Ams. 6 - BUKO SIPUNENAN

Erut puririmanua siboboi

¹ Matei le' sangamberi sirimanua simasanang puririmanua ka Sion, ka sangamberi sirimanua simaeru puririmanua ka leleu Samaria, ka sangamberi sirimanua sikebbukat laggai sibara ka bangsa sipuboboiki, siailiakenenda samuntogat Israel!

² Putalipo kam ka Kalne samba paitco le'! puenung le' barania sedda ka Hamat sabeu nenda, samba kenan le' ka Gat ka tai Filistin! Makokope leu pa' erura belepei ka sangamberi purimataat nene ele makabeunan pei le' kupkumen laggaira belepei ka kupkumen lagaimui?

³ Ale kam, sipasiaddeake mareunan pei le' gogoi pugejaatbaga, Tapoi silegre ake puparentaat pugegeat sikatai;

⁴ sipeperep ka pereman sigalai sibara ka ban samba masiaroi tubu ka parate; sipasikokom sangamberi togat biribiri sibara ka mungkuat kambing biribiri samba sangamberi togat jaui sibara ka talagat mungkuat tarimeu simamo'mo';

⁵ sipuurai masiarep nau gambus, samba kele igalai si David panaunau ka tubunia;

⁶ sipasilolo' anggur sibara ka pulokat, samba mutula bulat simaeru, tapoi ta' mureureubaga kalulut aimakatai muntogat Josep!

⁷ Kalulut nenda kineiget, sia te sipuboboiki tuambit sibailiu sirimanua ribbaiakenen, samba tukapplunangan leu gau'gau' punen sangamberi sirimanua sipukukuddu sipuaroi tubu.”

⁸ Amusuppangan Tuhan Taikamanua ka tubuNia, kise te' ngangan Tuhan, Taikamanua Sebaot. Mangauan Aku pububuak patuat Jakob, samba malagabagaKu ka uma purimataatnia; Kukakau le geti laggai pasamba sibabara ka bagania.”

⁹ Ke ai peile bai pulu sia ka bagat sara lalep, mamatei le geti sia.

¹⁰ Kammannia sipasilabo tubu simamatei nenda moi le geti masiakkatake samba masibelaake tubu simamatei nenda. Parerenangan ka sirimanua sikuddu ka teitei lalep: “Ai pei leu pa' sirimanua pasamba ekeu” samba ialegi: “Ta'anai,” kuanangan: “Mengmengake ekeu!” Aipoi ta' mateu tutiboi onin Tuhan!

¹¹ Aipoi bulatnia te', iaake le' si Tuhan parenta, iageti turagatnake le lalep sabau bailiu siragatat samba lalep sigoiso bailiu le' sikataikat.

¹² Pababalau pa' kuro' ka uddut tinambut bukku, Bulatnia, anusilingan kam katuroipoat ibailiu tuba samba buat katubulanan bailiu simapongit!

¹³ Ale kam, simaangkabaga kalulut Ladobar, samba sipasikukua: “Ta' pa' sita pasamba puroronta ataoppu kam Karnaim ka sita?”

¹⁴ “Aipoi bulatnia te', Kususuruake le sara bangsa masisaggangi kam, ale paamian Israel,” kise te' ngangan Tuhan, Taikamanua Sebaot, “Samba rapaoreiji le geti kam barania ka enungan siailiake ka Hamat teret kabagat oinan Araba.”