5Mos. 6 - BUKO SIPUNENAN

Surukat bulat siabeu

¹ “Aikoiniake aku Tuhan Taikamanuamui masigelaiake kam sangamberi surukat nene bule nugalaiake kam nia ka kupkumen laggai tat mauuju nukudduiji kam nia.

² Kau nusuru samba sapunuteteunu masisuru Tuhan Taikamanuamui samba masireddet surukatNia sisegeakenenku ka tubumui, bule imananta purimanuaiatmui ka kupkumen laggai nenda.

³ Kalulut nene arepi kam sasaraina, galaiake kam ka bagat riuriu topit, bule imaeru puririmanuamui samba ibailiu kam bangsa sabeu ka laggai simakayo samba simaeru, kele sipalelekngakenen Tuhan Taikamanuamui ka taikebbukatta.

⁴ Ale kam sasaraina, arep kam! sarat si Tuhan, samba si Tuhan le sarania Taikamanuanta!

⁵ Kau imanuntu bagamui kai Tuhan Taikamanuamui ka sangaliot patuatmui: patoila kam ka enungan puririmanuamui samba ka galaiakenenmui:

⁶ Bulat bui' nukalipogi kam sangamberi parenta siakeku ka tubumui ka gogoi nene.

⁷ Gelaiake kam ka tatogamui. Kau nutiboi kam nia ka bagat lalep ele ka puenunganmui, ele ai nuariake kam tubumui ele ai kam mugagalai.

⁸ Appraake kam ka paramui samba kau kam ka baramui bule imariuriu nurepdem kam nia.

⁹ Suratnake kam ka arigit matatbaliu lalepmui samba ka matatbaliu gugurukat.”

Paasekat ka bagat pasisasabau

¹⁰ “Aigalaian palelengan si Tuhan Taikamanuamui ka tubut taikebbukatmui si Abraham, si Ishak samba si Jakob, aakena kupkumen laggai nenda ka tubumui. Sangamberi laggai sabeu samba simakayo, samba ta kam masiririoke.

¹¹ Sangamberi lalepmui sut le bibilet simaeru, ta sibaraakenenmui. Sesemuian uggungan, ta sigaigaimui. Sesemuian monen anggur samba zaitun, ta siurepmui. Oto ke' aiambitnan kam si Tuhan ka kupkumen laggai nenda, baranangan leu sangamberi komen kiddiet bagamui,

¹² repdem kam sipulelelek, bule bui' nukalipogi kam Tuhan sibelaake kam ka Misir, ka kudduat paoreijatmui.

¹³ Suru' kam si Tuhan, Taikamanuamui, samba sarat Nia le panindogietmui, samba ke' musuppa kam, galaiake kam ka oniNia.

¹⁴ Bui' nupanindogi kam taikamanua bagei kele panindogietdra tai bangsa-bangsa bagei sikukuddu ka be'bemui.

¹⁵ Ke' nupanindogi kam taikamanua bagei, oraknangan kam golu samba subuakenangan kam Tuhan Taikamanuamui, aipoi Tuhan Taikamanuamui sikuddu ka talagamui ta ioba tupakereakenia ka tubut apapa.

¹⁶ Bui' nusibo kam Tuhan Taikamanuamui kele sigalaiakenenmui ka Masa.

¹⁷ Reddet kam sangamberi surukat siaket Tuhan Taikamanuamui ka tubumui.

¹⁸ Galaiake le kam simaeru samba puroipoat siripot obaket bagat Tuhan, iageti maerunangan leu purimanuaiatmui. Polak simagabru sipalelek Tuhan ka taikebbukatmui, bailiunangan leunia bakkatmui,

¹⁹ samba keklemuian saggakmui kele sipalelekngakenen Tuhan.

²⁰ Ka gogoi sibabara parerere' te tatogamui ka tubumui, “Angoi ikokoiniake sita Tuhan Taikamanunta masireddet sangamberi surukat nenda?”

²¹ Oto bui' ta nualegi kam kise, “Siburu sita iate pagugulet rimata Misir, lepa geti belaakenangan sita si Tuhan ka bagat gege sabeu.

²² Akuitcoan kai kiseiet sigalaiakenen Tuhan samba kamateiat katubutda tai Misir samba rimatadra samba leu siabeu kapurimataatnia.

²³ Nia te amasibelaake sita ka Misir bule iambit sita sene, samba polak nene akenenNia ka tubutta kele sipalelekngakenenNia ka taikebbukatta.

²⁴ Tuhan Taikamanuanta masikoiniake sita bule tasuru'Nia samba tagalaiake sangamberi parentaNia. Ke tagalaiake kele nene, pasikelinangan leu bangsatta bule imariuriu erut puririmanuania.

²⁵ Ke mariuriu tagalaiake kam sangamberi siparentaakenen Tuhan Taikamanua ka tubutta, iageti obanangan sita.”