5Mos. 28 - BUKO SIPUNENAN

Panukanan ka tubudda simareddet

¹ “Ke mareddet kam kai Tuhan Taikamanuamui samba maririu nugalaiake kam parenta siakeku ka kam gogoi nene, bailiuakenangan kam bangsa bulat simakope eru katuareman oni ka polak nene.

² Kau mareddet kam kai Tuhan Taikamanuamui, bule iake sangamberi panukanan nene ka tubumui, iate:

³ Tusukatnake sangamberi laggai samba monemui.

⁴ Tusukatnake kam, bailiu maiginangan tatogamui, buat siuremanmui sipususukkra samba jaui, kisedda leu kambing ele biribiri simakope igi.

⁵ Tusukatnake leu et buat gandummui samba leu komen sigalaimui ka buat gandum nenda.

⁶ Tusukatnake leu et sangamberi galajetmui.

⁷ Ke rasaggangi kam, kalaakenangan saggakmui si Tuhan. Riuriuakerangan rasaggangi kam simakere, tapoi pasaragainangan sia ratuitui kopet loto'ra.

⁸ Sukatnakenangan galajetmui si Tuhan Taikamanuamui samba sutnakenangan leu sangamberi kudduat gandummui. Lepa sukatnakenangan kam ka laggai akenenNia ka kam.

⁹ Ke mareddet kam ka tubut Tuhan Taikamanuamui samba nugalaiake kam sangamnberi parentaNia, bailiuakenangan leu kam paamianNia, kele sipalelekNia.

¹⁰ Iageti itcorangan kam sangamberi bangsa ka polak, kam nene iate sipilit Tuhan, bailiu mailarangan ka tubumui.

¹¹ Samba panguruaninangan kam iake tatoga simigi. Maiginangan leu tarimeumui samba buat monemui sipususukra ka laggai sipalelekngakenen Tuhan ka taikebbukatmui akenennia ka kam.

¹² Akenangan urat ka ke iali teterenia sibara ka pangoirikatNia sipususukkra ka manua. Sukatnakenangan leu galajetmui, pat oinangan nubaleake kam ka bangsa simigi, tapoi kam geti ta masibabale kam.

¹³ Bailiuakenangan kam saute si Tuhan Taikamanuamui ka talagat bangsa, samba ta sipasiului. Ke mariuriu topitmui ka sangamberi parentat Tuhan siake'ku ka kam gogoi nene, uraunangan pueerut puririmanuamui samba ta ibebeleki.

¹⁴ Tapoi bui' te nupasibbu kam sangamberi parenta nenda ele nupanindogi kam samba nupaguguletnake kam tubumui ka taikamanua bagei.”

Pateleijat katubutda sitaimareddet

¹⁵ “Tapoi ke' ta mareddet kam kai Tuhan Taikamanuamui, samba ta mariuriu nugalaiake kam sangamberi parenta samba surukatNia siake'ku ka kam gogoi nene, bailiu oraknangan kam sangamberi pateleijat nene:

¹⁶ Tutelei le sangamberi laggai samba monemui.

¹⁷ Tutelei le pasimoneian gandummui samba komen sigalaimui ka gandum nenda.

¹⁸ Tutelei le kam, bailiu taimaiginangan tatogamui, buat monemui, samba leu jaui samba kambing ele biribiri.

¹⁹ Tutelei le sangamberi galajetmui.

²⁰ Ke nugalai kam sikatai samba ta nusilo kam si Tuhan, akenangan leu pasimamatei, pulamagat samba taimatulut tubu ka bagat sangamberi galaiakenenmui, bailiu ta mauju isubuake kam.

²¹ Ta muaari iorak kam sorobut oringen, pat beringan kam sara sipulelegei ka laggai kuddujietmui nenda.

²² Ukumakenangan kam si Tuhan iake oringen simasappo, palubbe-lubbe samba roket. Iaake te legeu samba rusa sipasikakataiake buat siuremanmui. Sangamberi pugejaat baga nene mariuriu le iorak kam teret numasubu kam.

²³ Ta'an bebele urat samba magaraknangan polakmui bailiunangannia kele laba'.

²⁴ Ta' an ibebeleake urat tinobut si Tuhan, tapoi urat abu le samba ngai' teret nusappru kam.

²⁵ Ke ta mareddet kam kai Tuhan Taikamanuamui, obaakenangan numakala kam si Tuhan ka tai saggakmui. Bela kam simakere nuei kam pasaggak, tapoi pusabumuian kalulut lotomui. Sangamberi bangsa ka polak muloto le geti sia raitco katai uktukmui.

