Ams. 3 - BUKO SIPUNENAN

Nabi sibailiu sitiboake tiboiet Taikamanua

¹ Arep kam tiboiet nene, sitiboakenen Tuhan pagalaiat kam, ale tai Israel, pagalaiat sangamberi muntogat sipaluluKu bela ka laggai Misir, ngangania:

² “Sarat kam le' Kuagai ka sangamberi muntogat ka polak. Kalulut nenda Kuukum geti kam kalulut sangamberi puseselemui.

³ Mueenung leu pa' simakere rua sirimanua, ke' ta'pei apalelek sia?

⁴ Murorou leu pa' sangamuneng singa ka leleu, ke' ta'pei ai sese komennia? Munanau leu pa togat singa kabagat ngaliunia, ke'ta'pei ailaba' aponia pa'?

⁵ Bebele' leu pa' sangamuneng uma' ka sesere ka polak ka'bai ta' tuserenia? Tubabaubau leu pa' sesere ka polak ke' taanai sereetnia?

⁶ Ke tuulup bai pipiau ka sara laggai, ta pa mugegeret tubutda sipulalaggai? Ke muaili pugejaat baga ka sara laggai, Ta pa si Tuhan amasigalaiake?

⁷ Bulatnia, Tuhan Taikamanua ta'aigalaiake aponia pa' ke' ta'aipatoila' siteuakenenNia katubutda sangamberi sapaguguletNia, tai nabi.

⁸ Amurouan singa, kasei pa' ta' maloto'? Amanibo si Tuhan Taikamanua, kasei pa' ta'musisibla?”

Katuareman pagalaiat katuraragat Israel

⁹ Paagai kam ka purimataat ka Asyur samba ka purimataat ka laggai Misir kua kise: “Paruru kam ka sangamberi leleu ka bebet Samaria, samba lelekngake kam pulamaugat sabeu sibabara ka talagania samba pasirauraugat sibabara laggai nenda.”

¹⁰ “Ta raagai mugalai puroipoat,” kise te' ngangan Tuhan, “sia te' sipasitatabbui pugegeat samba paoreat ka purimataatnia.”

¹¹ Kalulut nenda kise le' ngangan Tuhan Taikamanua: “Saggak bara le geti ka sangalio laggai, puroronnu tugogolok geti le katubum, samba purimataatnu geti turaraurau le'!”

¹² Kasene le' ngangan Tuhan: “Kele sara sirimanua sipasijajago tarimeu masibelaake ka ngungun singa rua tolat biti ele sangatippu talinga, kise te' tuobaake geti tai Israel sikukuddu ka Samaria kele sangarubeiat parate samba kele sangatippu reret uddenan.”

¹³ “Arepmake, samba parepdep le' muntogat Jakob,” kise te' ngangan Tuhan Taikamanua, Taikamanua Sebaot,

¹⁴ “kateteret Akuukum Israel kalulut sangamberi galaitubunia sikatai, Kugagalai geti pasiukuman ka sangamberi kuddut pasibuluat ka Betel, bailiu sangamberi ban kudduat pasibuluat nenda tubakbakngake samba bele ka polak.

¹⁵ Kububukkatnake geti uma ka gogoi simaleppet pasamba uma gogoi simaoloi; pakatai le' sangamberi lalep sikla, samba sapruake le' sangamberi lalep sabeu,” kise te' ngangan Tuhan.