5Mos. 34 - BUKO SIPUNENAN

Kamateiat Mose

¹ Lepa kaddiuakenangan su'sut Moab si Mose samba tatrania ka leleu Nebo, ka uddut tu'tut leleu Pisga ka saigit kabelekat sulu Jerikho. Lepa patoilanangan ka tubunia si Tuhan sangalio kupkumen laggai nenda, iate: kupkumen laggai Gilead isit ka bare' pat aili ka kupkumen laggai Dan,

² kupkumen laggai Naftali, kupkumen laggai Efraim samba Manasye, laggai Jehuda isit kabelekat sulu pat aili ka Koat Tenga,

³ rubeiat isit kaiaman Jehuda samba su'su simabaoi barania ka Zoar aili ka Jerikho, laggai simaigi loinat kurma.

⁴ Lepa kuanangan si Tuhan kai Mose, “Nenda te polak sipalelekngakenenKu kai Abraham, Ishak samba kai Jakob addeat kaunen ka muntogatdra. Kupakoinongnia ka tubum, Mose, tapoi ta tuobaake nuei sedda.”

⁵ Lepa matei si Mose, pagugulet Tuhan, ka polak Moab, kele sikuat Tuhan siboiki.

⁶ Rateiakenangannia si Tuhan ka sara peleu leleu ka Moab ka silat laggai Bet-Peor, tapoi teret gogoi nene ta anai berisara siagai kaipa bulat kudduat rateinia.

⁷ Sangotu ruapuluh ngarurania si Mose, ka teteret aimatei. Ta' aibeleki ron tubu samba itcot matania.

⁸ Telu pulu ngagogoi burunia arapureureu baga samba arasoibi si Mose tai Israel ka su'sut Moab.

⁹ Iageti masunnangan ka tubut Josua togat Nun ketcat pusisikut patuat, kalulut aisausauan poi nia si Mose sibailiu silinia. Mareddet sia bangsa Israel ka tubut Josua samba ragalaiake parenta sikau Tuhan katubutda sisegeakenenNia kai Mose.

¹⁰ Ka Israel ta an anai nabi kele si Mose sipatiboake si Tuhan.

¹¹ Ta' an anai sigalaiake pukerengan kele sigalaiakenen Mose ka laggai Misir, rimatania samba sipugagalai ka purimataatnia kele parentat Tuhan.

¹² Ta' anai sigalaiake galajet sisaliu ron sirimanua kele sigalaiakenen Mose ka matadra tai Israel.