²⁶ Ke matei bai kam, tubumui simamatei ibailiu le komen uma' samba tarimeu simasabbak, samba ta anai siusiake tarimeu nenda.

²⁷ Iukum te geti Taikamanua pasamba appu kele sigalaiakenenNia ka tai Misir. Tubumui sut le baroang samba gai' simatiet, tapoi ta anai laggeknia.

²⁸ Ibabailuake te kam si Tuhan siroro', simapeset samba simaingo patuat,

²⁹ bailiu pasilulumuian ka talagat sina'go kele sirimanua simapeset, tapoi ta nusese kam enungan. Sangamberi besiakenenmui ta tueeddet. Riuriru le raorei kam samba raraurau samba ta anai siropmake kam.

³⁰ Ke ta mareddet kam kai Tuhan Taikamanuamui, oraknangan leu kam sangamberinia nene: Putunangamuian, tapoi sirimanua sabagei le italimouake tunanganmui. Rioakemuian lalep, tapoi ta nukukudduiji kam. Pauremimuian anggur ka mone, tapoi ta nukokom kam buania.

³¹ Tuja'ja le geti jauimui ka matamui, tapoi ta nukom kam akkulania. Turaurau le geti sangamberi kaliddeimui ka matamui samba ta tutotoiliake. Sangamberi biribirimui tukau le geti ka tai saggak samba ta anai siropmake kam.

³² Ka matamui leu tukau le geti tatogamui sibailiu pagugulet ka tai bangsa bagei. Senen gogoi muraka matamui nugaba kam tatogamui, tapoi siboboi le, kalulut ta'an totoili sia.

³³ Ala'rangan te geti tai bangsa bagei sangamberi buat siuremanmui sisilomui sigalaimui ka bagat besit tubu, tapoi kam geti berisara nusisilo' kam, sarat paoreijat simariuriu samba ragalai ka tubumui sikatai.

³⁴ Roronangan te kam geti kalulut siitcomui.

³⁵ Baraakenangan lubbe simabesi ka reremui si Tuhan sitaioi tualeake. Barania ka rere pat aili ka tutut ketsatmui sun le appu.

³⁶ Abbitnangan te geti kam samba rimatamui ka laggai sitaiagaietmui samba leu sitaiagaietdra taikebbukatmui. Sedda te nupagugulenake kam tubumui ka taikamanua bagei sigalai sibara ka loina samba ka bukku.

³⁷ Ka laggai kudduatmui aipasaragai kam si Tuhan, malotorangan sangamberi sirimanua raitco kam, geigeirangan samba gagatirangan kam.

³⁸ Maigi karamen nukarapmake kam, tapoi goiso le nusilo kam, kalulut aitata' ikomnia sit.

³⁹ Pauremimuian aggur ka sangamberi mone samba pasikelimuiannia, tapoi ta numomonei kam buania ele nulo kam suania, kalulut sappru le loinat anggur ipakominia leiti.

⁴⁰ Pututunangan loinat zaitun ka sangamberi laggaimui, tapoi ragatnangan buania, bailiu ta nusisilo kam tulania.

⁴¹ Bara tatogamui taimanteu samba tainanalep, tapoi bailiuakerangan sia sibailiu tangsiakenen ka pasaggangan, bailiu ta anai sia ka tubumui.

⁴² Sangamberi siuremanmui sappru ipakominia sit.

⁴³ Sirimanua siooiake sikuddu ka laggaimui makokope le gegetdra ka tubumui, bailoknia ta'an maron ka kam gegemui.

⁴⁴ Ai bulagatdra baleakenendra ka tubumui, tapoi kakam ta anai sibabara baleakenenmui katubutda. Kalepakatnia puuterangan ka tubumui.

⁴⁵ Oraknangan te geti kam sangamberi pugejaat baga samba mairuiru igeugeu kam teret numatei kam, kalulut taimareddetmui ka tubut Tuhan Taikamanuamui samba anugalaiake kam sangamberi surukat siakeNia ka tubumui.

⁴⁶ Sangamberi pugejaat baga nenda sibailiu toggaiat ukuman sibara kai Tuhan ka kam samba ka reddenanmui teret buruburu.

⁴⁷ Aipanukaningan kam si Tuhan Taikamanuamui ka bagat sangamberinia, tapoi ta noba kam masipaguguletnake tubu ka tubuNia ka bagat oba samba angkat baga.

