Ams. 1 - BUKO SIPUNENAN

PASIBUKA

¹ Tiboiet sinegeakenen kai Amos, sara sipasijajago biribiri sibara ka laggai Tekoa, pagalaiat Israel kateteret si Uzia, rimata Jehuda, samba kateteret Jorobeam, togat Joas, rimata Israel, ruangarura kepei bara teteu.

Ukuman ka sangamberi bangsa bagei

² Kuanangan: “Murou le si Tuhan sibara ka leleu Sion Ipaarep le ngangaNia barania ka Jerusalem; Sangamberi su'su' simaturuturu bailiu le magarak samba lajunangan leu tu'tut kaleleu Karmel.”

³ Kasene le' ngangan Tuhan: “Kalulut telu ele epat ragalai katai tai Damsyik, taan Kuoolei minca siteuakenenKu. Ragalai poi siobat bagatda mugege ka tai Gilead.

⁴ Lulut nenda Kukakau le obengan ka uma purimataat Rimata Hazael, samba labonangan sangamberi irip purimataat Rimata Benhadad.

⁵ Pakataikungan leu geti sangamberi matat baliu gugurukat ka Damsyik samba masisubuake sikukuddu sibara ka Bikeat-Awen samba sipasiomennake tutura purimataat sibara ka Bet-Eden; samba taikauman Aram bui ta' mei sibailiu sirimanua situriribbai ka Kir,” ngangan Tuhan.

⁶ Kasene le' ngangan Tuhan: “Kalulut telu ele epat ragalai katai tai Gaza, Taan Kuolei minca siteuakenenKu: kalulut araambit sangamberi bangsa ka kudduat katuribbaiat sangamberi bangsa situturiribbai, addeat tukau sia katubutda tai Edom,

⁷ Kuoobaake le' obengan ka bagat irip laggai Gaza, bailiu sappru ilabo purimataatnia;

⁸ Kususubuake le geti sipulalaggai sibara ka Asdod samba sipasiometnake tutura purimataat sibara ka Askelon; Kutototoiake geti kabeiKu masisaggangi Ekron, bailiu subu le sangamberi sipulelegei tai Filistin,” ngangan Tuhan Taikamanua.

⁹ Kasene le ngangan Tuhan: Kalulut telu ele epat ragalai katai tai Tirus, Ta'an Kutitiktik minca siteuakenenKu: aipoi kalulut arakauan sangamberi situluluplup sara bangsa ka Edom samba taan rarepdep palelengan pusarainaan,

¹⁰ Kukakau le geti obengan ka kekret laggaira tai Tirus bailiu labonangannia purimataatnia itata.”

¹¹ Kasane le ngangan Tuhan: Kalulut telu ele epat ragalai katai tai Edom, Ta'an Kutitikti minca siteuakenenKu: Aipoi kalulut aikukukrungan sasarainania pasamba lanjau samba masitataake pukatekat bagania, masiomake oloi golunia teret buruburu samba masikoiri golunia ka sanganantania,

¹² Kuoobaake le geti obengan ka bagat T'eman, bailiu purimataat Bozra labonangannia itata'.”

¹³ Kasene le ngangan Tuhan: “Kalulut telu ele epat pukakatai sigalai muntogat Amon, Ta'an Kutitiktik minca siteuakenenKu: Aipoi kalulut arapasausaugingan balugura tainanalep sibara suruket ka Gilead pinaatutda masipalio kupkumen puukuketda,

¹⁴ Kuobekngake le obengan ka bagat irip laggai Raba, bailiu purimataatnia labonangannia itata', sialei gerei keteteret pasaggangan, sialei rusa talabari kateteret kasou baliok.

¹⁵ Rimatatda bui' ta'mei sibailiu sirimanua situriribbai, pasamba siabeu tubunia,” ngangan Tuhan.