5Mos. 32 - BUKO SIPUNENAN

¹ Arep pei, ale manua, ai obaku manibo, ale polak, tongiake talingam!

² Bule kele ibele urat itugorosot ngantomanku, samba kele lolo itubaibai tiboietku kele urat simakining ka uddut se'se samba kele urat simatirit ka sangamberi siureman.

³ Kuumun le geti onin Tuhan. Paagai kam pubebeunan Taikamanuanta!

⁴ Tuhan siropmake ekeu simagege, simasappru eru sigalaiNia, samba maroipo sangamberi enunganNia. Taikamanuamui simariuriu topit, ta anai patajuat ka tubuNia, Nia masigalaiake simaeru samba sineseat.

⁵ Tapoi kam iate bangsa sitaimariuriu topit, samba ta'an mateu ibailiu kam minca paamianNia, bangsa simasun patajuat samba jo.

⁶ Kisedda pa nusiliake kam erut Tuhan, ale kam sirimanua sitaiagai patuat samba sita' patuat? Ta' pa Nia Ukkuimui, sibaraake kam, sibailiuake kam sara bangsa?

⁷ Repdep kam ka teteret siburu, lelekngake kam ka teteret reddenan situsasabau. Parereake kam ka saukkui-inamui, bule rapaagainia ka tubumui.

⁸ Ka teteret airubeiake polak Sipulubeunan, senen bangsa tuteuake laggai kupkumennia ka bagat sara bulungan sibailiu ute.

⁹ Tapoi sapunuteteu Jakob nene ipili sia si Tuhan bailiu bakkatNia.

¹⁰ Ailinangan sia ka pueppangan ka sara kudduat simatangeu simase'se. Lepa jagonangan sia samba leu et pasikelinangan sia samba puukunangan sia kele bakkatNia.

¹¹ Kele manyang sigelaiake togania tuburut isilo'nia ka kapponia situnganga'nga samba ioreknia ka uddut kapponia,

¹² kise te iuteake paamianNia si Tuhan, ta anai bulungan bagei masipaalei sia.

¹³ Kaunangan sia raikepmake sangamberi leleu; komrangan buat siureman ka mone, samba lo'rangan suat manin leleu sibara ka tinambu simabukku. Bara tulatdra sibara ka loinat zaitun sipututu'tu ka polak simabukku.

¹⁴ Jaui samba leu et kambing biribiridra maigi suat tottotnia, tarimeu leu et bulat simaeru, gandum samba suat anggurdra bulat simakope eru.

¹⁵ Makayorangan sapaamian Tuhan, tapoi ta mareddet sia, mamo'mo sia, maektek sia komen. Lepa kaddiuakerangan Taikamanua, Sipasibabaraake sia samba taisilorangan leu et sipaarau sia simagege.

¹⁶ Buluijirangan sabulungan, bailiu magolunangan bagat Tuhan, bara goluNia kalulut pukakatai sigalaiakenendra.

¹⁷ Panguruatnakerangan buluakenen ka sangamberi ketsat sikatai ta Taikamanua, ka taikamanua sitaiagaietdra, taikamanua sibau sitaipulotokietdra taikebbukatdra.

¹⁸ Taipuletceirangan Sipaarau sia simagege, kalipogitdrangan Taikamanuandra sipurimanuaiji sia.

¹⁹ Kele aiitco si Tuhan pagalaiat nene, bara goluNia si Tuhan, samba taisilonangan tatogaNia.

²⁰ Kuanangan, “Taan koba masiropmake sia minca, eddangan Kuitconia aponia sipuaaili ka tudradra. Kalulut bangsa nene simakela patuat le sia samba bulat ta mariuriu topitdra.

²¹ Rabaraake golut bagaKu ka tubut ta taikamanua, samba mugolu ka tularat buluatdra. Oto Kubaraake le golut bagatdra ka bangsa bagei, samba goluKu ka bangsa sitaiagai patuat.

²² Mujuluu le geti goluKu sabeu kele obengan sipasilalabo pat aili ka laggaira simamatei. Obengan nenda masilabo polak samba sangamberi buat siureman, samba leu sangamberi leleu pat aili ka sangamberi ungatnia.

²³ Ta' muari Kukau pugejaat baga, Kupanaake sangamberi siloguiKu katubutda.

²⁴ Mateirangan leu et kalulut roket samba pulalaje, samba kalulut besi' kalotoakenen. Kuobaake ipasabbangi sia tarimeu simasabbak, samba itautau sia ulou simalaga son.

²⁵ Pasaggangan sibaraake kamateiat ka sangamberi enungan iorak sirimanua pulotokat ka lalep. Sibau tubu samba taiokko tumateiake, samba leu tatoga sigoiso samba simabaja'.

²⁶ Ai obaKu masitata'ake sia, bule ta rarepdep sia minca.

