Ams. 5 - BUKO SIPUNENAN

Soibiet pagalaiat Israel

¹ Arepi le' tiboiet nene sikuaku pagalaiat kam sibailiu soibiet, ale paamian Israel:

² “Amabukkatnan, ta'an geti tususuru minca toga siokko Israel murappo ka polaknia, ta'anai sisuruakenia.”

³ Aipoi kasene le' ngangan Tuhan Taikamanua katubut muntogat Israel: Laggai sipuriribu sirimanua siei pasaggak mulelegei geti sangotu sirimanua, samba sangotu sirimanua siei pasaggak samba mulegei le geti katubunia pulu sirimanua.”

Enungan siailiake purimanuaiat

⁴ Aipoi kasene le' ngangan Tuhan ka muntogat Israel: “Gaba le' Aku, iageti purimanuamuian!.

⁵ Bui nugaba kam ka Betel, Bui nuei kam ka Gilgal samba bui nuputalipo kam ka Bersyeba, aipoi Gilgal tuguguru' le ka kudduat katuiribbaiat samba Betel geti sasapru le'.”

⁶ Gaba le' si Tuhan, iageti purimanuamuian, bule bui ilalau muntogat Josep kele obengan, sipasilalabonia isapru samba ta'anai sipasipepeake addeat ka Betel.

Masipaloloi puroipoat

⁷ Ale kam sipasisaili katuroipoat bailiu tuba samba sipasirapdapmake pubulanan ka polak!

⁸ Si Tuhan le' amasigalai panyanyat kartika samba panyanyat belantik, sipasisaili pugepgeman bailiu simancep samba sipasigagalai tago ibailiu simagepgep kele sinoibo. Tuhan sipasisogai koat samba uruakenangannia ka uddut polak, si Tuhan te' oniNia.

⁹ Tuhan sipasiake katusubuat ka sibara gege, pat oi katusubuat ka kudduat simaron.

¹⁰ Malagabagatda katubut sirimanua sipateteka ka matatbaliu gugurukat, samba masitsit sia katubut sipaninibo simaroipo.

¹¹ Kalulut nupaperaki le' kam sirimanua sitaioi tubu samba nuala kam pajak gandum katubunia, kalulut nenda, kenanen bai anurioakean sangamberi lalep sibara ka bukku sipae, ta' nukukudduiji kam; kenanen bai anugalaian kam monen anggur simalainge, ta' nulolo kam geti anggurnia.

¹² Aipoi Kuagai, galai tubum sikatai maigi samba jomui maigi, ale kam sipasibabailiuake tuokkip sirimanua simaroipo, sipasisisilo bulagat ka sitaimaroipo samba masiputata' sirimanua simageba ka matatbaliu gugurukat.

¹³ Lulut nenda sirimanua simaagai paatuat geti mumengmeng le' ka tetere nenda, kalulut tetere nenda iate tetere sikatai.

Murimanua samba matei

¹⁴ Gaba le' puerukat samba bui pukakatai, bule nupurimanua kam. Iageti paaleinangan geti kam Tuhan, Taikamanua Sebaot, kele sikuamui.

¹⁵ Pulagakibaga sikatai, pununtukibaga simaeru; samba rioakekam katuroipoat ka matbaliu gugurukat. Baleu ipunununtukibaga si Tuhan, Taikamanua Sebaot muntogat Josep sipulelegei.

¹⁶ Bulatnia te', kasene le' ngangan Tuhan, Taikamanua Sebaot, Tuhanku: “Ka senen polak simalio babara geti sou geri samba ka senen polou enungan rakua geti sirimanua: Enaa'! Enaa'! Sipumomone rasosogai muleppei goni samba sangamberi sirimanua siagai musou geri, mugeri le'.

¹⁷ Ka senen monen anggur babara geti sou geri, ke' bai muenung Aku ka talagamui,” ngangan Tuhan.

Gogoi Tuhan

¹⁸ Paan te' ka sia sikiddi gogoi Tuhan! Aponia katukaunannia gogoi Tuhan nenda kakam? Gogoi nenda pugepgeman, ta' gogoi simapato!

¹⁹ Kele sara sirimanua situituiake tubunia ka singa, sara beruang masiailiakenia samba kele aisege ka lalep, tukkeakenangan kabeinia ka rupi, pilanangannia sangamuneng ulou.

²⁰ Ta' pa' gogoi Tuhan nenda pugepgeman le samba ta' pato, mainep samba ta' matoro?

Tuhan masipulagaki baga panindogatda tai Israel

²¹ “Malaga bagakku, Kupaloloi le' punen aratmui samba ta' ialabagaKu ka parurukat punenmui.

²² Bulatnia, ke' bai nupanguruatnake kam katubukKu sangamberi buluakenen rarangen samba buluakenen sitattannakenen, ta' Kuoba, samba buluakenen puaraugatmui kele tarimeumui sima'mo'mo', ta' Kuoba masikinere.

²³ Areuake kam katubukKu gaugau sangamberi uraimui, urai gambusmui ta' Kuoba masiarepi.

²⁴ Tapoi eddangannia puroipoat nenda ipuguruk kele oinan samba pubulanan kele bagat oinan simariuriu muguruk.”

²⁵ “Nupangunguruatnake leu pa' kam katubukKu buluakenen ja'jaket samba buluakenen tattatnakenen, epat pulu ngarura burunia ka simatangeu nenda, ale Israel?

²⁶ Tapoi Nuambit te' geti kam Sakut, rimatamui, samba Kewan, panyanyat buluijietmui, sangamberi tularat sigalaimui nenda,

²⁷ samba Kuambit te' geti kam ka kudduat katuribbait ka simareunan ka silat Damsyik, ngangan Tuhan, oninia Taikamanua Sebaot.”