5Mos. 25 - BUKO SIPUNENAN

¹ Ke ai rua tai Israel sieei ka sipasiukum masinganduake sara pakaroat, iageti ka bagat pakaroatda nenda tupakoinong sara sitaimasele samba simasele.

² Ke tuorakngake ukum siliso ka tubut simasele nenda, bui' ta rakoiniakenia tai sipasiukum ipurappo. Iageti igit liliso ka tubunia tusiripoki kele igit sikatai sigalaiakenenia,

³ tapoi ta momoi isaliu epat pulungaminca. Ke isaliu, atupaloloi le nia ka matat sirimanua simigi.

⁴ Bui' nuratcat ngungun jaui sipasingingitit gandum.”

Pagalaiat sitalimouake sinanalep sarainania simamatei

⁵ “Ke ai sipusasaraina sipatatadde mukuddu, lepa tata' sara ka talagadda, tapoi ta anai togania simanteu, oto silumangakenenia nenda ta momoi iputalimou ka sirimanua sabagei ke ta ka sasarainan simanteunia sitatata nenda.

⁶ Togadda simanteu sikebbukat buita tuaddeakenia togat sasarainanda sitatata nenda, bule ibara reddenannia ka talagat bangsa Israel.

⁷ Tapoi ke ta ioba italimouake babaliunia nenda, bui' ta babaliunia ka siabeu tiboi tubu ka laggai samba masikua kise, “Ta' ioba eirakku masigalaiake siripot galaiakenennia iake tuppai tubut sarainania ka talagat bangsa Israel.”

⁸ Iageti sia siabeu tiboi tubu ka laggai bui' ta rasogai sirimanua nenda bule rapatiboakenia. Tapoi ke bulat ta ioba,

⁹ bui' ta ilegreake tubunia babaliura nenda kamatadda siabeu tiboi tubu ka laggai nenda, iburau tarangai sirimanua nenda, iageti lujinangan matania samba kuanangan ka matania, ‘Buita kele kise tugagalaiake ka tubudda sitaioba masibaraake tuppai tubut sarainania.’

¹⁰ Maagainangan muntogat nene ka Israel sibailiu ‘Muntogat sigolok tarangainia.’ ”

Keraet galaiakenen sikatai

¹¹ “Ke ai rua sirimanua sipalalaba samba sara sinanalep simanteu sipalalaba nenda masiropmake simanteunia ipetsut keikeijet palabaakenen simanteunia,

¹² tippu kam kabei sinanalep nenda samba bui' imanuntu bagamui ka tubunia.

Kilo samba tekong simaeru

¹³ Bui' nupataju kam nupakei kam pasikilo,

¹⁴ samba tekong sitaimaeru.

¹⁵ Pakei kam pasikilo samba tekong sipasese bule imauju puririmanuamui ka laggai akenen Tuhan Taikamanuamui ka kam.

¹⁶ Bulat malaga bagania Tuhan Taikamanuamui ka tubudda sioba pataju.”

Parenta bule tumateiake tai Amalek

¹⁷ Repdem kam kipa aragalai ka tubumui tai Amalek ka teteret kapuenungananmui anubela kam ka Misir.

¹⁸ Ta' maloto sia ka tubut Taikamanua samba saggangirangan kam baradda ka teiteimui ka teteret aimasasaggo tubumui ele ta'an maron tubumui, lepa mateiakerangan sangamberi sipueenung simasaggo tubu sikukuddu ka teitei.

¹⁹ Oto kalulut nene, ke aiakean bai laggai nenda Tuhan Taikamanuamui ka kam samba maaman kam ka sangamberi saggak sibokko kam, bui' ta numateiake kam sangamberidda tai Amalek, bailiu ta'an anai sirepdep sia. Bui' nukalipogi kamnia!”