Ams. 7 - BUKO SIPUNENAN

Pasiitco siboiki: Sit

¹ Nene te' sipatoilat Tuhan Taikamanua katubukku: Koinong Igalai mungkuat sit, kateteret se'se' sikaut itaddaake iputu'tu, iate se'se' sibau lepat tusaggri iate bakkat rimata.

² Kateteret aitaddaake sit masisapruake siureman ka polak, kuakkungannia: “Tuhan Taikamanua, akean le katuappekat! Kipa ioi imatotom si Jakob? Ta' pa' magoiso le nia?”

³ Iageti oleinangan bagania si Tuhan kalulut nenda. Nenda ta'an muaaili, ngangan Tuhan.”

Pasiitco sikarua: Obengan

⁴ Nene te' aipatoila Tuhan Taikamanua katubuku: Matoila isogai obengan si Tuhan Taikamanua igalaiake pasiukuman. Obengan nenda masipalaboki itata koat simalio samba polak mone.

⁵ Lepa kuakungan, “Tuhan Taikamanua, ariake'an le' obengan nenda! Kipa ioi imatotom si Jakob? Ta' pa magoiso le nia?”

⁶ Iageti oleinangan bagania si Tuhan kalulut nenda. “Nene' geti ta'an muaaili,” ngangan Tuhan Taikamanua.

Pasiitco sikatelu: Tali kirekat

⁷ Nene' te' sipatoilat Tuhan Taikamanua katubuku: Matoila ipurio si Tuhan kabe'bet sara kekre sipuririo, samba ka kabeiNia ai tali kirekat'.

⁸ Lepa kuanangan si Tuhan katubuku: “Aponia anuiitco, Amos?” Alegikungannia: “Tali kirekat!” Kuanangan si Tuhan: “Bulatnia te', Kukakau le' geti tali kirekat katalagat paamianKu Israel; Ta'an Kuappeakenia.

⁹ Sangamberi leleu pasibuluat Ishak geti tupakakatai le', samba turaragatnake le geti sangamberi kudduat pasibuluat, samba Kusasaggangi le' geti sangamberi muntogat rimata Jerobeam pasamba lanjau.”

Si Amos tutuituiake ka Betel

¹⁰ Iageti si Amazia, imam ka Betel, masikoiniake sirimanua masiailiake si Jerobeam rimata Israel, pasamba patonekat: “Aigalaian si Amos pukerekatbaga masisaggangi tuanku katalagat muntogat Israel; laggai nene ta'an ai omake sangamberi tiboietnia.

¹¹ Aipoi kasene le' aikua si Amos: Mamatei le' geti si Jorobeam ka lanjau samba tai Israel bulatnia mutuitui le sia baratda ka laggaira sibailiu sirimanua ribbaiakenen.”

¹² Iageti kuanangan si Amazia kai Amos: “Simaitco mata, kenan le, tuituiake ekeu ka laggai Jehuda! Gaba le' komennu sedda samba pusibalat le' sedda!

¹³ Tapoi ba'an pusisibalat minca ka Betel, aipoi nene le' kudduat sipunenan kai rimata, nene te uma sipunenan uma purimataat.

¹⁴ Alegiat Amos kai Amazia: “Aku nene ta' nabi samba nabi nene ta' rubeiat nabi, tapoi nabi nene sara siputatarimeu samba sipasirururuake buat sileu.

¹⁵ Tapoi sogainangan aku si Tuhan ka galajetku masigirit biribiri, samba kuanangan si Tuhan katubuku: Kenan, pusibala le' katubut paamianKu Israel.

¹⁶ Iageti kineiget, arepake ngangan Tuhan! Kuanungan: Ba' pusisibalat masisaggangi Israel, samba ba' titiboake tiboiet masisaggangi muntogat Ishak.

¹⁷ Aipoi kise' le' ngangan Tuhan: Sinanalepnu geti muolop tubu le' ka laggai, samba togam taimanteu samba tainanalep geti matei le' ka lanjau. Polakmui tuparubei le' geti pasamba tali kirekat', ekeu geti matei le' ka polak simalolit, samba bulat mututuitui le' Israel barania ka laggainia sibailiu sirimanua siribbaiakenen.”