5Mos. 26 - BUKO SIPUNENAN

Panguruat siboiki ka buat siureman

¹ “Ke anugurukingan kam laggai akenen Tuhan Taikamanuamui ka kam samba amalelekngan kukuddumui sedda,

² oto sangamberi buat monemui siboiki siruruakenenmui, bui' ta nukau kam ka bagat sara gara'ga', samba abbitmuiannia ka kudduat sipilit Tuhan Taikamanuamui.

³ Kenan kam ka tai imam sipugagalai ka teteteret nenda samba kuamuian kam ka tubudda, “Kupoiliatnia ka tubut Tuhan Taikamanuamui, akugurukingan laggai sipalelekNia ka tubudda taikebbukatta akenenNia ka sita.”

⁴ Oto tai imam bui' ta rasilo gara'ga' sibara ka kabeimui samba galakngakerangannia ka matat kudduat pasibuluat Tuhan Taikamanuamui.

⁵ Iageti pusiblamuian ka matat Tuhan Taikamanuamui, kuamuian kise: “Ale Tuhan, tai Aram te taikebbukatku sipueeppak. Abbitnangan sangalalepnia ka Misir, iageti kuddunia sedda kele sitoi. Ka teteret araei sedda ta maigi sia, tapoi bailiunangan sia bangsa sabeu samba simaron.

⁶ Galaiakerangan paoreijat ka tubumai tai Misir rakau kai mugalai kele sara pagugulet.

⁷ Iageti pusogamaian masitiddou paroman ka tubum, Tuhan, Taikamanuanda taikebbukatmai. Arepinungan leu panindogatmai, samba itconungan pangoringan, besit tubu samba leu besit puririmanuamai.

⁸ Iageti ka bagat gege samba ron sabeu belaakenungan kai ka Misir. Galaiakenungan kerek samba kiseiet samba baraakenungan leu katuge'gekatda tai saggak.

⁹ Lepa geti abbitnungan kai sene samba akenungan polak simakayo samba simagabru ka tubumai.

¹⁰ Kalulut nenda, ale Tuhan, kupanguruatnake sene buat siuremanku siboiki sibara ka polak siakeNu katubukku.” Oto galakngakemuian gara'ga nenda ka matat Tuhan Taikamanuamui, samba panindounungan ka tubuNia.

¹¹ Sura'ake sangamberi puuktungan siaket Tuhan Taikamanuamui ka kam samba ka lalepmui. Sogai kam tai Lewi samba tai toi sikuddu ka talagamui raoi ka punen nenda.

¹² Senen rura sikatelu bui' ta nukau kam panguruat sepersepuluhanmui, iate sepersepuluh sibara ka buat siuremanmui katubutda tai imam Lewi, ka tai toi, ka siputata'ina samba ka tai lumang, bailiu ka senen laggaimui bara komenda samba maektekrangan. Ke alepaan nenda,

¹³ kuamuian ka tubut Tuhan Taikamanuamui, ‘Sibara ka sepersepuluh buat siureman bui' ta tupanguruatnake ka tubum, Tuhan, ta anai beri goiso sipulelegei ka lalepku. Sangamberinia akukauan ka tai Lewi, ka tai toi, ka siputata'ina samba ka tai lumang, kele siparentaakenen Tuhan Taikamanuangku katubukku. Ta' anai akupasabau parenta sibara kai Tuhan pagalaiat panguruat sepersepuluhan.

¹⁴ Ka teteret ai aku murereureu baga ta anai beri goiso aku kom panguruat nenda, ele akuambit ka kudduat bagei ka teteret ai aku ka bagat kasitsitnakenen, ele akukau sibaliu buluakenen ka sirimanua simamatei. Bulat amareddetnan aku ka tubum, ale Tuhan, sangamberi siparentaakenenNu akugalaiakean.

¹⁵ Kau numattai samba panukani paamianNu Israel ai ekeu ka kudduatNu sipunenan ka manua, panukani leu laggai simakayo samba simaeru siakeNu ka tubumai kele sipalelekngakenenNu ka taikebbukatmai.’ ”

Paamian sipilit Tuhan

¹⁶ “Ka gogogi nene iparentaake kam Tuhan Taikamanuamui bule nugalaiake kam sangamberi parenta nenda. Galaiake kam sangamberinia nene ka bagat riuriu topit samba ka muinet paatuatmui.

¹⁷ Ka gogoi nene anuseseake kam Tuhan sibailiu Taikamanuamui. Amupalelekngan kam bule numareddet kam ka tubuNia samba masigalaiake sangamberi surukat samba leu parentaNia.

¹⁸ Gogoi nene aisiloan kam Tuhan bailiu paamianNia, kele sipalelelekngakenenNia ka tubumui, samba ikoiniake kam masigalaiake sangamberi parentaNia.

¹⁹ Bailiuakenangan kam bangsa bulat sabeu bele pei bangsa bagei sibaraakenenNia, iageti rauumun samba suru'rangan kam. Bailiunangan kam paamian Tuhan Taikamanuamui kele sipalelekngakenenNia.”