5Mos. 27 - BUKO SIPUNENAN

Surukat Taikamanua sinuratnakenen ka bukku

¹ Iageti ai sia sambatda saute ka Israel, segeakenangan patonekat nene si Mose ka bangsa Israel, “Kau nureddet kam sangamberi parenta sisegeakenenku gogoi nene ka tubumui.

² Ka gogoi anutalipoki kam Oinan Jordan anugurukim kam laggai akenen Tuhan Taikamanuamui ka kam, buita nurioake kam piga pa bukku sabeu lepa kapurmuiannia.

³ Suratnake kam ka bukku nenda sangamberi ngangan surukat nene. Ke atuguru'an kam ka laggai simakayo samba simaeru polak sipalelekngakenen Tuhan, Taikamanuanda taikebbukatmui akenenNia ka kam,

⁴ samba ke aiat kam ka silat Oinan Jordan, bui' ta mei kam ka leleu Ebal. Rioakemuian bukku sedda samba kapurmuiannia kele siparentaakenenku ka tubumui gogoi nene.

⁵ Buita nurioake leu kam ka kudduat nenda sara kudduat pasibuluat kai Tuhan Taikamanuamui sibara ka bukku sita'pei atupae pugalai laba,

⁶ aipoi senen turioake kudduat pasibuluat kai Tuhan Taikamanuamui, bui ta sibara ka bukku simamuine. Ka uddut bukku nenda nuei kam masipanguruatnake buluakenen rarangen.

⁷ Panguruatnakemuain leu et buluakenen paabananmui samba kommuiannia sedda nupuangka kam baga ka matat Tuhan Taikamanuamui.

⁸ Bui' ta nusuratnake kam simakolou ka uddut bukku sikapurmui nenda sangamberi tiboiet surukat Taikamanua.”

⁹ Iageti pasamba tai imam Lewi, kuanangan si Mose ka matadda sangamberi bangsa Israel, “Kam sasaraina, Lelekngake samba arepi kam! Gogoi nene aibailiuan te kam paamian Tuhan Taikamanuamui.

¹⁰ Oto kalulut nene kau mareddet kam ka tubut Tuhan Taikamanuamui samba galaiake kam sangamberi parentaNia siake'ku ka tubumui gogoi nene.”

Pateleijat katubutda sirimanua sitaimareddet

¹¹ Iageti kuanangan si Mose ka matadda tai Israel,

¹² “Ke anutalipokingan kam Oinan Jordan, sia suku Simeon, Lewi, Jehuda, Isakhar, Josep samba Benjamin, buita murio sia ka uddut leleu Gerizim ka teteret rapasikua panukanan ka bangsa nene.

¹³ Kisedda leu et suku Ruben, Gad, Asyer, Zebulon, Dan samba Naftali, buita murio sia ka leleu Ebal ka teteret rapasikua pateleijat.

¹⁴ Iageti ka sia sangamberidda suku Lewi, buita rakua tiboiet nene simaron samba ka sia tai Israel, buita raalegi ‘Amen’.

¹⁵ Kuarangan leu tai Lewi: ‘Tupateleiji le sia sigalai tularat sigalai sibara ka bukku, loina ele logam, samba rapanindoginia sipinakele. Bulat malaga bagaNia pasibubuluiji sabulungan!’ Iageti alegirangannia sapaamian: ‘Amin!’

¹⁶ Tutelei le sia sitaimasuru ka ukkui samba ka inania samba sioreake imakatai puririmanuandra.’ ‘Amen!’

¹⁷ Tutelei le sia sioba masiritci song monenda pasongakenennia.’ “Amen!’

¹⁸ ‘Tutelei le sia sipepeakeake simapeset.’ ‘Amen!’

¹⁹ ‘Tutelei le sia sipasiraraurau bakkatda tai toi, siputata'ina samba tai lumang.’ ‘Amen!’

²⁰ ‘Tutelei le sia sipaloloi ukkuinia kalulut igalaiake paelenen ka tubut sara ka talagat sinanalep ukkuinia.’ ‘Amen!’

²¹ ‘Tutelei le sia sipaelet ka tarimeu.’ ‘Amen!’

²² ‘Tutelei le sia sigalai paelenan ka tubut bakkat maniunia, ele maniunia sisara ukkui ele sisara ina sia.’ ‘Amen!’

²³ ‘Tutelei le sia sigalai paelenen ka tubut talikunia sinanalep.’ ‘Amen!’

²⁴ ‘Tutelei le sia sipasimamateiake sirimanua sipinakele.’ ‘Amen!’

²⁵ ‘Tutelei le sia sibulagani bule ramateiake sirimanua sita' sele.’ ‘Amen!’

²⁶ ‘Tutelei le sia sitaigalaiake nganturat samba surukat Taikamanua ka bagat purimanuaiatnia.’ ‘Amen!’ ”