5Mos. 31 - BUKO SIPUNENAN

Si Josua ibailiu silit Mose

¹ Panibonangan minca si Mose ka bangsa Israel,

² kuanangannia, “Kineneiget rurakku aiailingan sangotu ruapulu ngarura samba ta an amoi katubukku masiuteake kam. Samba leu bagei aikuangan si Tuhan, ta momoi kutalipoki bagat oinan Jordan.

³ Tuhan Taikamanuamui te geti muenung ka matamui samba Nia te masisusubuake tai bangsa sikukuddu sedda, bailiu oinangan nukudduiji kam polakdra. Si Josua te ibailiu utemui, kele sikuat Tuhan.

⁴ Si Tuhan le geti masisusubuake tai bangsa, kele aikalaake Sihon samba Og, rimatatdra tai Amori, samba masipakatai kupkumen laggaira.

⁵ Akenangan kamanangan kakam si Tuhan, lepa galaiakemuian katubutda kele sikuaku ka tubumui.

⁶ Kau imaron patuatmui samba numagege kam! Bui' numaloto kam katubutda, kalulut si Tuhan Taikamanuamui le masiroropmake kam. Ta' ioba ipabuji bagamui samba ta ikakaddiuake kam.”

⁷ Lepa sogainangan si Josua si Mose, ipurio ka matadra sangamberi bangsa Israel, kuanangan ka tubunia, “Kau imaron patuatnu samba kau numagege, Josua! Ekeu te masiuteake bangsa nene masikudduiji kupkumen laggai sipalelekngakenen Tuhan ka taikebbukatdra.

⁸ Si Tuhan le masipalululu samba masiroropmake kam. Ta' ioba ipabuji bagam samba ikakaddiuake ekeu. Oto bui' numaloto samba numakarat baga.”

Surukat Tuhan buita tubasa senen pitu ngarura

⁹ Lepa suratnangan si Mose surukat Tuhan Taikamanua samba kaunangannia ka tai imam Lewi siuddetnakenen masipasikeli Peti Pakerekat Baga, samba katubutda sikebbukat laggai ka Israel.

¹⁰ Parentaakenangan sia si Mose, “Ka senen pangampulat pitu ngarura, ka bagat rura pasitatakat utak ka punen Pusasapou,

¹¹ bui' ta nubasaake kam sangamberi surukat nene ka nganga sabeu ka tai Israel siooi masipanindogi si Tuhan Taikamanuamui ka kudduat sipiliNia.

¹² Koiniakenungan sangamberi taimanteu, tainanalep samba tatoga samba leu siooiake sikukuddu ka sangamberi laggaimui raparuru addeat masiarep pasibasaat nenda, bule ragelai masisuru' si Tuhan Taikamanuamui samba leu ramariuriu masireddet sangamberi parentaNia.

¹³ Ka bagat enungan kele nene, sangamberi tatogamui sitaipasiarep peile pagalaiat surukat Tuhan Taikamanuamui, oinangan raarepnia samba ragelai masisuru' si Tuhan burura murimanua ka laggai kupkumen kudduijietmui ka silat bagat oinan Jordan.”

Parenta sikateitei sikau Tuhan ka tubut Mose

¹⁴ Iageti kuanangan si Tuhan kai Mose, “Ta'an mabuburu nupurimanua. Oto, sogai si Josua samba abbitnia ka sapouKu, bule ioi kukau sangamberi enungan ka tubunia.” Lepa ei si Mose samba si Josua ka sapou Tuhan,

¹⁵ samba patoilanangan tubunia si Tuhan katubutda ka tanai rusa sipunununuijat ka bebet matatbaliu Kemah.

¹⁶ Kuanangan si Tuhan kai Mose, “Amalegrengan kamateiatnu. Lepa nukaddiuake sia, ta'an mariuriu topitdra minca bangsa Israel ka tubuKu samba pakatairangan palelengan sigalaiKu pasamba sia. Kaddiuakerangan te geti Aku raei masipanindogi taikamanua buluijiet ka kupkumen laggai gurukietdra geti.

¹⁷ Ke muaili nenda, bara goluKu simakope katubutda. Kaddiuakekungan geti samba mateiakekungan sia. Maiginangan gejat baga sabeu siorak sia, lepa seseakerangannia aipuaili sangamberinia nene kalulut Aku, Taikamanuandra, ta'an masipaalei sia.

¹⁸ Ka teteret nenda ta koba masiropmake sia, kalulut arapanindogingan taikamanua bagei samba aragalaiakean sikatai.

¹⁹ Kineneiget surat le urai nene samba gelaiake ka bangsa Israel sibailiu sipasimuneng katubutda.

²⁰ Abbitkungan te geti sia ka kupkumen laggai simakayo samba simagabru, kele sipinalelekKu ka taikebbukatdra. Sedda purimanuandrangan simasanang samba sesetdrangan sangamberi komen siobat bagadra. Tapoi lepa geti soksokrangannia ei sia masipanindogi taikamanua bagei. Keraakerangan Aku samba pakatairangan palelenganKu,

²¹ samba pat bailiunangan maigi gejat baga sabeu ioorak sia. Tapoi urai nene tuuraiake simariuriu samba tupakei sibailiu pasimuneng katubutda. Sarapei kineneiget, kepei Kuabbit sia ka kupkumen laggai sipalelekngakenenKu, Akuagaian enungan pupatuanandra.”

²² Ka teteret nenda leu et suratnangan urai nenda si Mose, lepa gelaiakenangannia ka bangsa Israel.

²³ Iageti panibonangan si Tuhan kai Josua, togat Nun, kuananganNia, “Kau imaron patuatnu samba numagege, Josua! Ekeu te geti masiuteake bangsa Israel masiguruki laggai sipalelekngakenenKu katubutda, samba Aku te masipaalei ekeu.”

²⁴ Lepa suratnangan si Mose surukat Taikamanua ka bagat sara buko. Suratnangannia sipulelelek barania ka siboiki pat aili kalepakatnia.

²⁵ Kele ailepa, kuanangannia ka tai imam Lewi siuddetnakenen sipasikeli Peti Pakerekat Baga,

²⁶ “Ala' kam buko Surukat Taikamanua nene, samba kau kam ka bebet Peti Pakerekat Bagat Tuhan Taikamanuamui, bule mariuriu ikuddu sedda sibailiu pasimuneng katubutda bangsa nene.

²⁷ Kuagai kelat patuatdra samba obara masilawan. Beringan aipeile aku muririmanua leu malawan sia kai Tuhan, sarapei te geti kumatei!

²⁸ Kineneiget koiniake sangamberi sikebbukat laggai samba siuteake saladdu raparuru ka mataku, bule kusegeake pagalaiat nene katubutda. Kusogai manua samba polak sibailiu sipasimuneng katubutda.

²⁹ Kuagai lepat kamateiatku, sangamberidra bailiunangan geti sia sirimanua sikatai lepa geti keraakerangan sangamberi sigelaiakenenku katubutda. Samba oraknangan geti sia gejat baga, kalulut arabaraake pugolukat Tuhan ragalaiake sikeraakenenNia.”

Urai Mose

³⁰ Lepa uraiakenangan urai nene si Mose pat lepa, ai leu raarep sangamberidra bangsa Israel.