²⁷ Tapoi ta koba raumun tubudra tai saggak Israel, aipoi babara ikukua ka bagadra, samba rakua arakalaake sapaamianKu,’ tapoi sibulatnia Aku le amasigalaiake sangamberinia nene.

²⁸ Israel nene iate sara bangsa sita' anai bagai bagatdra, sita' anai pukokolou ka baga.

²⁹ Ke bai masiku patuatdra, raagai kolou geti, samba paatutdrangan kalepakat purimanuaiatdra.

³⁰ Kipa iooi sara sirimanua masikukru sangaribu sirimanua, samba rua sirimanua ioi ratuitui pulu ribu sirimanua? Aisakiakean sia Tuhan, Taikamanuandra, aikaddiuakean sia Taikamanuandra simagege.

³¹ Raagai tai saggak Israel sipasijago sia ta makere kele Taikamanua sipasijago Israel.

³² Kalulut sikatai le sia kele tai Sodom samba Gomora, kele loinat anggur simapongit samba buania simatuba.

³³ Suat anggurda iate tubat ulou simalaga son.

³⁴ Airerepdep si Tuhan sigalaiakenen saggakdra sapaamianNia samba ai teterenia iukumake sia.

³⁵ Ilulumunake samba iukumake sia si Tuhan, ta'an mauju rabele ramatei, iaailingan le tetere katukataikatdra.

³⁶ Iaarauake te geti sapaamianNia samba ipununtuki baga sapaguguletNia, ke' iitco ta'an amoi katubudra samba taan anai ron tubudra.

³⁷ Iageti parerenangan si Tuhan ka paamianNia, “Kaipangan taikamanua simaron karonietmui baga?”

³⁸ Komrangan tosi tarimeu sibuluakenenmui, samba lo'muian suat anggur sibuluakenenmui. Koiniake le sia raoi masiropmake kam, eddangan ibailiu sia sijago kam.

³⁹ Itco kam, Aku Taikamanua Sisasara, ta anai taikamanua bagei sarat Aku le. Aku le masimateike samba masirimanuaake, masikau siorangan samba masialeake. Ke mugalai Aku taanai beri sia sioi masisaggangi Aku.

⁴⁰ Bulatnia Aku, Taikamanua sipuririmanua, Kuakkatnake kabeiKu samba musuppa:

⁴¹ Kuasai geti lanjauKu simakirisau, samba Kugalaiake pasiukuman, Alakungan lumun ka sangamberi saggakKu samba ukumakekungan sangamberi simalaga baga ka tubuKu.

⁴² Sun le geti logaura ka sangamberi siloguiKu, sangamberi silawan Aku mateiakekungan sia pasamba lanjauKu. Ta' Kuobaake kasei pa sisaggangi Aku, sirimanua sitangsiakenen samba sibara siorangan bui' ta matei leu et.

⁴³ Ale bangsa-bangsa, umun kam paamian Tuhan, kalulut iuukumake poi si Tuhan sangamberi simateiake sia. Alanangan lumun ka saggakNia tapoi iappeake le jodra sapaamianNia.”

⁴⁴ Si Mose samba si Josua togat Nun masiuraiake urai nenda, bailiu oinangan raarepinia sangamberi bangsa Israel.

Pangampulat nganturat Mose

⁴⁵ Kele ailepa aisegeake nganturat Tuhan si Mose ka bangsa Israel,

⁴⁶ kuanangannia, “Lelengake kam sangamberi parenta sisegeakenenku ka tubumui gogoi nene. Gelaiake kam ka tatogamui, bule imariuriu topitdra masigalaiake sangamberi surukat Tuhan.

⁴⁷ Sigelaiakenenku nenda ta tiboiet siboboi, tapoi purimanuaiatmui le. Kau nureddet kam sangamberi parenta nenda, bule imaburu puririmanuamui ka kupkumen laggai kudduijietmui ka silat bagat oinan Jordan.”

⁴⁸ Ka gogoi nenda leu et kuanangan si Tuhan kai Mose,

⁴⁹ “Kenan ka leleu Abarim ka kupkumen laggai Moab ka silat laggai Jerikho. Lepa tatra ekeu ka leleu Nebo samba mattainungan polak Kanaan, ta an mabuburu Kukaunia ka bangsa Israel.

⁵⁰ Matei le geti ekeu ka uddut leleu nenda, kele sarainam si Aron aimatei ka leleu Hor.

⁵¹ Ruamui ta mariuriu topitmui ka tubukKu samba ta anusuru' kam Aku ka matadra tai bangsa Israel ka teteret ai kam ka bubuakat oinan Meriba, ka bebet kupkumen laggai Kades, ka simatangeu Zin.

⁵² Kalulut nenda tapoi ta momoi nuguruki kupkumen laggai kaunenKu ka bangsa Israel. Sarat masiitcoan le kekeu.”