5Mos. 8 - BUKO SIPUNENAN

Polak pulaggaijat simaeru

¹ “Galaiake kam sangamberi surukat siakeku ka tubumui gogoi nene, bule imariuriu nupurimanua kam, ituppai igimui samba nukudduiji kam polak sipalelek Tuhan ka taikebbukatmui.

² Repdem kam! Epat pulu ngarura burunia aiuteake kam si Tuhan Taikamanuamui ka pusilaijat simareunan sisaliu simatangeu. Puenunganan nenda pinaatut Tuhan masisibo kam, bule ioi iitco aponia sibabara ka patuatmui samba ai leu pa reddetmui ka sangamberi parentaNia.

³ Obaakenangan nupulaje kam, lepa akenangan si Tuhan manna komenmui. Siburu kam samba taikebbukatmui ta'pei anukom kam komen nenda. Aigalaiake kisedda si Tuhan bule igelaiake kam, ta sarat ka komen rapuririmanua sirimanua, tapoi ka sangamberi tiboiet Tuhan leu.

⁴ Epat pulu ngarura burunia ta amakatai leppeimui samba ta amugo' reremui.

⁵ Repdem kam, si Tuhan masigelaiake kam kele sara ukkui igelaiake tatogania.

⁶ Oto galaiake kam sangamberi siparentaakenen Tuhan Takamanuamui. Kau nupurimanua kam siripot surukatNia samba kau nusuru kamNia.

⁷ Ambitnangan kam si Tuhan Taikamanuamui ka kupkumen laggai simagabru; laggai simaigi bagat oinan samba bubuakat oinan, sambat roirai sibara ka tei polak sipububuggra ka sangamberi tinambu samba ka sangamberi leleu.

⁸ Ka kupkumen laggai nenda maigi ibaraake sene ngamata gandum, anggur, buat ara, buat delima, loinat zaitun samba suat mani.

⁹ Sedda ta an mulalaje kam ele ai simagulai. Bukku bulaknia sibara laba, samba ka leleunia momoi nugaigai kam tembaga.

¹⁰ Pukommuian te geti pat sege bagamui, samba musura ka tubut Tuhan Taikamanuamui kalulut polak simagabru siakeNia ka tubumui.”

Tuparepdem sia bui' rakalipogi si Tuhan

¹¹ “Pasikeli kam, bui' nukalipogi kam Tuhan Taikamanuamui. Bui' nupabele kam berisara ka sangamberi surukatNia siakeku ka tubumui gogoi nene.

¹² Ke asegean bagamui mukom samba anugalaian kam lalepmui simaeru kudduatmui,

¹³ samba ke aituppaian jaui samba kambing dombamui, perak samba masmui samba leu sene ngamata pukayoat bakkatmui bagei,

¹⁴ jago kam sipulelelek bule bui' imabuak patuatmui samba nukalipogi kam Tuhan Taikamanumui sibelaake kam ka Misir, ka kudduat paoreijatmui.

¹⁵ Uteakenangan kam si Tuhan anupuenung kam ka simatangeu simalio samba pasimamatei, simaigi ulou simalaga son samba telenganga. Baraakenangan oinan ka polak simagarak sita'anai oinan, puguruknangan oinan sibara ka bukku, bule ioi isege bagamui mulo'.

¹⁶ Akenangan manna komenmui ka simatangeu, komen taiagaijetdra taikebbukatmui. Aigalai kele nenda si Tuhan iate masisibo kam samba masiepeake patuatmui, bule kalepakatnia oinangan igalai simaeru si Tuhan ka tubumui.

¹⁷ Oto, bui' nupaatu kam, kalulut sigalai samba ronmui le saramui anumakayo kam.

¹⁸ Repdem kam, Tuhan Taikamanua le amasiake pukayoatmui. Aigalaiake kele nenda si Tuhan kalulut teret kineneiget aipeile maririuiriuNia ka bagat palelengaNia ka taikebbukatmui.

¹⁹ Bui' nukalipogi kam Tuhan Taikamanuamui samba bui' nutut kam taikamanua bagei masibuluiji samba masipaguguletnake tubumui katubutda. Gogoi nene kuparepdem kam, ke nugalaiake kam, bulat mateiakenangan kam si Tuhan.

²⁰ Ke ta mareddet kam ka tubut Tuhan Taikamanuamui, mateiakenangan leu kam, kele bangsa sisubuakenenNia ka matamui.”