5Mos. 3 - BUKO SIPUNENAN

Tai Israel masikalaake Rimata Og

¹ “Lepa tuitui sita ka saigit bare ka laggai Basan. Ka sia si Og, rimata Basan oi nia sambatda sangamberi saladdunia masisaggangi sita ka be'bet laggai Edrei.

² Tapoi kuanangan si Tuhan ka tubuku, “Mose, bui' numaloto katubunia. Kuaake te nia, saladdunia samba sangamberi laggaira ka tubumui. Galaiake ka tubunia kele sigalaiakenennu ka tubut Sihon, rimatadra tai Amori siuteake Hesybon.”

³ Oto Tuhan Taikamanuanta akenangan leu Rimata Og samba taikaumania ka tubutta, samba kalaaketangan sia sangamberidra.

⁴ Ka teteret nenda opputtangan sangaliot laggaira, ta anai berisara sipulelegei. Sangamberinia ai enem pulu laggai ataoppu kam ka sangalio laggai Argob, uteakenen Rimata Og sibara ka Basan.

⁵ Sangamberinia laggai nenda sarat sibara irip bukku simabuak, sangamberi matatbaliu samba lelekre sipasipepetpet matatbaliu nenda. Tapoi ai leu et laggai bagei sita' irip.

⁶ Sangamberi laggai nenda pakataitangannia, samba sangamberidra taimanteu, tainanalep sambat tatoga leu mateiaketangan sia kele sigalaiakenenta ka sangamberi laggai Rimata Sihon sibara ka Hesybon.

⁷ Alatangan tarimeura samba parauraugittangan leu sangamberi laggaira.

⁸ Ka teteret nenda alatangan katubutda ruadra rimata Amori, iate laggai ka saigit kabelaiat sulu Oinan Jordan sambat Oinan Arnon pat aili ka leleu Hermon.

⁹ Ka sia tai Sidon, raoniake leleu Hermon iate Sirion, samba ka tai Amori raoniakenia Senir.

¹⁰ Iageti ikepmaketangan sangalionia laggai kupkumen Rimata Og sibara ka Basan: sangamberi laggainia ka gaktuk leleu simabuak, kupkumen laggai Gilead samba laggai Basan, riuriu leu et ka saigit kabelaiat sulu ka sanganantat laggai Salka samba laggai Edrei.”

¹¹ Rimata Og iate tai Refaim sikateitei. Petit tubut simamateinia nantania siba ngaeto, lionia malegre epat ngaeto, siripot kirekat siteuakenenda. Teret kineneiget momoi peile ituitco ka Raba, laggaira tai Amon.

Suku-suku sikudduiji laggai ka saigit kabelaiat sulu bagat oinan Jordan

¹² “Kele aibailiunia bakkatta polak nenda, kaukungan katubutda suku Ruben samba Gad kupkumen laggai saigit ka bare laggai Aroër ka be'bet Oinan Arnon, samba sangarubeiat kupkumen laggai simaleleu ka Gilead samba leu sangamberi laggainia.

¹³ Ka tubut sitenga suku Manasye, kaukungan legei kupkumen laggai Gilead, samba leu et laggai Basan, laggai siuteakenen Og siboiki, iate sangamberinia kupkumen laggai Argob.” Kupkumen laggai Basan maagai ka sirimanua iate kupkumen laggaira tai Refaim.

¹⁴ Si Jair sibara ka suku Manasye alanangan sangaliot kupkumen Argob, iate barania ka Basan aili ka pasongan Gesur samba Maakha. Kaunangan onin laggai sigoiso nenda kele oninia, samba teret kineneiget aipeile maagai iate laggai sigoiso Jair.

¹⁵ “Kaukungan leu et laggai Gilead ka muntogat Makir sibara ka suku Manasye.

¹⁶ Samba katubutda suku Ruben samba Gad akukau iate polak ka paoggangan kupkumen laggai Gilead samba bagat oinan Arnon. Tengan bagat oinan nenda iate pasongandra ka saigit kaiaman, oto saigit ka bare pasongandra iate bagat oinan Jabok, sangarubeiat polak nenda iate pasongan kupkumen laggaira tai Amon.

¹⁷ Ka saigit ka belekat sulu, kupkumen laggaira sarat polakdra pat aili ka bagat oinan Jordan, barania ka Paot Galilea ka saigit bare pat aili ka Koat Simamatei ka saigit kaiaman, teret aili ka reret leleu Pisga ka saigit kabelaiat sulu.

¹⁸ Ka teteret nenda akukau parenta katubutda kele nene: Tuhan Taikamanuamui masiake ka kam kupkumen laggai saigit kabelaiat sulu bagat oinan Jordan bailiu pulaggaiatmui. Tapoi ka sia tai saladrumui bui'ta bara pamateira rapuboiki ka suku Israel bagei ratalipoki bagat oinan Jordan.

¹⁹ Sarat tatoga samba tainanalepmui samba leu tarimeumui simigi momoi ikuddu ka laggai siakeku ka tubumui.

²⁰ Ropmake kam sia sabangsamui teret ioi rakudduiji polak akenen Tuhan Taikamanuamui katubutda ka saigit kabelekat sulu bagat oinan Jordan, samba teret iobaake sia si Tuhan imalelek puririmanuandra sedda, kele sigalaiakenenNia ka tubumui. Iapeite momoian nutoili kam ka polakmui siakeku.

²¹ Lepa kuakungan kai Josua: Anuitcoan sangamberinia sigalai Tuhan Taikamanuamui ka tubut Sihon samba Og, karua rimata nenda. Oto kisedda leu te igagalaiake katubutda senen rimata oppuetnu polakdra.

²² Bui' numaloto katubutda, aipoi Tuhan Taikamanuam le pasasaggak iropmake kam.”

Ta' tuobaake si Mose iguruki laggai Kanaan

²³ “Kateteret nenda panindoukungan ka tubut Tuhan:

²⁴ Ale Tuhan Sipulubeunan, aile kuaagai sipatoilaNu katubuku nene iate panandaat ka sangamberi sigalainu sabeu samba kiseiet. Bulat ta anai taikamanua bagei ka manua samba ka polak siooi masigalaiake sangamberi kiseiet sabeu.

²⁵ Obaake le kutalipoki bagat oinan Jordan, ale Tuhan, addeat masiitco kupkumen laggai polaknia simagabru ka sila', kupkumen laggai ka simaleleu simalainge samba Paleleu-leleu Libanon.

²⁶ Tapoi kalulut kam le aikabaraiji golut Tuhan katubuku bailiu ta aiarepi panindogatku. Bailoknia kuanangan si Tuhan ka tubuku: Alepaan nenda ale Mose! Bui'an nukua pagalaiat nenda!

²⁷ Kenan le ka uddut leleu Pisga, mattai ka saigit bare samba ka kaiaman, saigit kabelaiat sulu samba kabelekat sulu. Bulat lelekngake sipulelelek apa siitconu nenda, aipoi ta'an nutatalipoki bagat oinan Jordan.

²⁸ Sarat kau le nupangantru si Josua. Paron paatuatnia, aipoi niangan le masiuteake bangsa Israel raei ka sila' raikepmake laggai siitconu nenda.”

²⁹ Iageti kuddu sita ka peleu leleu ka silat laggai Bet-Peor.”