5Mos. 7 - BUKO SIPUNENAN

Paamian sipilit Taikamanua

¹ Iaambit te kam si Tuhan Taikamanuamui ka kupkumen laggai kudduijietmui, samba maigi bangsa tukekekle sedda, ka matamui leu keklenangan pitu bangsa bulat sabeu samba simaron bele peile ronmui, iate tai Het, Girgasi, Amori, Kanaan, Feris, Hewi samba Jebus.

² Ke aiakean bangsa-bangsa nenda ka bagat kupkumenmui samba kalaakemuian sia, mateiake le kam sia sangamberidra. Bui' imanuntu bagamui katubutda ele nugalai kam pakerekat bagamui.

³ Bui' nuputalimou kam katubutda, bui' nuobaake kam tatogamui raputalimou katubutda,

⁴ bule ta raareuake tatogamui kai Tuhan rabuluiji taikamanua bagei. Ke nupanindogi kam taikamanua bagei, pugolunangan si Tuhan samba subuakenangan kam.

⁵ Oto bukkatnake kam kudduat pasibuluat bangsa-bangsa nenda, pakatai kam arigit bukku oniakenendra simakerek, tadde kam tularat Asyera, samba labomuian sangamberi tularat panindogietdra.

⁶ Galaiake kam sangamberinia nenda, kalulut si Tuhan poi sibakkat kam. Ka sangamberi bangsa ka sangaliot polak, kam le aipili Tuhan Taikamanuamui ibailiu paamian simanuntnu bagania.

⁷ Aipununtuki samba aipilingan kam si Tuhan, ta kalulut kam peile sabeu ka bangsa bagei; bangsa bulat sigoiso le kam ka polak nene.

⁸ Tapoi pilinangan kam si Tuhan kalulut nunutut bagaNia ka tubumui samba ioba iake siripokat sipalelekNia ka taikebbukatmui. Iate lulunia aiarauake kam ka bagat gege sabeu samba masibelaake kam ka paoreijat ka rimata Misir.

⁹ Repdem kam sarat sarania le Tuhan Taikamanuamui, samba Nia te Taikamanua simatopit. Sutnakenangan si Tuhan sipalelekNia samba ipakoinong nuntut bagaNia simariuriu teret aili sangaribu reddenan ka sirimanua simanununtu baga ka tubuNia samba simareddet ka sangamberi parentaNia.

¹⁰ Tapoi iuukumake le sangamberi sirimanua simalaga baga ka tubuNia.

¹¹ Oto, kau nureddet kam sangamberi surukat sisegeakenenku ka tubumui ka gogoi nene.”

Panukanan ka sirimanua simareddet

¹² “Ke nulelekngake kam sangamberi parenta nene, samba nugalaiake kamnia ka bagat riuriu topit, oto matopitnangan leu te Tuhan Taikamanuamui ka palelengan sigalaiNia ka tubumui. Patoilanangan nuntut bagaNia simariuriu ka tubumui, kele sipalelekNia ka taikebbukatmui.

¹³ Pununtukinangan kam baga samba panukaninangan kam, bailiu maiginangan tatogamui samba tuppainangan igimui. Panukaninangan sangamberi monemui, bailiu bara gandum, anggur samba tulat zaitun. Panukaninangan leu kam bailiu maiginangan jaui samba kambing dombamui. Sangamberi panukanan nenda nusisilo kam ka kupkumen laggai akenen Tuhan ka tubumui, kele sipalelekNia ka taikebbukatmui.

¹⁴ Sangamberidra bangsa ka polak, berisara sia sisilo panukanan sipususukkra kele ka kam. Ka sangamberimui samba ka tarimeumui ta anai berisara simalatuk tubu.

¹⁵ Isasakkeri te kam si Tuhan ka sangamberi besi' samba areuakenangan sangamberi gejat baga kele siitcomui ka Misir, tapoi sangamberi gejat baga nenda orakngakenanganNia katubutda tai saggakmui.

¹⁶ Senen bangsa siaket Tuhan Taikamanuamui ka bagat kupkumenmui bui' ta numateiake kam sia; bui' nupakoinong kam nuntut bagamui katubutda. Bui' nupanindogi kam taikamanuandra, kalulut galajet nenda sibaraake kamateiatmui le.

¹⁷ Ke nukua kam ka paatuatmui; bangsa-bangsa nenda peile maigi ka kam bailiu ta momoi nukekle kam sia.

¹⁸ Tapoi bui' numaloto kam katubutda. Repdem kam aponia sigalai Tuhan Taikamanuamui ka tubut rimata Misir samba ka sarakyatnia.

¹⁹ Repdem kam sangamberi gejat baga sabeu siitcomui, sangamberi kiseiet, samba ron sabeu sipakei Tuhan Taikamanuamui aibelaake kam. Kele kisedda te igagalai si Tuhan Taikamanuamui ka sangamberi bangsa kalotoakenenmui.

²⁰ Ibabaraake te si Tuhan Taikamanuamui katuge'gekat ka talagadra, bailiu sangamberi sirimanua sipututuitui samba sipulilipput matei leu et sia.

²¹ Oto bui' numaloto kam ka tai bangsa nenda. Ai ka talagamui si Tuhan Taikamanuamui masijago kam. Nia te Taikamanua siabeu samba kalotoakenen.

²² Keklenangan leu bangsa pasasara nenda si Tuhan ka matamui. Bui' nusubuake kam sia simaruei, bule sangamberi tarimeu simasabbak bui' ituppai igitdra samba ibailiu kalotoakenenmui.

²³ Kisedda te iake saggakmui si Tuhan Taikamanuamui ka tubumui. Pasaragainangan leu sia teret matei sia.

²⁴ Iaake te sangamberi rimatadra ka tubumui. Mateiakemuian sia, bailiu kalipogidrangan oninda. Ta' anai simagege ka tubumui; sangamberidra mateiakemuian sia.

²⁵ Palaboki kam sangamberi tularat panindogietdra. Bui' iala bagamui perak ele mas sipuettet ka tubunia samba bui' nuala kamnia ka kam. Ke nupasabau kam parenta nenda mateimuian leu et, aipoi si Tuhan Taikamanuamui malaga bagania ka sirimanua sipanindogi tularat sabulungan.

²⁶ Bui' nugalakngake kam sara tularat sabulungan samba ka bagat lalepmui, bule pateleijat sioraknia bui' iorak kam ka kam. Kau imalaga bagamui samba masiputata sabulungan nenda samba kau nuputata kamnia, kalulut aiteleiat si Tuhan.”