Ams. 2 - BUKO SIPUNENAN

¹ Kasene le' ngangan Tuhan: Kalulut telu ele epat pukakatai sigalai Moab, Taan Kutitiktik geti minca siteuakenenKu: Aipoi kalulut ailaboan sangamberi tolat rimata Edom bailiu kapur,

² Kukakau le geti obengan ka laggai Moab, bailiu purimataat Keriot labonanngannia itata; Matei le geti tai Moab kabagat pugaugaupat, sialei gorat baga kateteret ipunau pipiau;

³ Kususubuake geti sibara gege katalagatda samba masimateiake sangamberi siabeu tiboitubu pasambania,” ngangan Tuhan.

Pasiukuman ka Jehuda

⁴ Kasene le ngangan Tuhan: “Kalulut telu ele epat pukakatai sigalai Jehuda, taan Kutitiktik geti minca siteuakenenKu: Aipoi kalulut ta'arasilo surukat Tuhan, samba ta'araukkaake sangamberi siteuakenenNia, tapoi ipepeake le sia taikamanua sipatajunia, tunenda taikebbukatnia.

⁵ Kukakau le geti obengan ka laggai Jehuda bailiu purimataat Jerusalem labonangannia itata.”

Ukuman Taikamanua ka tai Israel

⁶ Kasene le ngangan Tuhan: Kalulut telu ele epat pukakatai sigalai Israel, taan geti Kutitiktik minca siteuakenenKu: Aipoi kalulut arasakiakean sirimanua simaroipo kalulut bulagat samba sirimanua simageba' kalulut ruangasila' tarangai.

⁷ Rapaperakile' utera' sitaiooi tubu ka abu samba masipasoip enunganda sirimanua pinaore; toga samba ukkui mei le masirape sara sinanalep sibau tubu, bailiu masiputata' pusipupunen oningKu.

⁸ Paiburangan tubutda kasenen bebet kudduat pasibuluat ka uddut bibilet sialara paneret utak sirimanua, samba mulo' anggur sialara ka sirimanua sipuutak katubutda ka uman Taikamanuandra.

⁹ Kenanen kisedda, Aku le' sipasisusubuake kamatda tai Amori, buaknia kele buak pinilok samba ronnia kele terbantin; Akusubuakean buania ka pata samba ungatnia ka repe'.

¹⁰ Kenanen kasedda Aku le' sipalulu kam bela ka Misir samba masiuteake epat pulu ngarura burunia ka susu simatangeu, bule nukudduiji kam laggaira tai Amori.

¹¹ Akusuruakeaan sangarubeiat sibara ka tatogamui ibailiu nabi samba sangarubeiat sibau tubu ibailiu sapagugulet Tuhan Ta'pa bulatnia kasedda, ale kam tai Israel? Kisedda te ngangan Tuhan.

¹² Tapoi anukau le kam anggur ka sapagugulet Tuhan ralo'nia samba masiparentaake ka tai nabi: Bui nupusibla kam!

¹³ Bulatnia te' Kupangeungeu le geti kudduat puriokatmui kele ngeungeu kele kereta simasut abbinen gandum.

¹⁴ Sirimanua simaola tubu taan momoi ituituiake tubunia, sirimanua simaron tubu tamomoi ipakei puroronnia, samba saladdu tamomoi ituituiake tubunia.

¹⁵ Sipasiometnake rourou ta'momoi ta'matotom, sirimanua simaola rere geti ta'momoi ibela samba sipukukuro' ta' momoi ibela.

¹⁶ Kasedda leuet sirimanua simagege ka talagatda saladdu tuituiakenangan tubunia sibulutut ka gogoi nenda,” kise te ngangan Tuhan.