5Mos. 4 - BUKO SIPUNENAN

Pananakat Mose bule ramareddet tai Israel

¹ Iageti kuanangan katubutda tai Israel si Mose, “Reddet kam sangamberi surukat sigelaiakenenku katubumui, bule ioi nupurimanua kam teret nukudduiji kam polak akenen Tuhan, Taikamnauandra taikebbukatmui, katubumui.

² Apa siparentaakenenku, bui' nutuppai ele nupabele' kam beri goiso. Reddet kam sangamberi parentat Tuhan Taikamanuamui siakeku ka tubumui.

³ Anuitcoan kam apa sigalai Tuhan Taikamanuamui ka leleu Peor. Senen sirimanua sipasibuluiji Baal ka kuduat nenda subuakenangan sia,

⁴ tapoi kam simariuriu topit ka tubut Tuhan Taikamanuamui aipeile kam muririmanua teret kineneiget.

⁵ Sangamberi surukat nenda akugelaiakeat ka tubumui kele siparentaakenen Tuhan Taiakamanuangku. Kau nureddet kam sangamberinia nenda ai kam ka kupkumen laggai gurukietmui samba kuddujietmui.

⁶ Galaiake kam nenda ka bagat topit. Ke' nugalaiake bai kam, matoilanangan pusisikut patuatmui ka matadra tai bangsa-bangsa bagei. Ke raarep pagalaiat surukat nenda, kuarangannia, “Apate sikut patuat samba agaira bangsa sabeu nenda!”

⁷ Kasei pa bangsa sabeu sibara taikamanua simakope legre ka tubunia ke tasogainia kele Tuhan Taikamanuanta legrenia ka tubutta? Pigamoi tapusoga tatiddou paroman ka tubuNia arepinangannia.

⁸ Samba kasei pa bangsa sabeu sibara surukat simakope roipo kele surukat sigelaiakenenku ka tubumui gogoi nene?

⁹ Lelekngake samba repdem kam sipulelek, bule ka sanganantat purimanuaiatmui ta nukakalipogi kam sangamberinia siitcomui. Pungunguanake kam ka tatogamui samba ka sapunuteteumui

¹⁰ pagalaiat gogoi nenda, ka teteret anupurio kam ka matat Tuhan Taikamanuamui ka leleu Sinai. Ka teteret nenda kuanangan ka matamui, “Ruruake kam bangsa nene. Kuoba raarep aponia segeakenenKu, bule ragelai mureddet ka tubuKu ka sanganantat purimanuaiatdra, samba bule ragelaiake tatogatdra mureddet ka tubuKu.”

¹¹ Pungunguanake kam ka tatogamui kipa anuei samba anupurio kam ka reret leleu sibara kujuk simagepgep kele tinobut simakeppu samba obengannia sipujujuluu siaili ka manua.

¹² Lepa panibonangan si Tuhan ka talagat obengan samba arepimuian ngangaNia, tapoi ta anuitco kam kipa putubuatnia.

¹³ Sedda te aisegeakeNia ka matamui aponia galaiakenenmui bule numareddet kam ka palelengan siparentaakenenNia galaiakenenmui. Surukat sipulu ngamata sinuratnakenenNia ka rua bukku lei' nenda, bulat bui'ta nureddet kam.

¹⁴ Koiniakenangan aku si Tuhan masigelaiake sangamberi surukat reddenenmui ka kupkumen laggai gurukiet samba kudduijietmui geti.”

Tuparepdep bule bui' rabuluiji taikamanua bagei

¹⁵ “Repdem kam sipulelelek! Ka teteret aipanibo si Tuhan ka tubumui ka bagat obengan ka leleu Sinai, ta anuitco kam apapa.

¹⁶ Oto bulat jago kam tubumui bui' ibara jomui kalulut nugalai kam tularat panindogietmui ele kipapa tubunia, simanteu ele sinanalep,

¹⁷ siputubu tarimeu ka polak, ele siputubu uma sitububurut ka manua,

¹⁸ ele siputubu tarimeu sipugugurui ka uddut polak, ele siputubu iba ka bagat oinan ka tei polak.

¹⁹ Bui' numajo kam kalulut pasisibuluiji samba nupaguguletnake kam tubumui ka tubut apa siitcomui ka manua: matatsulu, laggo samba panyanyat. Tuhan Taikamanuamui masiobaake bangsa bagei masipanindogi sangamberinia nenda.

²⁰ Tapoi kam iate bangsa sibelaakenenNia ka Misir, ka kudduat pangoringanmui bulat sikatai besi'. Ambitnangan kam baramui ka Misir, bule ibailiu kam bangsaNia kele puririmanuamui kineneiget.

²¹ Tapoi bailiu bara goluNia si Tuhan Taikamanuamui ka tubuku kalulumui, pusuppanangan ta an kutatalipoki kaku bagat oinan Jordan kuguruki polak simagabru akenenNia ka tubumui.

²² Ta' an mauju nuputalipo kam samba masikudduiji polak simagabru. Tapoi kaku geti ta momoi kutut kam, aipoi mamateian le aku sene.

²³ Repdem kam sipulelelek! Bui' nukalipogi kam palelengan Tuhan Taikamanuamu ka tubumui. Reddet kam parentaNia! Bulat bui' nugalai kam tularat kele kipapa tubunia panindogietmui,

²⁴ aipoi Tuhan Taikamanuamui kele obengan sipasilalabo le. Ta' ioba tupakereakeNia ka bagei.

²⁵ Samba leu ke amaburuan nukuddu kam ka kupkumen laggai nenda samba aian tatoga samba sapunuteteumui, bui' ibara jomui kalulut nugalai kam tularat ele kipa pa putubuatnia. Aipoi galajet nenda bulat sara jo ka matat Tuhan Taikamanuamui samba sibaraake pugolukatNia le.

