mugeret le geti polak kalulut pagalaiat nenda, bailiu senen sikalaggaiatnia mureureubaga? Ta' pa' sangamberi polak nenda ibura le' kele bagat oinan Nil, iparaggai samba ikai kele bagat oinan Misir?”

Taggop sulu samba soubaga

⁹ Ka gogoi nenda geti muaaili te', kise te' ngangan Tuhan Taikamanua,

¹⁰ Punen puangkakat bagamui Kubabailiuake geti pureureugat baga, samba sangamberi uraimui ibailiu geti soubaga. “Kugagalai le' geti itusone sulu talagat sinago samba masikau imagepgep polak talagat torot gogoi. Kukokomakake le' geti komak goni ka senen tenga samba masibailiuake senen ute' tukuilo'. Kugagalai te' geti sibailiu pureureugatbaga kalulut ka kamatei togania sisasara, kalepakatnia bailiu kele gogoi sabau.”

Laje samba oggou

¹¹ Bulatnia te' babara geti gogoinia, kise te' ngangan Tuhan Taikamanua, Kukakau le' geti pulajeat ka laggai nene, ta' pulajeat komen ele puooggau oinan, tapoi pasiaarep tiboiet Tuhan.

¹² Mueeppak te' geti sia ka senen koat samba masigejengi barania ka bare ka kabelaiat sulu masigaba tiboiet Tuhan, tapoi ta'arasese.

¹³ Ka gogoi nenda kalapuinangan taiokko simalainge tubu samba tailainge kalulut oggou;

¹⁴ sia sipususuppa ka onin Asima, rimata Samaria sinanalep samba sipasikukua: Ka onin taikamanuamui sipuririmanua, ale tai Dan! samba: Ka onin pueenung ka ka Bersyeba! sia nenda bele le geti sia samba ta'an tususuru sia minca.”