Ams. 4 - BUKO SIPUNENAN

Ukuman ka tainanalep Samaria simaoro' mata ka pukayoat

¹ Arepake tiboiet nene, ale sangamberi jaui Basan, sibabara ka leleu Samaria, sipasiraraurau sitaioitubu, sipaperaki simageba', sipasikukua ka taimanteumui: ambit le' sene, bule tapulo'!

² Amusuppangan Tuhan Taikamanua ka pusipupunenenNia: bulatnia, babara geti teterenia kekeu, tuakkatnake ekeu pasamba sasakkut samba sipulelegei ka talagamui pasamba kakablit iba.

³ Bebela te kam geti ka oggak irip simararagat, senemui roipo ka mata, samba tugirit le kam ka ipot ka Hermon,” kise te' ngangan Tuhan.

Panindougatda tai Israel iate panindougat sikatai

⁴ “Konan ka Betel samba galaiake sikatai, ka Gilgal samba paron masigalaiake sikatai! Ambit le' buluakenen jajaketnu kateteret simansep, samba panguruatake seperpulum ka gogoi sikatelu!

⁵ Labo le' buluakenen pusurakat sibara ka roti sibara sioman samba paarepmake sangamberi panguruat kateubaga; paagaiake le nenda! Aipoi ta'pa kise siobat bagamui, ale tai Israel?” kise te' ngangan Tuhan Taikamanua.

Tai Israel ta raoba toili kai Tuhan

⁶ “Kenanen bai nene Akuakean katubum Sonnu simalina sitaibekbek kan ka sangamberi laggainu samba taiaailina komen ka senen kudduatmui, tapoi ta' atoili kam katubukKu,” kise te' ngangan Tuhan.

⁷ Aku leu masikeraake urat katubum, kateteret telungalaggo minca kepei masimonei; Kubeleake le' urat ka sara laggai samba ka laggai bagei ta'tubebeleake urat; mone bage iurani, samba mone, sitaiorak urat ibailiu le' magarak;

⁸ sipulalaggai rua telu laggai mei siparere're ka sara laggai mulo' oinan, tapoi ta' masege bagatda; tapoi ta atotoili kam katubukKu,” kise te' ngangan Tuhan.

⁹ Aku lippatnan kam pasamba sipakokom sipakatai siureman samba oringen gandum, aipalajuan sangamberi siuremanmui samba monen anggurmui, sangamberi loinat sileu samba sangamberi loinat zaitunmui pakominangannia sit pat sapru, tapoi ta atotoili kam katubukKu,” kise te ngangan Tuhan.

¹⁰ “Akuake besi simasappo katubumui kele ka tai Misir; Aku mateiakean tailaingemui pasamba lanjau kateteret aturaurau kuromui; Akubailiuakean imabute' sapoumui ipiknia asakmui; tapoi ta atoili kam katubukKu,” kise te' ngangan Tuhan.

¹¹ Aku pabailuan sangamberi laggai ka talagamui, kele aipabailu Taikamanua Sodom samba Gomora, pat bailiunangan kam kele legei loina siala ka obengan, tapoi ta atotoili kam katubukKu,” kise te' ngangan Tuhan.

¹² “Kalulut nenda, kise te' Kugagalaiake katubumui, ale kam tai Israel. Kalulut nenda Kugalaiake le' geti kele kise katubumui, iageti patarek le kam tubumui paaili ka Taikamanuamui, ale tai Israel!”

¹³ Aipoi bulatnia te', Nia sipasigagalai sangamberi leleu samba rusa, sipasipopoiliat ka sirimanua aponia pinaatuNia, sipasigagalai toro samba pugepgeman samba sipuenung ka sangamberi tinambu; Tuhan Taikamanua Sebaot, nenda te' oniNia.