5Mos. 5 - BUKO SIPUNENAN

Surukat Taikamanua sipulungamata

¹ Ruruakenangan sia si Mose sangamberi bangsa Israel, lepa kuanangan katubutda, “Kam sasaraina, arep kam sangamberi surukat siakeku ka kam kineneiget. Gelai kam surukat nenda, samba galaiake kam simariuriu.

² Ka leleu Sinai si Tuhan Taikamanuanta masigalai sara palelengan,

³ ta sarat ka taikebbukatta, tapoi ka sita leu et sibabara sene kineneiget.

⁴ Ka bagat obengan ka uddut leleu ioba si Tuhan manibo bulat ka tubumui.

⁵ Tapoi kalulut maloto kam ka obengan samba ta magege kam masitatra leleu, oto puriokungan ka talagamui masitalagaiji kam sambat Tuhan bule kusegeake kuanenNia ka tubumui. Kuanangan si Tuhan,

⁶ “Aku te Tuhan Taikamanuamui sibelaake kam ka laggai Misir, ka kudduat arapaoreiji kam.

⁷ Bui' nupanindogi kam taikamanua bagei. Sarat Aku le nupaninindogi kam.

⁸ Bui' nugalai kam tularat apapa sibara ka manua, ka polak ele ka bagat oinan ka tei polak.

⁹ Bui' nupanindogi kam tularat kele nenda kalulut Aku Tuhan Taikamanuamui samba ta koba nupakereake kam aku ka tubut apapa. Kuukumake te sia sangamberi sirimanua simalaga baga katubukKu teret reddenan sika telu samba sika epat.

¹⁰ Tapoi kupatoila le nuntut bagaKu katubutda sipuriribu reddenan ka sirimanua simanuntu baga ka tubuKu samba simareddet ka parentaKu.

¹¹ Bui' nutiboi kam oningKu siboboi, aipoi Aku te Tuhan Taikamanuamui, Kuukumake te sia sipakei oningKu ta kasiripokatnia.

¹² Puneni kam gogoi Sabat samba suru' kam siripot gogoi sipunenan, aipoi Aku te Tuhan Taikamanuamui amasiparentaake kam.

¹³ Akuakean enem ngagogoi pugalaijananmui,

¹⁴ tapoi ka gogoi sika pitunia iate gogoi puariat sikokoiakenen Kaku, Tuhan Taikamanumui. Ka gogoi nenda ta momoi berisara sia sirimanua sipugagalai, kam samba leu tatogamui, sapaguguletmui, tarimeumui ele sitoi sikuddu ka kupkumen laggaimui. Bui' ta muari sia sapaguguletmui kele ka kam.

¹⁵ Repdem kam atupaguguletnake kam siburu ka Misir, lepa belaakenangan kam si Tuhan Taikamanuamui ka bagat ron sabeu. Kalulut nene Kuparentaake kam masipuneni gogoi Sabat.

¹⁶ Suru' samba pasikeli kam sia saukkui samba sainamui. Iate parentaKu, Tuhan Taikamanuamui, bule imaeru puririmanuamui samba imananta puririmanuamui ka kupkumen laggai akenenKu katubumui.

¹⁷ Bui' nupamatei.

¹⁸ Bui' nupaelet.

¹⁹ Bui' nupanangkou.

²⁰ Bui' numunengake boko masipakatai sirimanua sabagei.

²¹ Bui' imakiddi bagam ka bakkatdra sabagei: lalepnia, polaknia, sinanalepnia, sapaguguletnia, tarimeunia, kaliddeinia ele apapa sibabara bakkatnia.”

²² Nene te parentat Tuhan ka tubumui ka teteret anuparuru' kam ka leleu. Ka teteret aipanibo ka nganga sipugogong ka obengan samba ka tinobut simakeppu, akenangan sangamberi parenta, samba ta apapa bagei. Lepa suratnangania ka rua bukku lei' samba akenangannia ka tubuku.”

Pulotokatdra tai Israel

²³ “Ka teteret aipujuluu sangalio leleu samba anuarep kam nganga ka bagat gepgep, oi sia sangamberi sipuute ka sukumui samba sikebbukat laggai ka tubuku.

²⁴ Kuarangannia, “Aipatoilaan si Tuhan Taikamanuanta pubebeunan samba pulatcananNia ka teteret akuarep kai aipanibo ka bagat obengan. Ka gogoi nene ataitcoan momoi rapurimanua sirimanua, kenanen amanibongan Taikamanua ka tubunia.

²⁵ Tapoi angoian le kububuluake kai minca engamai? Obengan sabeu nenda te geti masisusubuake kai! Matonem bagamai mamatei te kai geti ke kuarep kai ipanibo minca si Tuhan Taikamanua.

²⁶ Ai leu pa sirimanua simariuriu murimanua lepat aiarep aipanibo Taikamanua sipuririmanua ka bagat obengan?

²⁷ Kalulut neneda, ei si Mose, arepmake kam sangamberi sikuat Tuhan Taikamanuanta, lepa segeakenangannia ka tubumai aponia sikuaNia ka tubumui. Aileu kuarepi kai nia samba kureddet kai nia.”

²⁸ Kele aiarepnia, kuanangan si Tuhan ka tubuku, “Akuarepman apa sikuatdra bangsa nene, samba seneseat le sikuatdra.

²⁹ Ke' kele kasedda bai rapupaatuat! Mariuriu rasuru' Aku samba rareddet parentaKu, maerunangan puririmanuandra samba purimanuaiatdra sapunuteteura teret buru-buru!

³⁰ Kenan kineneiget samba koiniake bangsa nene ratoili ka kemandra sene-senendra.

³¹ Tapoi ekeu, Mose, toiliake ekeu samba kuddu sene pasamba Aku. Bule kuake ka tubum sangamberi surukat samba parentaKu. Gelaiake katubutda, bule rareddetnia ka kupkumen laggai kaunenKu katubutda.”

³² Ale kam sasaraina, reddet kam ka bagat topit sangamberi siparentaakenen Tuhan Taikamanuamui ka tubumui. Bui' nupasabau kam berisara sangamberi parentaKu.

³³ Galaiake kam sangamberi siparentaakenen Tuhan Taikamanuamui ka tubumui bule imaeru puririmanuamui samba ioi nukuddu kam simariuriu ka kupkumen laggai kuddujietmui.”