5Mos. 33 - BUKO SIPUNENAN

Si Mose masisukatnake sangamberi suku Israel

¹ Kepei matei si Mose pagugulet Taikamanua, sukatnakenangan bangsa Israel, pasamba tiboiet kele nene:

² “Moi si Tuhan baraNia ka leleu Sinai, belaNia ka uddut Edom kele sulu samba sibara ka leleu Paran itoroiji paamianNia. Pulu ribu samalaika masipaaleiNia, ka saigit kaikattoetNia ai obengan sipujujuluu.

³ Bulatnia, manuntu bagat Tuhan ka bangsaNia. Jagonangan sangamberi sirimanua sibailiu bakkatNia. Kauan tapurappo kam ka rereNia samba tareddet sangamberi parentaNia.

⁴ Tareddet surukat siaket Mose, sibailiu sara bakkatiet bangsa simakeppu saki.

⁵ Kateteret araparuru tai Israel sambatdra sikebbukat laggai, Tuhan ibailiu Rimata ka paamianNia.”

⁶ Pagalaiat suku Ruben, kuanangan si Mose: “Bule ta mamatei tai suku Ruben, kenanen ta maigi sia.”

⁷ Kuanangan leu si Mose pagalaiat suku Jehuda, “Tuhan, arepmake ngangandra tai Jehuda, bailiuake le sia rapusara minca ka bangsadra. Pasaggak le ka rubeiatdra, oi Tuhan ropmake sia ka tai saggak.

⁸ Pagalaiat suku Lewi, kuanangannia: Pasamba Urim samba Tumim Nupakoinong obaket bagam, ka tai Lewi, sapaguguletNu simariuriu mutopit. Anusibongan sia ka Masa, samba nupaukkleake sia ka bubuakat Meriba.

⁹ Mariuriu topitdra ka tubum bele pei sangamberinia, bele pei saukkui-saina samba saeppudra. Reddetdrangan sangamberi parentam, galaiakerangan sangamberi palelenganNu.

¹⁰ Ragelaiake sapaamianNu mureddet ka sangamberi parentam samba masipanguruatnake buluakenen ka uddut kudduat pasibuluatNu.

¹¹ Tuhan, ropmake suku nene bule ramaron, bule ioba bagam ka galajetdra. Mateiake le sangamberi saggakdra bailiu ta'an momoi ratusuru minca.”

¹² Kuanangan leu pagalaiat suku Benjamin: “Suku nene te simanuntu bagat Tuhan. Ijago le sia sinago samba sinoibo samba mukuddu ka talagatdra.

¹³ Pagalaiat muntogat Josep, kuanangannia: “Bule si Tuhan masisukatnake polakdra pasamba urat, samba oinan sibara ka tei polak.

¹⁴ Bule senen tetere pubuaijat musukkra le buat kaju bulat bua simaeru simamara ka buttetnia.

¹⁵ Bule sangamberi tinambunia barania ka siburu sun le buat siureman bulat simaeru.

¹⁶ Bule musukkra ka polaknia sangamberi simakope eru, samba tusukatnake kalulut pueerut Tuhan samba sipaninibo sibara ka bakkat rui sipujujuluu. Bule panukanan nenda tugorosot ka muntogat Josep, kalulut nia poi ute ka talagadra sasarainania.

¹⁷ Ai puroron Josep sangamuneng banteng, samba ban jaui leleu simanteu iate sipuriribu Manasye samba sipupulu ribu Efraim. Isukkaiake bangsa-bangsa samba itukkluake sia pat aili ka tu'tut polak.”

¹⁸ Pagalaiat suku-suku Zebulon samba Isakhar, kuanangannia: “Bule makayo Zebulon kalulut puenunganannia, samba Isakhar masanang sia ka sangamberi kemandra.

¹⁹ Sogairangan bangsa-bangsa ka leleura samba sedda panguruatnakerangan buluakenen simaroipo. Silorangan pukayoat sibara ka koat, samba sibara ka ngai sanganantat bebet koat.”

²⁰ Pagalaiat suku Gad, kuanangannia: “Tuumunnake le Taikamanua sipasilioake kupkumen laggaira tai Gad. Ai rangengena tai Gad kele sangamuneng singa sioba masipabirit kabei ele kulit ute.

²¹ Alarangan polak simaeru bailiu bakkatda rubeiatdra saute tukau katubutda. Galaiakerangan sangamberi parenta samba surukat Tuhan ka teteret araparuru simakere sikebbukat laggai Israel.”

²² Kuanangan leu pagalaiat suku Dan, kise: “Suku Dan kele sangamuneng singa sibautubu sipuattat ibela barania ka Basan.”

²³ Kuanangan leu pagalaiat suku Naftali: “Tupasukra panukanan samba katet bagat Tuhan katubutda tai Naftali, kupkumen laggaira barania ka Paot Galilea pat aili ka isit kaiaman.”

²⁴ Kunangan pagalaiat suku Asyer, kise: “Tupanukani le suku Asyer bele peile suku-suku bagei. Bule ibailiunia kilibet bagatdra sasarainania, samba mutu'tu loinat zaitun simaeru ka polakdra.

²⁵ Bule sangamberi laggaira tujago, pasamba sangamberi matatbaliu gugurukat tembaga samba laba bule imariuriu sanang samba erut puririmanuandra.”

²⁶ Ale Israel! Ta' anai taikamanua kele Taikamanuamui. Isilaiji manua ka bagat pubebeunanNia samba ienungi tanai rusa bule iropmake kam.

²⁷ Taikamanua sitaitatata ibailiu sijago kam, kabeiNia sitaimasususu masisopo kam. Usiakenangan saggak ka matamui, samba ikoiniake kam masisubuake sia.

²⁸ Iageti maerunangan puririmauandra muntogat Jakob, ka laggai sipususukra gandum samba suat anggur, samba igurungi tinobut sibara ka manua.

²⁹ Mauktuk te kam, ale Israel! Ta' anai bangsa kele kam siarauakenen Tuhan. Si Tuhan kele lanjau samba korabbimui, bule iropmake samba iake kamanangan ka tubumui. Momoi te geti tai saggakmui masitiddou pununtuat baga, samba paperakimuian sia.