5Mos. 9 - BUKO SIPUNENAN

Taimareddetdra tai Israel

¹ Arepmake kam sasaraina! Gogogi nene te nutalipoki kam bagat oinan Jordan bule nukudduiji kam kupkumen laggaira tai bangsa-bangsa siabeu samba simaron bele peile ronmui. Sangamberi laggaira bulat abeu samba iripnia simabuak kele buak manua.

² Putubuatdra bulat sabeu samba maron tubudra kele raksasa, samba anuarepman kam berisara sirimanua simaro' baga katubutda.

³ Tapoi kineneiget, itcomuian te kipa ipuenung ka matamui Tuhan Taikamanuamui kele obengan sipasilalabo. Kalaakenangan sia ka matamui, bailiu oinangan nukekle samba numateiake kam sia simaruei kele sipalelek Tuhan.

⁴ Ke' ikekle sia si Tuhan Taikamanuamui iropmake kam, bui' nukua kalulut eruku le' aiambit aku si Tuhan masikudduiji laggai nene; kalulut pukakatai sangamberi bangsa le aikekreake sia Tuhan kamatamui

⁵ Ta'kalulut erumui ele kalulut puroipoat paatuatmui anuguruki laggaira, tapoi kalulut pukakatai sangamberi bangsa le, aikekle sia Tuhan Taikamanua ka matam, samba bule isunnake palelengannia si Tuhan sinegeakenenNia pasamba suppa ka taikebbukatmui, iate kai Abraham, Ishak samba Jakob.

⁶ Kau imatonem bagamui, aiakenia Tuhan Taikamanuamui polak simagabru ka tubumui ta kalulut teunia nusilo kam nia. Ta'! Kam nene bangsa simakela patuat.

⁷ Repdem kam kipa anubaraake kam pugolukat Tuhan Taikamanuamui ka simatangeu. Baranangan anukaddiuake kam Misir pat sege kam sene, aipeile nulawan kam si Tuhan.

⁸ Beri ka leleu Sinai leu anubaraake kam pugolukatnia sabeu si Tuhan, pat obanangan imateiake kam.

⁹ Tatrakungan leleu nenda bule kusilo bukku pakerekat baga sigalai Tuhan ka kam. Epat pulu ngagogoi samba epat pulu ngasoibo burunia akukuddu ka uddut leleu taipukokom samba taipulolo'.

¹⁰ Lepa geti akenangan si Tuhan ka tubuku rua bukku silepa surat sinuratnakenen Taikamanua. Ka bukku nenda atusuratnake tiboiet sikuaNia ka tubumui ka obengan, ka teteret ai kam parururu ka reret leleu.

¹¹ Bulatnia, kapplu epat pulu ngagogoi samba epat pulu ngasoibo, akenangan si Tuhan ka tubuku karuania bukku pakerekat baga nenda.

¹² Lepa kuanangan si Tuhan ka tubuku, “Gorosotnake ekeu simaruei, kalulut bangsam sibelaakenennu ka laggai Misir aragalaian jo. Arapasabauan sangamberi parentaKu, samba ragalai tularat panindogietdra.”

¹³ Kuanangan minca si Tuhan ka tubuku, “Akuagaian bangsa nene bulat makela patuatdra.

¹⁴ Bui' nusibo nusaila Aku. Kususubuakean le sia pat tairepdeprangan sia. Tapoi ekeu geti, kubailiuake ekeu ukkui sara bangsa sabeu samba simaron bele pei sia nene.”

¹⁵ Iageti soksokkungannia, aikuaambit karuania bukku pakerekat baga ruangasilat kabeiku, gorosoningkungan leleu sipujujulu.

¹⁶ Lepa itcokungan kam anupasabauan kam perintat Tuhan Taikamanuamui. Amajongan kam ka matat Tuhan kalulut anugalai kam sara tularat jaui sibara ka logam.

¹⁷ Iageti kamatamuian leu et karua bukku pakerekat baga nenda, lippatnakekungannia pat gatca ruania.

¹⁸ Lepa purappokungan minca ka matat Tuhan ka uddut leleu, epat pulu ngagogoi samba epat pulu ngasoibo burunia, taipukokom samba taipulolo. Akugalaiake kele nene geti, kalulut amajongan kam ka matat Tuhan anugalai kam katai ka mataNia, bailiu pugolunangan.

¹⁹ Bulat simakope lotoku le kalulut oloi golut Tuhan ka tubumui, pat obanangan isubuake kam, tapoi sangaminca nene aioba peile aiarepi panindogatku si Tuhan.

²⁰ Kisedda leu et kai Harun bulat magolu si Tuhan ka tubunia pat obanangan imateiakenia, iageti tiddouakekungan leu et nia ka sia.

²¹ Tularat jaui logam sigalaimui, ribbaiakekungannia ka obengan. Lepa pakataikungan samba tuddukungannia pat ailit bailiunangannia kele abu, samba ribbaiakekungan abu nenda ka sopak sipuguguruk sibara ka leleu nenda.

²² Kisedda leu et ka Tabera, Masa samba Kibrot-Taawa, anubaraake leu et kam golut Tuhan.

²³ Iageti ka teteret aikoiniake kam si Tuhan nukaddiuake kam Kades-Barnea nuei kam masikudduiji polak akenenNia ka tubumui, anusaggangi le kam parentat Tuhan Taikamanuamui; ta matonem bagamui samba ta mareddet kam ka tubuNia.

²⁴ Taddanangan akuagai kam, sarat masisaggangi si Tuhan le nugagalai kam.

²⁵ Ai le kuagai gegelaina si Tuhan imateiake kam. Iate lulunia akupurappo ka matat Tuhan epat pulu ngagogoi samba epat pulu ngasoibo burunia

²⁶ samba panindoukungan kise: Ale Tuhan Sipulubeunan, bui'an numateiake paamian bakkatNu nene, bangsa siarauakenenNu samba sibelaakeneNu ka Misir ka bagat ron samba gegem sabeu.

²⁷ Repdem le sapaguguletNu si Abraham, Ishak samba si Jakob, samba bui' nupuuku pukelakat paatuat, katai samba jodra bangsa nene.

²⁸ Ke bulat numamateiake le sia paamianNu, bailiu kuaddrangannia tai Misir ta momoi nuambit bangsam ka kupkumen laggai sipalelekNu katubutda. Bailoknia anuambit sia ka simatangeu bule numateiake sia le, kalulut malaga bagam katubutda.

²⁹ Tapoi repdem le, Tuhan, sia nene iate bangsa sipilim sibailiu paamianNu, samba anubelaake sia ka Misir ka bagat ron samba gegem sabeu.”