5Mos. 29 - BUKO SIPUNENAN

Palelengan Taikamanua pasamba tai Israel ka kupkumen laggai Moab

¹ Nene te bagat palelengan parentat Tuhan sigalai Mose pasamba bangsa Israel ka teteret ai sia ka kupkumen laggai Moab. Palelengan nenda sibailiu tuppai palelengan sigalai Tuhan katubutda ka leleu Sinai.

² Koiniakenangan sangamberi tai Israel si Mose bule raparuru, lepa kuanangan katubutda, “Anuitcoan kam apa sigalai Tuhan ka tubut rimata Misir, sipugagalai ka tubunia samba ka sangalio laggainia.

³ Anuitcoan leu et kam pugejaat baga sabeu, pukerengan samba kiseiet sigalaiakenen Tuhan.

⁴ Tapoi teret kineneiget ta pei leu iobaake nuagai kam kolou sangamberi sisilomui nenda.

⁵ Epat pulu ngarura burunia aipaneinei kam si Tuhan nuenungi kam kudduat simatangeu, tapoi ta amakatai bibilet samba kasumui.

⁶ Ta' anai roti komenmui, suat anggur ele lo' simapuinengen, tapoi akenangan sangamberinia si Tuhan bule nuagai kamnia Nia te Tuhan Taikamanuamui.

⁷ Samba ka teteret atasege ka kudduat nene, bela Rimata Sihon sibara ka Hesybon samba Rimata Og sibara ka Basan masisaggangi sita. Tapoi atakalaake le sia.

⁸ Ikepmaketangan polakdra samba rubeiaketangannnia katubutda suku Ruben, Gad, samba iletalaga ka suku Manasye.

⁹ Oto kau imariuriu reddetmui ka palelengan nene, bule numauktuk kam ka sangamberi galajetmui.

¹⁰ Gogoi nene sangamberimui murio ka matat Tuhan Taikamanuamui, sangamberi saute ka bagat suku, sikebbukat laggai, sautet saladdu, sangamberi taimanteu,

¹¹ tainanalep, tatoga, samba sangamberi siooiake sikukuddu ka talagamui samba sipasiropmake kam masipokpok loina samba masibairat oinan.

¹² Tuhan Taikamanuamui masigalai palelengan pasambamui, samba kineneiget sangamberimui paruru sene addeat masiappra palelengan pasamba suppa nenda samba leu masisilo galaiakenen reddenenmui.

¹³ Ka bagat palelengan nenda, gogoi nene Tuhan masironnake ibailiuake kam bangsaNia, samba Nia ibailiu Taikamanuamui pasamba suppa kele sipalelekngakenenNia ka tubumui samba ka taikebbukatmui si Abraham, Ishak samba si Jakob.

¹⁴ Ta' sarat ka tubumui aiappra palelengan nenda si Tuhan samba sangamberi galaiakenenmui,

¹⁵ tapoi ka senen sirimanua leu sipuririo sene ka gogoi nene, ka matat Tuhan Taikamanunta, samba sia leu ka reddenanta ka gogoi sibabara.”

Sipuaaili ka sitaimareddet ka tubut Tuhan

¹⁶ “Ai le nurerepdep kam kipa puririmanunta ka laggai Misir samba kipa tapuenung tasabau kam sangamberi kupkumen laggaira sabangsa bagei.

¹⁷ Anuitcoan kam sangamberi tularat buluatdra kasitsitnakenen sigalai sibara ka loina, batu, perak samba mas.

¹⁸ Oto jago kam bui' ibara sara ka talagamui, taimanteu ele tainanalep, sipulalalep ele suku sipuririo sene, ikateiteiake Tuhan Taikamanuanta raei masipanindogi taikamanuandra bangsa bagei. Galajet nenda kele ungat sipututu'tu bailiu sara siureman simapongit samba simatuba.

¹⁹ Ka talagamui sipasiarep tiboiet simalippat nenda, bui' ibara sipaatu itutuppai le erut puririmanuania, kenanen bulat itutnake siobat bagania sarania. Nene te geti sisubuake le kam sangamberimui, sirimanua sikatai samba leu simatopit.

²⁰ Ta' te iaappeake si Tuhan sirimanua kele nenda. Bailoknia ioorak le nia geti oloi golut Tuhan, samba sangamberi pugejaat baga sitususurat ka bagat buko nene oraknangannia, teret isubuakenia si Tuhan.

²¹ Bailiuakenangannia si Tuhan sara uluijet ka sangamberi suku Israel, samba ukumnangannia ka pateleijat siniboi ka bagat palelengan sitususurat ka buko nene, buko surukat Tuhan.

²² Ka gogoi sibabara, raitco geti sapunuteteumui samba siooiake sibara ka kupkumen laggai ka sareunan pugejaat baga samba pangoringan siaket Tuhan ka kupkumen laggaimui.

²³ Sangamberi monemui bailiunangannia polak simagarak, tabbonangannia belerang samba garam. Polaknia ta an momoi itupauremi samba puo ta mututu'tu sedda. Laggaimui bailiunangannia geti kele Sodom samba Gomora, Adma samba Zeboim sisubuakenen Tuhan ka teteret aibara golunia simakope.

²⁴ Iageti sangaliot polak masiparereake, “Angoi kele kisene aigalai si Tuhan ka kupkumen laggaira? Aponia lulunia ipugogolu simakope?”

²⁵ Samba alegiatnia iate, “Kalulut ta arapuletcei palelengan Tuhan, Taikamanuan taikebbukatdra, palelengan sigalaiNia pasambadra ka teteret aibelake sia ka laggai Misir.

²⁶ Rapaguguletnake tubudra ka taikamanua sitaiagaietdra, kenanen aikerangan sia si Tuhan masipanindogi taikamanua nenda.

²⁷ Iate lulunia aipugolu si Tuhan ka paamianNia samba kaunangan sangamberi pugejaat baga ka kupkumen laggaira kele sitususurat ka bagat buko nene.

²⁸ Bulat makope le golunia si Tuhan, samba ka bagat golunia simakope ron nenda, buraunangan bangsa Israel ka polakdra samba ribbaiakenangan sia ka kupkumen laggai bagei bailiu kuddu sia sedda.”

²⁹ Ai piga pa sipinakelet Tuhan Taikamanuanta, tapoi surukatNia aipatoilaan ka tubutta, sita samba leu sapunuteteuta buita tareddet teret buru-buru.”