²⁶ Bule manua samba polak ka gogoi nene ibailiu sipasimunengake ke ta mareddet kam ka tubuku, ta mauju numasubu kam ka polak kudduijietmui ka silat bagat oinan Jordan. Ta' mabuburu nukuddu kam sedda, kalulut tusubuake le kam sangamberimui.

²⁷ Pasabunangan kam si Tuhan ka talagadra tai bangsa-bangsa bagei samba goisoan le kam muririmanua.

²⁸ Oto sedda paguguletnakemuian tubumui ka taikamanua sigalai kabei sirimanua, taikamanua sigalai ka loina samba ka bukku sita' momoi ipasiitco ele masiarep, ta momoi ipukom ele masiping.

²⁹ Lepa gabamuian Tuhan Taikamanuamui, samba ke' nugaba kamNia bulat sibara ka muinet paatuatmui, sesemuianNia.

³⁰ Ke iorak kam sangamberi pugejaat baga samba ai kam ka bagat puokkiman, iageti toili kam ka tubut Tuhan Taikamanuamui samba mureddet ka tubuNia.

³¹ Tuhan Taikamanuamui iate Taikamanua simakope nuntut baga. Ta' ikakaddiuake ele isusubuake kam, ele ikalipogi palelengan sigalaiNia pasamba taikebbukatmui.

³² Lelekngake kam siburu, ainan ta'pei amutu'tu matamui, barania ka gogoi aitaddaake aigalai sirimanua Taikamanua ka polak nene. Gaba kam ka sangalio polak. Ai pa sipuaaili kele nene bulat simakope kisei ka bagatta ka teteret siburu? Ai pa araarep pagalaiat sibabara kele nene?

³³ Ai pa bangsa simariuriu murimanua lepat aiarep aipanibo ai taikamanua katubutda ka obengan, kele sipuaili ka kam?

³⁴ Ai leu pa sara taikamanua simagege masioppu sara bangsa lepa bailiuakenangannia bangsania, kele sigalaiakenen Tuhan Taikamanuamui ka tubumui ka Misir? Anuitcoan kam kipa aigalai Taikamanua ka bagat ronNia sabeu sibaraake kamateiat samba pasaggangan, sigalai sangamberi kiseiet samba sigalai bulat kiseiet sabeu.

³⁵ Sangamberinia nenda ipatoila ka tubumui bulat sarat si Tuhan le Taikamanua, bulat ta anai sabagei.

³⁶ Ka manua paarepnangan ngangaNia ka tubumui ipangantoman kam; ka polak nene leu aipatoilaan ka tubumui obenganNia sabeu, samba panibonangan ka tubumui ka bagat obengan.

³⁷ Kalulut nuntut bagaNia ka taikebbukatmui, oto pilinangan kam; ka bagat gegeNia bulat simaron belaakenangan kam ka Misir.

³⁸ Bangsa-bangsa sabeu samba simaron keklenangan sia ka matamui, bule itaroake kam ka laggai akenenNia katubumui, kupkumen laggai kudduijietmui kineneiget.

³⁹ Kalulut nene kau nuagai kamnia samba bui' nukalipogi kamnia: sarania le Tuhan Taikamanua ka manua samba ka polak; samba ta anai sabagei.

⁴⁰ Reddet kam sangamberi surukat siakeku ka tubumui kineneiget, bailiu maleleknangan puririmanuamui samba sapunuteteumui, samba riuriu nupurimanua kam ka laggai akenen Tuhan Taikamanuamui sibailiu ikepmakenenmui teret buru-buru.”

Laggai oniakenen sipasisakkeri ka saigit kabelaiat sulu bagat oinan Jordan

⁴¹ Lepa sausaunangan telu laggai si Mose ka saigit kabelaiat sulu bagat oinan Jordan

⁴² ibailiu laggai sipasisakkeri, iate kudduat pulippunanda sirimanua simateiake sirimanua ta saggaknia ke ta sipalit bagania. Momoi ituituiake tubunia iei ka sara laggai nenda bule bui' ramateiakenia ka sia.

⁴³ Ka sia suku Ruben tutarekngake laggai Bezer ka kudduat simabuak simatangeu, ka suku Gad laggai Ramot tutrekngake kupkumen laggai Gilead, samba ka suku Manasye laggai Golan ka kupkumen laggai Basan.

Tukau surukat Taikamanua katubutda tai Israel

⁴⁴ Lepa kaunangan si Mose surukat samba siteukenen Taikamanua katubutda tai Israel.

⁴⁵ Aigalaiake kele nene ka teteret arabela ka laggai Misir,

⁴⁶ samba ai sia ka peleu ka saigit kabelajat sulu bagat oinan Jordan, sipamamatai ka laggai Bet-Peor ka laggai Sihon. Kupkumen laggai nenda legei laggai Sihon, rimatadda tai Amori, sipuute siburu ka laggai Hesybon. Si Mose samba bangsa Israel masikalaake sia ka teteret arabela ka laggai Misir.

⁴⁷ Kudduijirangan laggai Rimata Sihon, samba leu polak Rimata Og sibara ka Basan, sara rimatadda tai Amori bagei sikukuddu ka saigit ka kabelaiat sulu bagat oinan Jordan.

⁴⁸ Polak nenda ai murikdingan barania ka laggai Aroër ka be'bet bagat oinan Arnon, riuriu ka bare' pat aili ka leleu Siryon, iate leleu Hermon,

⁴⁹ samba sangamberi kupkumen laggai ka saigit kabelaiat sulu bagat oinan Jordan ka kaiaman pat aili ka Koat Simamatei ka reret leleu Pisga.