⁴⁸ Kalulut nenda bui ta nupaguguletnake kam tubumui ka tai saggak siaket Tuhan bule rasaggangi kam. Malajemuian, maonggou samba mubulutut samba leu magulai ka sangamberinia iorei le kam si Tuhan pat masubumuian.

⁴⁹ Iaake te sara bangsa si Tuhan sitaiagaietmui ngangandra sibara ka tutut polak bule rasaggangi kam. Kele manyang ilalau ibania kele kiseddda raala kam.

⁵⁰ Sikatai le sia samba ta anai nuntut bagadra ka simabaja' samba leu ka tatoga.

⁵¹ Tata'akerangan tarimeu samba buat monemui, samba ta ralelegeiake kakam gandum, suat anggur, tulat zaitun, jaui samba biribirimui teret numatei kam kalulut laje.

⁵² Saggangirangan senen laggai siaket Tuhan Taikamanuamui ka tubumui, bailiu sangamberi iripnia simabuak samba simaron karonietmui nenda mabukkatnangan.

⁵³ Ka teteret airagogoilik laggaimui tai saggak, mabelenangan bagamui kalulut pulajeat, bailiu kommuian tatogamui, tatoga siaket Tuhan Taikamanuamui kakam.

⁵⁴ Beringan siabeu tiboi tubu simakope topit bara belet bagatdra ka burut aragoilik kam, pat komnangan tatogania kalulut ta anai komen bagei.

⁵⁵ Beri goiso akkulara tatogania aikau ka sasarainania ele ka sinanalepnia simanuntu bagania ele ka tatogania sipuririmanua peile.

⁵⁶ Beringan leu tainanalep siabeu tiboi tubu simakope topit samba simakope kayo sita'pei amusila igagalaiake leu kele kisedda.

⁵⁷ Ka teteret ragoilik laggai tai saggak, tainanalep nenda bara belet bagatdra kalulut pulajeat, bailiu komnangan togania siputututu mata sibau samba aleinia ka sipinakele. Beri goiso aikau ka simanteunia simanuntu bagania ele ka tatogania sipuririmanua peile.

⁵⁸ Ke ta mariuriu nureddet kam sangamberi surukat Tuhan Taikamanuamui sitususurat ka bagat buko nene samba ta nusuru' kam Tuhan Taikamanuamui sipulubeunan samba simagege,

⁵⁹ akenangan besi' ka tubumui samba ka reddenanmui sitaioi tualeake samba besi' sitaioi tulaggek.

⁶⁰ Sangamberi besi' kalotoakenen siitcomui ka Misir nene te ioorak kam, samba ta mamale kam.

⁶¹ Iaake leu si Tuhan sene ngamata besi samba wabah sita' tukua ka bagat buko nene, buko surukat Tuhan. Lepa geti masubumuian.

⁶² Kenanen amaigingan kam kele igit panyanyat ka manua, ta maigi sipuririmanua ka talagamui, kalulut ta mareddet ka tubut Tuhan Taikamanuamui.

⁶³ Kele angkat bagania si Tuhan iake erut puririmanuamui samba ituppai igimui, mangka leu bagaNia imateiake samba isubuake kam. Tuburau le kam ka laggai kudduijietmui geti ka bagat oggak simaruei nene.

⁶⁴ Pasaragainangan kam geti si Tuhan ka talagat bangsa-bangsa ka sangalio polak. Sedda te nupanindogi kam taikamanua sigalai sibara ka loina samba ka bukku, taikamanua sitaiagaietmui samba leu sitaiagaietdra taikebbukatmui.

⁶⁵ Ka talagatdra tai bangsa nenda ta nusesese kam pusanangan, samba ta anai kudduat siooi nukua kam bakkatmui. Akenangan si Tuhan pukaranan bagamui samba belet baga sita' anai karonien.

⁶⁶ Purimanuaiatmui sarat palotokat pugejaat baga. Sinago samba sinoibo sarat muloto samba maloto matei.

⁶⁷ Ka teteret nuitco kam apapa pugeretnangan teinungmui kalulut puloloto. Simanceman nukiddi kam imaruei imasoibo, samba sinoibo nukiddi kam imaruei imapato.

⁶⁸ Abbitnangan kam geti si Tuhan toili ka Misir pasamba kapa', kenanen poi aikuangan ta'an totoili kam minca sedda. Sedda besiakemuian nusakiake kam tubumui sibailiu pagugulet katubutda tai saggakmui, tapoi berisara sia sioba masisaki kam.”